ការកើតជីវិតលើភពផែនដី អាចមានយូរជាងពេលដែលយើងធ្លាប់ដឹង
អ្នកស្រាវជ្រាវបានរកឃើញហ្វូស៊ីលជាច្រើន នៅតំបន់ Groenland ជាហ្វូស៊ីលដែលមានអាយុយ៉ាងហោច៣ពាន់៧រយលានឆ្នាំ មកហើយ ពោលគឺមាន២២០លានឆ្នាំ លើសពីអាយុដុំថ្ម ដែលគេធ្លាប់រកឃើញកាលពីលើកមុន នៅអូស្ត្រាលី។ កំទេចហ្វូស៊ីលដែលរកឃើញថ្មីនេះ អាចជួយអោយគេសិក្សាស្វែងយល់ពីជីវិតលើភពព្រះអង្គារបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
យោងតាមអ្នកស្រាវជ្រាវអូស្ត្រាលី ហ្វូស៊ីលថ្មីៗដែលគេរកឃើញនៅតំបន់ Groenland អាចជាភស្តុតាងបញ្ជាក់ថា ការករកើតជីវិតលើភពផែនដីយើង អាចមានដំណើរការមកយូរយារណាស់ហើយ គឺអាចកើតមាន៣៧០០លានឆ្នាំ ហើយ។
គួររំលឹកថា ផែនដីយើងមានអាយុប្រមាណ៤៥០០លានឆ្នាំ។ បើជីវិតករកើតលើផែនដីពិតជាមាន៣៧០០ឆ្នាំហើយមែន នោះមានន័យថា វាករកើតប្រមាណតែ៨០០ឆ្នាំប៉ុណ្ណោះ ក្រោយផែនដីយើងចាប់កំណើតឡើង។
ហ្វូស៊ីលថ្មីៗដែលរកឃើញនៅGroenland នេះ មានប្រវែងពី១ទៅ៤សង់ទីម៉ែត្រ។ អ្នកស្រាវជ្រាវរកឃើញហ្វូស៊ីលទាំងនេះនៅជាប់ដុំថ្ម ក្រោយទឹកកកមួយផ្ទាំងបានរលាយ នៅប្រជុំភ្នំ Isua ភាគនិរតីតំបន់Groenland ។ ឃើញទ្រង់ទ្រាយវា ធ្វើអោយគេគិតដល់ប្រភពជីវសាស្ត្រ ដែលជាសញ្ញានៃការកកើតជីវិតយ៉ាងរហ័ស លើផែនដី។
កន្លងមក អ្នកស្រាវជ្រាវអូស្ត្រាលីនិងកាណាដា ធ្លាប់រកឃើញដុំថ្មវ័យចំណាស់ ប្រមាណ៣៥០០លានឆ្នាំ នៅតំបន់ភីលបារ៉ា ប្រទេសអូស្ត្រាលី ធ្វើអោយគេគិតថា ជីវិតលើភពផែនដីអាចចាប់កំណើតពី៣៥០០លានឆ្នាំមុន។
បើហ្វូស៊ីលថ្មីៗនេះពិតជាអាចបញ្ជាក់ពីការកកើតជីវិតលើភពផែនដីយូរលង់មកហើយមែន វាក៏នឹងជួយដល់អ្នកស្រាវជ្រាវក្នុងការសិក្សាពីភពព្រះអង្គារដែរ។ ជំនាន់នោះ លក្ខខណ្ឌរឺស្ថានភាពផ្សេងៗ លើផែនដីយើង ស្រដៀងគ្នានឹងនៅភពព្រះអង្គារដែរ។ ដូច្នេះនៅភពព្រះអង្គារ ក៏ប្រហែលជាអាចមានការករកើតនិងរីកលូតលាស់នៃជីវិតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ