បទឈប់បាញ់ថ្មី៧២ម៉ោង ចូលជាធរមាននៅហ្កាហ្សា
អ៊ីស្រាអែលនិងក្រុមហាម៉ាសបានយល់ព្រមអោយមានបទឈប់បាញ់ថ្មីមួយទៀត នៅតំបន់ហ្កាហ្សា សម្រាប់រយៈពេល៧២ម៉ោង។ បទឈប់បាញ់បានចូលជាធរមាន ចាប់ពីអាធ្រាត ថ្ងៃអាទិត្យម្សិលមិញ។ ភាគីទាំង២ដែលមើលទៅ ហាក់គោរពបទឈប់បាញ់ថ្មីនេះ បានល្អ បានព្រមព្រៀងគ្នាកាលពីថ្ងៃអាទិត្យចូលចរចាគ្នា នៅអេហ្ស៊ីប ដើម្បីសម្រេចអោយមានបទឈប់បាញ់យូរអង្វែង នៅហ្កាហ្សា។ នៅថ្ងៃចន្ទនេះ ក្រុមអ្នកចរចាអ៊ីស្រាអែល បានធ្វើដំណើរមកដល់ក្រុងគែរហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
តាំងពីបទឈប់បាញ់ថ្មី៧២ម៉ោង ចូលជាធរមាននៅអាធ្រាតថ្ងៃអាទិត្យ ឈានចូលព្រឹកថ្ងៃចន្ទនេះ គេមិនបានឃើញគ្រាប់រ៉ុកកែតណាមួយផ្លោងចេញពីក្រុងហ្កាហ្សា ទៅលើទឹកដីអ៊ីស្រាអែលទេ។ ហើយកងទ័ពអ៊ីស្រាអែលវិញ ក៏មិនបានធ្វើសកម្មភាពយោធាអ្វីដែរ។ ពេលនេះ ក្រុមហាម៉ាសប៉ាឡេស្ទីន និងអ៊ីស្រាអែល ត្រូវចរចាគ្នាប្រយោល ក្រោមអន្តរាគមន៍របស់អាជ្ញាធរអេហ្ស៊ីប នៅក្រុងគែរ ដើម្បីធ្វើអោយបទឈប់បាញ់ថ្មីនេះ ស្ថិតស្ថេរយូរអង្វែងទៅមុខ។
អ៊ីស្រាអែលបានព្រមានដាក់លក្ខខណ្ឌជាមុនថា ការចូលរួមចរចាជាមួយប៉ាឡេស្ទីននេះ គឺត្រូវតែធ្វើឡើង ក្រោមបទឈប់បាញ់ ពោលគឺក្រុមហាម៉ាសមិនត្រូវបង្កហិង្សា ពេលកំពុងមានកិច្ចចរចានេះទេ។ ចំណែកភាគីហាម៉ាសវិញ បានរំលឹកឡើងវិញថា បទឈប់បាញ់អាចស្ថិតស្ថេរយូរអង្វែងបាន លុះត្រាអ៊ីស្រាអែលឈប់បិទខ្ទប់តំបន់ហ្កាហ្សាតទៅទៀត។ ទោះជាបទឈប់បាញ់ពេលនេះ ហាក់ត្រូវបានគោរពក្តី លោកយូវ៉ាល់ ស្តីនីត ជារដ្ឋមន្ត្រីអ៊ីស្រាអែលទទួលបន្ទុកផ្នែកចារកិច្ច បានសុំអោយមានការប្រុងប្រយ័ត្ន។ លោកស្តីនីតបានបង្ហាញជំហរចង់ឈ្នះរបស់អ៊ីស្រាអែលថា ក្រោយពេលអ៊ីស្រាអែលឈ្នះលើក្រុមហាម៉ាសផ្នែកយោធានៅហ្កាហ្សា ពេលនេះ អ៊ីស្រាអែលក៏ត្រូវតែទទួលជោគជ័យផ្នែកចរចានយោបាយជាមួយក្រុមហាម៉ាសដែរ។
គួររំលឹកថា មុនពេលបទឈប់បាញ់៧២ម៉ោង ចូលធរមានព្រឹកថ្ងៃចន្ទនេះ បទឈប់បាញ់មុនដែលផុតកំណត់កាលពីថ្ងៃសុក្រ គ្មានអត្ថន័យជាក់ស្តែងទេ។ ក្រោយបទឈប់បាញ់ផុតកំណត់កាលពីថ្ងៃសុក្រភ្លាម អ៊ីស្រាអែលនិងក្រុមហាម៉ាសបានបន្តប្រយុទ្ធគ្នា និងបានចោទគ្នារៀងៗខ្លួនថា រំលោភបទឈប់បាញ់។ អ៊ីស្រាអែលចោទក្រុមហាម៉ាសថា ផ្លោងរ៉ុកកែតចូលទឹកដីខ្លួន ខណៈក្រុមហាម៉ាសចោទអ៊ីស្រាអែលវិញថា នៅតែបិទខ្ទប់តំបន់ហ្កាហ្សា ផ្ទុយពីសំណូមពរប៉ាឡេស្ទីន។
ប្រតិបត្តិការយោធាអ៊ីស្រាអែលកំចាត់ក្រុមហាម៉ាស និងកំទេចរូងដីប៉ាឡេស្ទីននៅហ្កាហ្សា តាំងពីដើមខែកក្កដា បានសម្លាប់មនុស្សជិត២០០០នាក់ ភាគច្រើនជាជនស៊ីវិលប៉ាឡេស្ទីន។ ក្នុងនោះ មានកុមារប៉ាឡេស្ទីន៤៤៧នាក់។ អ៊ីស្រាអែលវិញបានបាត់បង់កងទ័ពខ្លួន៦៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ