វិបត្តិនយោបាយក្រិក៖ ឱកាសចុងក្រោយក្នុងការបង្កើតរដ្ឋាភិបាល
ប្រធានាធិបតីក្រិកបានកោះប្រជុំគណបក្សធំៗទាំង៣ នៅថ្ងៃអាទិត្យនេះ ដើម្បីស្វះស្វែងរកការសម្របសម្រួលគ្នា ក្នុងការបង្កើតរដ្ឋាភិបាល និងបញ្ចៀសវិបត្តិនយោបាយ។ នេះគឺជាឱកាសចុងក្រោយ។ ប្រសិនបើគណបក្សទាំង៣ មិនស្រុះស្រួលគ្នាបង្កើតរដ្ឋាភិបាលរួបរួមជាតិមួយទេ ក្រិកនឹងត្រូវរៀបចំបោះឆ្នោតសាជាថ្មីម្តងទៀត នៅខែមិថុនា។ វិបត្តិនយោបាយនេះអាចនឹងជំរុញឲ្យអឺរ៉ុបផ្អាកជំនួយដែលបានព្រមព្រៀងគ្នាជាមួយក្រិក។
ចុះផ្សាយនៅថ្ងៃ៖
ស្តាប់ - ០១:៤១
គណបក្សនយោបាយធំៗទាំង៣របស់ក្រិក គឺគណបក្សស្តាំនិយម “ប្រជាធិបតេយ្យថ្មី” (New Democracy) គណបក្សឆ្វេងនិយមជ្រុល Syriza និងគណបក្សសង្គមនិយម Pasok បានទទួលសំឡេងនាំមុខគេ ក្នុងការបោះឆ្នោតសភា កាលពីថ្ងៃទី៦ ឧសភា កន្លងទៅនេះ។ ក៏ប៉ុន្តែ មិនមានគណបក្សណាមួយទទួលបានសំឡេងគ្រប់គ្រាន់ ដើម្បីបង្កើតរដ្ឋាភិបាលតែម្នាក់ឯង។ គណបក្សទាំង៣នេះ បានប្តូរវេនគ្នាម្តងម្នាក់ ដើម្បីព្យាយាមរៀបចំរដ្ឋាភិបាលចម្រុះ ក៏ប៉ុន្តែ មិនបានជោគជ័យ។
ជាឱកាសចុងក្រោយ មុននឹងប្រកាសរៀបចំការបោះឆ្នោតសាជាថ្មី ប្រធានាធិបតីក្រិកបានកោះប្រជុំគណបក្សទាំង៣រួមគ្នា ដើម្បីព្យាយាមបង្កើតរដ្ឋាភិបាលរួបរួមជាតិបណ្តោះអាសន្នមួយ សម្រាប់រយៈពេល ២ឆ្នាំ ចៀសវាងកុំឲ្យវិបត្តិនយោបាយនេះអូសបន្លាយតទៅទៀត។
គួរបញ្ជាក់ថា ទាល់តែគណបក្សទាំង៣នេះស្រុះស្រួលគ្នា ទើបគេអាចរកសំឡេងគ្រប់គ្រាន់ ក្នុងរដ្ឋសភា ដើម្បីបង្កើតរដ្ឋាភិបាលបាន។ បើសិនជាមានតែគណបក្សណាមួយមិនចូលរួម រដ្ឋាភិបាលនឹងមិនអាចបង្កើតឡើងបានទេ។
បើតាមមើលទៅ គេមិនរំពឹងថា គណបក្សឆ្វេងនិយមជ្រុល (Syriza) នឹងសុខចិត្តចូលរួមបង្កើតរដ្ឋាភិបាលរួបរួមជាតិនេះទេ។ ម្យ៉ាង គណបក្ស Syriza ប្រឆាំងនឹងនយោបាយរបស់អឺរ៉ុប ដែលតម្រូវឲ្យក្រិកកាត់បន្ថយការចំណាយសាធារណៈ ជាថ្នូរនឹងជំនួយ។ ម្យ៉ាងទៀត យោងតាមការស្ទាបស្ទង់មតិថ្មីៗនេះ គណបក្ស Syriza អាចនឹងទទួលបានសំឡេងច្រើនជាងគេ ប្រសិនបើមានការបោះឆ្នោតម្តងទៀត នៅខែមិថុនាខាងមុខនេះ។
គណបក្សឆ្វេងនិយមជ្រុលក្រិក នៅតែបន្តដាក់លក្ខខណ្ឌយ៉ាងដាច់ណាត់ថា ពួកគេសុខចិត្តចូលរួមបង្កើតរដ្ឋាភិបាលចម្រុះ លុះត្រាតែរដ្ឋាភិបាលថ្មីនេះលុបកិច្ចព្រមព្រៀងជាមួយអឺរ៉ុប និងមូលនិធិរូបិយវត្ថុអន្តរជាតិ ជុំវិញការផ្តល់ជំនួយ ជាថ្នូរនឹងការកាត់បន្ថយការចំណាយ។ ចំណែកប្រមុខដឹកនាំអឺរ៉ុបវិញបាននាំគ្នាព្រមានថា ប្រសិនបើក្រិកមិនគោរពកិច្ចព្រមព្រៀងនេះទេ ក្រិកត្រូវតែចាកចេញពីតំបន់អឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ