ក្រុមហាម៉ាសបាញ់គ្រាប់រ៉ុកកែតដាក់អ៊ីស្រាអែល បន្ទាប់ពីបទឈប់បាញ់ត្រូវចប់នៅថ្ងៃសុក្រ
នៅថ្ងៃសុក្រទី ៨ សីហា គឺនៅប៉ុន្មាននាទីបទឈប់បាញ់មនុស្សធម៌រយៈពេលបីថ្ងៃ បានចូលដល់ទីបញ្ចប់ ក្រុមហាម៉ាសបានបាញ់រ៉ុកកែត ផ្លោងដាក់ទឹកដីភាគខាងត្បូងអ៊ីស្រាអែល ដោយមិនបានបណ្តាលឲ្យមានការខូចខាត និងសម្លាប់ជីវិតមនុស្ស។ នៅប៉ុន្មានម៉ោងក្រោយ នាយករដ្ឋមន្រ្តីអ៊ីស្រាអែលបានបញ្ជាឲ្យប្រយុទ្ធតបវិញ ដោយទ័ពជើងអាកាសអ៊ីស្រាអែលបានបើកការវាយប្រហារទៅលើទីក្រុងហ្កាហ្សា និងភាគកណ្តាលរបស់តំបន់ហ្កាហ្សា។
ចុះផ្សាយនៅថ្ងៃ៖
ស្តាប់ - ០១:៥០
កងទ័ពអាកាសអ៊ីស្រាអែលបានវាយតបវិញនឹងការបាញ់គ្រាប់រ៉ុកកែតរបស់ក្រុមហាម៉ាសនៅព្រឹកថ្ងៃសុក្រ។ តាមសេចក្តីថ្លែងការណ៍របស់ក្រសួងការពារជាតិអ៊ីស្រាអែល អ៊ីស្រាអែលបានបាញ់ប្រហារទៅលើទីតាំងរបស់ក្រុមភេរវករ នៅក្នុងទីក្រុងហ្កាហ្សា។ កងទ័ពអ៊ីស្រាអែលបានវាយតម្លៃថា មានគ្រាប់រ៉ុកកែតជាង១០គ្រាប់បាញ់ចូលទឹកដីអ៊ីស្រាអែលនៅក្រោយម៉ោង៨ព្រឹក គឺនៅប៉ុន្មាននាទីក្រោយ បទឈប់បាញ់មនុស្សធម៌បានឈានដល់ទីបញ្ចប់។
ក្រុមជីហាតអ៊ីស្លាម ដែលជាសម្ព័ន្ធមិត្តរបស់ក្រុមហាម៉ាស នៅតំបន់ហ្កាហ្សាបានប្រកាសថា ខ្លួនបានបាញ់គ្រាប់រ៉ុកកែតបីគ្រាប់សំដៅអ៊ីស្រាអែល។ ក្រុមហាម៉ាស និងក្រុមជីហាតចាប់ផ្តើមបាញ់រ៉ុកកែតដាក់អ៊ីស្រាអែល បន្ទាប់ពីក្រុមទាំងពីរនេះបានបដិសេធ មិនព្រមពន្យារពេលបទឈប់បាញ់ដែលត្រូវចប់នៅថ្ងៃសុក្រនេះ។
កាលពីថ្ងៃព្រហស្បតិ៍ នៅទីក្រុងគែរ ប្រទេសអេហ្ស៊ីប ជាទីដែលក្រុមហាម៉ាស និងអ៊ីស្រាអែល ត្រូវចរចាដើម្បីបង្កើតបទឈប់បាញ់យូរអង្វែងនៅតំបន់ហ្កាហ្សា ក្រុមហាម៉ាសបានប្រកាសមិនព្រមបន្តបទឈប់បាញ់ និងបានចោទប្រកាន់អ៊ីស្រាអែលថា មិនបានឆ្លើយតបទៅនឹងការទាមទាររបស់ពួកគេ។ ក្រុមហាម៉ាសបានទាមទារដាច់ខាតឲ្យអ៊ីស្រាអែលដកចំណាត់ការបិទខ្ទប់ទៅលើតំបន់ហ្កាហ្សា ប៉ុន្តែ អ៊ីស្រាអែលបដិសេធ មិនព្រម ដោយខ្លាចថា បើសិនគេលែងបិទខ្ទប់ទៅលើតំបន់ហ្កាហ្សា នោះក្រុមហាម៉ាសនឹងអាចបំពាក់អាវុធ ដែលគំរាមដល់សន្តិសុខអ៊ីស្រាអែល។
ការវាយប្រហារដាក់គ្នាទៅវិញ ទៅមក ជាថ្មីបានពន្លត់ក្តីសង្ឃឹមរកភាពស្ងប់ស្ងាត់ សន្តិភាពនៅតំបន់ហ្កាហ្សា។ នៅក្នុងបទសម្ភាសន៍ជាមួយទូរទស្សន៍ អាមេរិក Fox News កាលពីថ្ងៃព្រហស្បតិ៍ លោកនាយករដ្ឋមន្រ្តីអ៊ីស្រាអែល បិនចាមីន នេតានីញ៉ាហ៊ូ បាននិយាយថា លោកមិនច្បាស់ទេ ថា ការប្រយុទ្ធជាមួយក្រុមភេរវករនៅតំបន់ហ្កាហ្សានឹងអាចបញ្ចប់។ នោះគឺអាស្រ័យទៅលើក្រុមហាម៉ាស។ ក្រុមជីហាតដែលជាដៃគូរបស់ក្រុមហាម៉ាសប៉ាឡេស្ទីន បានអះអាងកាលពីថ្ងៃម្សិលមិញដែរថា ពួកគេបានត្រៀមខ្លួនរួចហើយ ដើម្បីត្រលប់ចូលសង្រ្គាមប្រយុទ្ធសាជាថ្មី។
គិតត្រឹមថ្ងៃសុក្រនេះ គឺមានរយៈពេលមួយខែត្រឹមដែលអ៊ីស្រាអែល និងក្រុមហាម៉ាសប្រយុទ្ធគ្នានៅក្នុងតំបន់ហ្កាហ្សាដោយបានសម្លាប់ជនស៊ីវិលប៉ាឡេស្ទីនជាង១៩០០នាក់។ នៅភាគីអ៊ីស្រាអែល ទាហាន៦៤នាក់បានស្លាប់ និងជនស៊ីវិល៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ