តុលាការកំពូលបារាំងសម្រេចថា ការដែលចៅក្រមស៊ើបអង្កេតរឹបអូសសៀវភៅកិច្ចការប្រចាំថ្ងៃលោកសាកូហ្ស៊ី ជារឿងស្របច្បាប់
នៅថ្ងៃអង្គារនេះ តុលាការកំពូលបារាំងបានសម្រេចថា ការដែលចៅក្រមស៊ើបអង្កេតធ្លាប់បានរឹបអូសយកសៀវភៅកត់ត្រាកិច្ចការប្រចាំថ្ងៃរបស់អតីតប្រធានាធិបតីបារាំង នីកូឡា សាកូហ្ស៊ី ក្នុងសំណុំរឿងគ្រួសារបេតង់គួរនោះ មិនមានអ្វីខុសច្បាប់ នោះទេ។ តុលាការសម្រេចរក្សាទុកសឿវភៅកត់កិច្ចការប្រចាំថ្ងៃរបស់អតីតប្រធានាធិបតី នីកូឡា សាកូហ្ស៊ី ដើម្បីប្រើក្នុងនិតិវិធីផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
នៅប្រទេសបារាំង ថ្ងៃអង្គារនេះ តុលាការកំពូលបារាំងបានសម្រេចថា ការដែលចៅក្រមស៊ើបអង្កេតបានរឹបអូសយកសៀវភៅកត់ត្រាកិច្ចការប្រចាំថ្ងៃរបស់អតីតប្រធានាធិបតីបារាំងសាកូហ្ស៊ី ប្រើក្នុងសំណុំរឿងគ្រួសារបេតង់គួរនោះ មិនមានអ្វីខុសច្បាប់ ដូចការប្តឹងរបស់លោកសាកូហ្ស៊ីនោះទេ។ ដូច្នេះ សឿវភៅនេះ ត្រូវរក្សាទុកប្រើក្នុងនិតិវិធីផ្សេងទៀត។
ក្នុងសំណុំរឿងបេតង់គួរនេះ លោកសាកូហ្ស៊ីធ្លាប់ត្រូវសាលាឧទ្ធរណ៍លើកលែងការចោទប្រកាន់ រួចមកហើយ ដូច្នេះ សៀវភៅនេះលែងមានប្រយោជន៍សម្រាប់លោកទៀតហើយ។ គួររំលឹកថា ក្នុងសំណុំរឿងក្តីគ្រួសារសេដ្ឋីនីចំណាស់បេតង់គួរ ដែលជាម្ចាស់ក្រុមហ៊ុនសំអាងកាយឡូរេអាល់ ដ៏ល្បីនៅបារាំងនោះ កាលពីខែតុលាឆ្នាំ២០១៣ សាលាឧទ្ធរណ៍ធ្លាប់បានសម្រេចលើកលែងការចោទប្រកាន់លើអតីតប្រធានាធិបតីសាកូហ្ស៊ី ពីបទកេងចំណេញលើភាពវង្វេងវង្វាន់ស្មារតីរបស់លោកស្រីបេតង់គួរ ដើម្បីយកប្រាក់លោកស្រីទៅឧបត្ថម្ភការឃោសនាបោះឆ្នោតរបស់គណបក្សលោក កាលពីឆ្នាំ២០០៧។
ដោយឡែក សៀវភៅកត់ត្រាកិច្ចការប្រចាំថ្ងៃរបស់លោកសាកូហ្ស៊ីក៏ត្រូវប្រើក្នុងនិតិវិធីពាក់ព័ន្ធនឹងរឿងដែលថា លោកសាកូហ្ស៊ីអាចប្រើអំណាចរបស់លោកកាលពីឆ្នាំ២០០៨ ដើម្បីអន្តរាគមន៍ជួយពាណិជ្ជករបារាំងប៊ែរណា តាពី ក្នុងជម្លោះជាមួយធនាគារបារាំង Crédit Lyonnais។ ចៅក្រមស៊ើបអង្កេតបារាំងជាច្រើនរូបទៀតក៏អាចចាប់អារម្មណ៍សៀវភៅនេះ ក្នុងសំណុំរឿងចោទប្រកាន់លើអតីតប្រធានាធិបតីសាកូហ្ស៊ី ថាប្រហែលបានទទួលប្រាក់ឧបត្ថម្ភការឃោសនាបោះឆ្នោតឆ្នាំ២០០៧ ពីប្រធានាធិបតីប្រទេសលីប៊ី មូអាម៉ា ខាដាហ្វ៊ីផងដែរ ទើបក្រោយមកធ្វើអោយលោកសាកូហ្ស៊ីសម្រេចអោយបារាំងធ្វើសង្គ្រាមនៅលីប៊ី ដើម្បីបំបាត់ភស្តុតាង។
គួរបញ្ជាក់ថា ទាក់ទងសំណុំរឿងនេះ រដ្ឋអាជ្ញាទទួលបន្ទុកបទល្មើសហិរញ្ញវត្ថុ បានបើកការស៊ើបអង្កេតពីបញ្ហានៃការបំពានការសំងាត់តុលាការ និងការបំពានអំណាចក្រោយពេលបានទទួលព័ត៌មានថា លោកសាកូហ្ស៊ីនិងមេធាវីរបស់លោកមួយរូប ធ្លាប់បានពិភាក្សាគ្នាចង់សុំអោយរដ្ឋអាជ្ញាមួយរូប ជួយស៊ើបសួរព័ត៌មានស្តីពីនិតិវិធីបណ្តឹងទាក់ទងសៀវភៅកត់ត្រាកិច្ចការប្រចាំថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ