ឥណ្ឌាផ្តល់ជំនួយយោធា៥០០លានដុល្លារដល់វៀតណាមដែលកំពុងជាប់ជម្លោះជាមួយចិន
ឥណ្ឌាបានប្រកាសឲ្យដឹងនៅថ្ងៃសៅរ៍នេះថាខ្លួនបានផ្តល់ជំនួយចំនួន ៥០០លានដុល្លារអាមេរិក ទៅឲ្យវៀតណាម ដើម្បីចំណាយក្នុងវិស័យយោធា។ ការប្រកាសផ្តល់ជំនួយយោធានេះធ្វើឡើង នៅក្នុងពេលដែលវៀតណាមកំពុងតែប្រឈមមុខជាមួយនឹងចិន ក្នុងជម្លោះនៅសមុទ្រចិនខាងត្បូង ហើយឥណ្ឌាក៏កំពុងតែស្វះស្វែងរកដៃគូ ដើម្បីទប់ទល់នឹងឥទ្ធិពលរបស់ចិនផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ការផ្តល់ជំនួយយោធា ៥០០លានដុល្លារនេះ ត្រូវបានប្រកាសឲ្យដឹង ដោយលោកនាយករដ្ឋមន្រ្តី ណារិនដ្រា ម៉ូឌី ក្នុងឱកាសទស្សនកិច្ចនៅក្នុងប្រទេសវៀតណាម មុននឹងទៅចូលរួមក្នុងជំនួបកំពូល G20 នៅក្នុងប្រទេសចិន។ ដំណើរទស្សនកិច្ចដែលបានបិទបញ្ចប់ជាមួយនឹងការចុះកិច្ចព្រមព្រៀងជាច្រើន នៅក្នុងវិស័យបច្ចេកវិទ្យា សន្តិសុខតាមប្រព័ន្ធអ៊ីនធ័រនែត និងសុខាភិបាល។
លោកណារិនដ្រា ម៉ូឌី បានបញ្ជាក់ថា ជំនួយយោធាទៅឲ្យវៀតណាមនៅពេលនេះមានរូបភាពជាឥណទាន ហើយធ្វើឡើង ក្នុងគោលដៅរឹតបន្តឹងសហប្រតិបត្តិការទ្វេភាគី ក្នុងវិស័យការពារជាតិ។
រហូតមកទល់នឹងពេលនេះ ទាំងឥណ្ឌា និងទាំងវៀតណាម មិនបានបញ្ជាក់លម្អិតថាតើទឹកប្រាក់ ៥០០លានដុល្លារនេះនឹងត្រូវយកទៅចំណាយទៅលើអ្វីពិតប្រាកដនោះទេ។ ក៏ប៉ុន្តែ គេនៅចាំបានថា កាលពីឆ្នាំ២០១៤កន្លងទៅ ឥណ្ឌាក៏ធ្លាប់បានផ្តល់ជំនួយយោធាទៅឲ្យវៀតណាម ចំនួន ១០០លានដុល្លារ ម្តងរួចមកហើយដែរ ដើម្បីយកទៅទិញនាវាល្បាតដែនសមុទ្រ។
កិច្ចសហប្រតិបត្តិការក្នុងវិស័យយោធា ជាពិសេស ខាងទ័ពជើងទឹក រវាងឥណ្ឌា និងវៀតណាម ធ្លាប់ទទួលនូវការរិះគន់យ៉ាងខ្លាំង ពីសំណាក់ប្រទេសចិន ដែលកំពុងជាប់ជម្លោះជាមួយវៀតណាម នៅក្នុងសមុទ្រចិនខាងត្បូង។
ឥណ្ឌា ថ្វីដ្បិតតែមិនជាប់ជម្លោះដោយផ្ទាល់នៅក្នុងសមុទ្រចិនខាងត្បូង ក៏ប៉ុន្តែ ជម្លោះនេះអាចធ្វើឲ្យប៉ះពាល់ទៅដល់ផលប្រយោជន៍របស់ឥណ្ឌា ពីព្រោះថា រាល់ការដោះដូរពាណិជ្ជកម្មក្រៅប្រទេសរបស់ឥណ្ឌា មានប្រមាណជាពាក់កណ្តាលត្រូវដឹកជញ្ជូនឆ្លងកាត់សមុទ្រចិនខាងត្បូង។ លើសពីនេះទៅទៀត ឥណ្ឌានិងចិន ក៏មានជាប់ជម្លោះព្រំដែនជាមួយគ្នាដែរ គឺជម្លោះព្រំដែនគោក ដែលបានរាលដាលរហូតផ្ទុះជាសង្រ្គាម កាលពីឆ្នាំ១៩៦២។
ហេតុដូច្នេះហើយបានជាគេសង្កេតឃើញថា នៅក្នុងពេលបច្ចុប្បន្ននេះ ឥណ្ឌាកំពុងតែខិតខំពង្រឹងទំនាក់ទំនង ជាពិសេស នៅក្នុងវិស័យយោធាជាមួយវៀតណាម ក៏ដូចជា បណ្តាប្រទេសមួយចំនួនផ្សេងទៀតដែលជាគូប្រជែងរបស់ចិន រួមមានដូចជា ជប៉ុន និងសហរដ្ឋអាមេរិកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ