គ្រោះរញ្ជួយដី២ កំពុងដាស់ភ្នំភ្លើងនៅអ៊ីស្លង់
យោងតាមការប្រកាសរបស់អាជ្ញាធរប្រទេសអ៊ីស្លង់ ថ្ងៃអាទិត្យនេះ ការរញ្ជួយដីធំៗចំនួន២ កំពុងដាស់ភ្នំភ្លើងឈ្មោះថា Bardarbunga បាដាប៊ុនហ្កា ដែលកំពុងសំងំខ្លួននោះ។ ហេតុការណ៍នេះអាចធ្វើអោយភ្នំភ្លើងមួយនេះ អាចផ្ទុះបានក្នុងពេលឆាប់ៗ។ អាជ្ញាធរអ៊ីស្លង់បានប្រកាសអាសន្ន ចំពោះគ្រោះថ្នាក់នៃភ្នំភ្លើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
វិទ្យាស្ថានឧតុនិយមអ៊ីស្លង់បានចុះផ្សាយពីការរញ្ជួយដីធំចំនួន២ អាចធ្វើអោយភ្នំភ្លើងបាដាប៊ុនហ្កា ដែលសំងំខ្លួនតាំងពីថ្ងៃ១៦សីហាមកនោះ អាចផ្ទុះឡើង ក្នុងពេលឆាប់ៗបាន។ ការរញ្ជួយដីទាំង២នោះ មួយមានកម្រិតរិចទែរ ៥,៣ និងមួយទៀត កម្រិតរិចទែរ ៥,១។ កាលពីថ្ងៃសៅរ៍ ផ្នែកឧតុនិយមបានតម្លើងកម្រិតអាសន្នអតិបរមា ចំពោះភ្នំភ្លើងបាដាប៊ុនហ្កា ដែលសំងំខ្លួននៅក្រោមទឹកកក នៅភាគអាគ្នេយ៍ប្រទេសអ៊ីស្លង់។ អាជ្ញាធរអ៊ីស្លង់បានបិទដែនអាកាស ក្នុងតំបន់។
ភ្នំភ្លើង Bardarbunga អាចមានកំពស់ដល់២ពាន់ម៉ែត្រ។ យោងតាមអ្នកឯកទេស ភ្នំភ្លើង Bardarbunga អាចមានកម្លាំងខ្លាំង រាំងស្ទះចរាចរណ៍ផ្លូវអាកាស នៅភាគខាងជើងអឺរ៉ុប និងភាគខាងត្បូងអាត្លង់ទិក។ កំទេចភ្នំភ្លើងអាចបង្កការខូចខាតធ្ងន់ធ្ងរនៅអ៊ីស្លង់។ ទោះយ៉ាងនេះក្តី ផ្នែកឧតុនិយមអ៊ីស្លង់ ប្រាប់ថា នៅតែពិបាកនឹងសន្និដ្ឋានអោយជាក់ច្បាស់ថា គ្រោះរញ្ជួយដីទាំង២នេះ អាចនឹងជំរុញធ្វើអោយភ្នំភ្លើងបាដាប៊ុនហ្កាកាន់តែផ្ទុះបានឆាប់។
ក្នុងដើមសប្តាហ៍នេះ អាជ្ញាធរបានជម្លៀសអ្នកទេសចរ ពីតំបន់ជុំវិញភ្នំភ្លើង ស្ថិតនៅក្រោមតំបន់ទឹកកក Vatnajökull។ កាលពីថ្ងៃចន្ទ ក្រោយពេលផ្នែកឧតុនិយមរកឃើញសញ្ញារញ្ជួយដី កម្រិត៤,៥ រិចទែរ អាជ្ញាធរអ៊ីស្លង់បានដាក់កម្រិតអាសន្នភ្នំភ្លើងបាដាប៊ុនហ្កា ត្រឹមពណ៌ទឹកក្រូចប៉ុណ្ណោះ មុននឹងតម្លើងដល់កម្រិតអតិបរមាពណ៌ក្រហមពេលនេះ។
គួររំលឹកថា អ៊ីស្លង់ធ្លាប់ជួបគ្រោះផ្ទុះភ្នំភ្លើងធំគួរកត់សម្គាល់ កាលពីឆ្នាំ២០១០ ធ្វើអោយអាជ្ញាធរបិទដែនអាកាសនៅទ្វីបអឺរ៉ុប។ កាលណោះ តែក្នុងមួយខែប៉ុណ្ណោះ ភ្នំភ្លើងEyjafjallajökul បានធ្វើអោយអាជ្ញាធរលុបយន្តហោះហោះហើររហូតជាង១សែនជើង។ អ្នកដំណើរជាច្រើនបានជាប់ស្ទះដំណើរ នៅតាមអាកាសយានដ្ឋាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ