តើការប្រកួតបាល់ទាត់ Euro 2016 អាចផ្តល់ផលចំណេញអ្វីខ្លះដល់សេដ្ឋកិច្ចបារាំង?
ដើម្បីធ្វើជាម្ចាស់ផ្ទះរៀបចំការប្រកួតកីឡាបាល់ទាត់ដណ្តើមពានរង្វាន់អឺរ៉ុបនេះ បារាំងត្រូវការចំណាយយ៉ាងច្រើន ទាំងទៅលើហេដ្ឋារចនាសម្ព័ន្ធ ជាពិសេស ពហុកីឡាដ្ឋាន និងទាំងទៅលើការរក្សាសន្តិសុខ។ សំណួរចោទឡើងថា បារាំងទទួលបានផលចំណេញអ្វីមកវិញពីការប្រកួតនេះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ជាការពិតថា ការរៀបចំប្រកួតកីឡាខ្នាតអន្តរជាតិ ដូចជា បាលទាត់ពានរង្វាន់អឺរ៉ុបនេះ ទាមទារឲ្យមានរចនាសម្ព័ន្ធកីឡារឹងមាំ ទាំងពហុកីឡាដ្ឋានដើម្បីទទួលការប្រកួត និងទាំងការទទួលទស្សនិកជនរាប់លាននាក់ ដែលមកពីទូទាំងប្រទេសបារាំង និងមកពីទូទាំងតំបន់អឺរ៉ុបទាំងមូល។
ក៏ប៉ុន្តែ បារាំងគឺជាប្រទេសដែលធ្លាប់ធ្វើជាម្ចាស់ផ្ទះរៀបចំការប្រកួតធំៗបែបនេះជាច្រើនលើករួចមកហើយ ហេដ្ឋារចនាសម្ព័ន្ធកីឡាក៏មានស្រាប់មិនតិចនោះដែរ។ ដូច្នេះ ការចំណាយទៅលើការសាងសង់ ឬកែលម្អរចនាសម្ព័ន្ធកីឡានេះ មិនសូវជាមានទំហំធំធេង ដូចជាការធ្វើជាម្ចាស់ផ្ទះដំបូងនោះទេ ហើយលើសពីនេះទៅទៀត ការចំណាយទាំងនេះ ត្រូវទទួលរ៉ាប់រងមួយផ្នែកដោយសហព័ន្ធកីឡាបាល់ទាត់អឺរ៉ុប ហៅកាត់ថា UEFA។
រីឯផលចំណេញដែលបារាំងអាចទទួលបានពីការប្រកួតរយៈពេលមួយខែនេះ គឺមានច្រើន ទាំងប្រាក់ចំណូលដែលបានពីការប្រកួតដោយផ្ទាល់ រួមមានដូចជាការលក់សំបុត្រ និងការលក់សិទ្ធិផ្សាយបន្តផ្ទាល់ទៅឲ្យទូរទស្សន៍ និងទាំងផលចំណេញផ្នែកសេដ្ឋកិច្ច ដែលទាញយកបានពីការចំណាយនៅក្នុងដំណាក់កាលរៀបចំការប្រកួត និងក្នុងអំឡុងពេលប្រកួត។
គេមិនត្រូវភ្លេចទេថា ទស្សនិកជនរាប់លាននាក់ដែលធ្វើដំណើរមកក្នុងប្រទេសបារាំង ដើម្បីទស្សនាការប្រកួតនេះ គឺត្រូវចំណាយលុយទៅលើការធ្វើដំណើរ ហូបចុក និងស្នាក់នៅ ហើយវាជាការចំណាយដែលអាចមានប្រយោជន៍ដល់សេដ្ឋកិច្ចជាតិបារាំង ទាំងក្នុងរូបភាពជាការចំណូលពន្ធដល់រដ្ឋ ទាំងក្នុងរូបភាពជាការបង្កើនប្រាក់ចំណូលដល់ពាណិជ្ជករ និងសហគ្រាសបារាំង និងការបង្កើតការងារដល់ប្រជាជនបារាំង។
យោងតាមការសិក្សារបស់វិទ្យាស្ថានមួយជំនាញខាងសេដ្ឋកិច្ចនៃកីឡា គេធ្វើការប៉ាន់ស្មានជារួមថា ផលចំណេញខាងផ្នែកសេដ្ឋកិច្ច ដែលបារាំងអាចទាញយកបានពីការប្រកួតកីឡាបាល់ទាត់ដណ្តើមពានរង្វាន់អឺរ៉ុបនៅពេលនេះ បើគិតជាទឹកប្រាក់ គឺអាចមានប្រមាណជា ១ពាន់៣រយលានអឺរ៉ូ។ ក៏ប៉ុន្តែ នេះគេនៅមិនទាន់ទូទាត់នៅឡើយទេ ជាមួយនឹងការខាតបង់ជាយថាហេតុ ដែលអាចកើតមានឡើង ដោយសារតែសកម្មភាពបាតុកម្ម និងកូដកម្ម ដែលកំពុងតែកើតមាននៅក្នុងពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ