រុស្ស៊ីថាអាមេរិកស្នើសុំឲ្យក្រិកបិទដែនអាកាសកុំឲ្យយន្តហោះរុស្ស៊ីហោះកាត់ទៅស៊ីរី
រដ្ឋាភិបាលក្រិកបានទទួលការស្នើសុំពីអាមេរិកឲ្យបិទដែនអាកាស កុំឲ្យយន្តហោះរុស្ស៊ី ហោះឆ្លងកាត់ទៅស៊ីរី។ នេះគឺជាការបង្ហើបឲ្យដឹងរបស់មន្រ្តីរដ្ឋាភិបាលក្រិក និងបញ្ជក់ដោយអ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ ដោយបន្ថែមថា ក្រិកកំពុង ពិចារណាលើសំណូមពរអាមេរិកនេះ។
ចុះផ្សាយនៅថ្ងៃ៖
ស្តាប់ - ០២:០៧
កាលពីថ្ងៃសៅរ៍ទី៥កញ្ញាកន្លងទៅ ស្ថានទូតអាមេរិកនៅក្រុងអាថែន បានធ្វើសំណូមពរផ្លូវការ ទៅរដ្ឋាភិបាលក្រិក ដែលជាប្រទេសសមាជិកបក្សសម្ព័ន្ធអូតង់ សុំឲ្យហាមការហោះហើរនៃយន្តហោះរដ្ឋាភិបាលរុស្ស៊ី ដែលដឹក “ជំនួយមនុស្សធម៌” ឆ្លងកាត់ដែនអាកាសក្រិក ទៅកាន់ប្រទេសស៊ីរី។ សំណូមពរអាមេរិកនេះ ឥឡូវ កំពុងស្ថិតក្នុងការពិនិត្យមើល ដោយភាគីក្រិក។
ប៉ុន្តែ ទីភ្នាក់ងារពត៌មានរុស្ស៊ី RIA Novosti ដែលដកស្រង់ប្រភពការទូតក្រិកក្នុងលក្ខណៈអនាមិក បានផ្សាយថា រដ្ឋាភិបាលក្រិកមិនចង់បិទដែនអាកាសខ្លួន សម្រាប់យន្តហោះរុស្ស៊ី ដូចដែលអាមេរិកសុំឡើយ ដើម្បីកុំឲ្យល្អក់កករដល់ទំនាក់ទំនងក្រិក-រុស្ស៊ី។
តាមសម្តីអ្នកការទូតនោះ រដ្ឋាភិបាលក្រិកបានទទួលការស្នើសុំ និងអនុញ្ញាតឲ្យយន្តហោះរុស្ស៊ី២គ្រឿង ហោះកាត់ទៅកាន់ប្រទេសស៊ីរី ក្នុងចន្លោះពី ថ្ងៃទី១កញ្ញា ដល់ទី ២៤កញ្ញាឆ្នាំ២០១៥នេះ។
គួរបញ្ជាក់ថា មូលហេតុនៃសំណូមពរអាមេរិកនោះ គឺមកពីកាសែត The New York Times ក្នុងសប្តាហ៍មុន ដោយយោងទៅលើមន្ត្រីមិនបញ្ចេញឈ្មោះ នៃសេតវិមាន បានចុះផ្សាយថា រុស្ស៊ីទើបបញ្ជូនទាហាបនមួយក្រុមធំឲ្យទៅកាន់ប្រទេសស៊ីរី ព្រមទាំងបានដំឡើងទីតាំងភស្តុភានៃកងទ័ពអាកាស នៅនឹងព្រលានយន្តហោះយោធារបស់ស៊ីរី។
ជាការកត់សម្គាល់ ថ្ងៃ៥កញ្ញាកន្លងទៅ លោករដ្ឋមន្ត្រីការបរទេសអាមេរិកាំង ចន ឃែរី បានទូរស័ព្ទមកសមភាគីរុស្ស៊ី លោក ស៊ែរហ្គៃ ឡាវ៉្រូវ ហើយសំដែងនូវក្តីព្រួយកង្វល់របស់ស.រ.អា. ចំពោះដំណឹងស្តីអំពីការកើនឡើងនៃវត្តមានយោធារុស្ស៊ី ក្នុងប្រទេសស៊ីរី។ តាមលោក ឃែរី ការកើនឡើងនៃចំនួនពួកយោធា និងគ្រឿងបច្ចេកទេសសឹករុស្ស៊ីនៅស៊ីរី គឺអាចនាំទៅកាន់ការស្លាប់នៃបណ្តាជនស៊ីវិល កាន់តែច្រើនឡើង បង្កឲ្យកើនឡើងលំហូរជនភៀសខ្លួន និង រំខានដល់ “សម្ព័ន្ធប្រទេស” ដែលកំពុងប្រយុទ្ធទល់នឹងអង្គការ “រដ្ឋអ៊ីស្លាម”។
លោក ឡាវ៉្រូវ ពីចំណែកខ្លួនបានថ្លែងថា រុស្ស៊ីមិនដែលលាក់បំបាំងឡើយ អំពីជំនួយយោធាដែលផ្តល់ទៅរដ្ឋាភិបាលស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ