ជប៉ុនសម្រេចដាក់ទណ្ឌកម្មបន្ថែមលើអៀរ៉ង់ក្នុងសំណុំរឿងនុយក្លេអ៊ែរ
នៅថ្ងៃសុក្រ ទី៣ កញ្ញា ២០១០នេះ គណៈរដ្ឋមន្រ្តីជប៉ុនបានអនុម័តទណ្ឌកម្មថ្មីបន្ថែមទៀតលើអៀរ៉ង់ ជុំវិញកម្មវិធីនុយក្លេអ៊ែរ ដែលគេសង្ស័យថា មានគោលដៅផលិតអាវុធនុយក្លេអ៊ែរ។ ទណ្ឌកម្មថ្មីនេះ ជប៉ុនបានសម្រេចដាក់ក្នុងវិស័យហិរញ្ញវត្ថុផង និងវិស័យថាមពលផង បន្ថែមពីលើទណ្ឌកម្ម ដែលអនុម័តដោយក្រុមប្រឹក្សាសន្តិសុខអ.ស.ប.។
ចុះផ្សាយនៅថ្ងៃ៖
បទវិភាគរបស់ សេង ឌីណា
ជប៉ុនបានអនុម័តទណ្ឌកម្មលើអៀរ៉ង់ម្តងរួចមកហើយ កាលពីខែសីហា កន្លងទៅនេះ។ ទណ្ឌកម្មពេលនោះ ស្ថិតក្នុងវិធានការ ដែលមានចែងក្នុងសេចក្តីសម្រេចលេខ ១៩២៩ របស់ក្រុមប្រឹក្សាសន្តិសុខអ.ស.ប.។ ក៏ប៉ុន្តែ មន្រ្តីសហរដ្ឋអាមេរិកបានជំរុញឲ្យជប៉ុនបន្ថែមទណ្ឌកម្មឲ្យបានលើស ពីអ្វី ដែលមានចែងក្នុងសេចក្តីសម្រេចរបស់ក្រុមប្រឹក្សាសន្តិសុខ ដូចដែល អាមេរិក សហភាពអឺរ៉ុប កាណាដា និងអូស្រ្តាលី បានធ្វើរួចមកហើយ។ ហេតុដូច្នេះហើយ ទើបគណៈរដ្ឋមន្រ្តីជប៉ុនអនុម័តដាក់ទណ្ឌកម្មលើអៀរ៉ង់បន្ថែមទៀត នៅថ្ងៃសុក្រនេះ។
តាមរយៈទណ្ឌកម្មថ្មីនេះ ជប៉ុនសម្រេចផ្អឹបទ្រព្យសម្បត្តិរបស់បុគ្គល ព្រមទាំងក្រុមហ៊ុន អង្គការ និងស្ថាប័នរបស់អៀរ៉ង់ ចំនួនជាង ១០០ ដែលមានជាប់ពាក់ព័ន្ធនឹងកម្មវិធីនុយក្លេអ៊ែរអៀរ៉ង់។ ជនជាតិអៀរ៉ង់មួយចំនួន ដែលមានជាប់ពាក់ព័ន្ធនឹងកម្មវិធីនុយក្លេអ៊ែរនេះ ក៏ត្រូវជប៉ុនដាក់បញ្ចូលក្នុងបញ្ជីខ្មៅ ហាមមិនឲ្យធ្វើដំណើរទៅជប៉ុនដែរ។
ធនាគាររបស់អៀរ៉ង់ចំនួន ១៥ ត្រូវបានចាត់បញ្ចូលក្នុងបញ្ជីខ្មៅ ដែលក្រុមហ៊ុន និងធនាគារជប៉ុនមិនអាចរកស៊ីជាមួយ។ ការទិញសញ្ញាប័ណ្ណ (Bond) ចេញដោយធនាគារជាតិអៀរ៉ង់ ក៏ត្រូវហាមឃាត់ដែរ។
លើសពីនេះទៅទៀត រដ្ឋាភិបាលជប៉ុនបានហាមឃាត់ក្រុមហ៊ុនជប៉ុនទាំងអស់មិនឲ្យបោះទុន វិនិយោគរកស៊ីក្នុងវិស័យប្រេង និងឧស្ម័ន នៅអៀរ៉ង់។ បម្រាមនេះ មានសុពលភាពតែក្នុងករណីការបោះទុនវិនិយោគថ្មីៗប៉ុណ្ណោះ។ ចំណែកឯកិច្ចសន្យាវិនិយោគ ដែលបានចុះរួចទៅហើយ គឺមិនតម្រូវឲ្យលុបចេញវិញនោះទេ។
ទោះជាយ៉ាងណា ជប៉ុនមិនបានហាមឃាត់ការនាំប្រេងឆៅពីអៀរ៉ង់ចូលទៅជប៉ុននោះទេ។ បន្ទាប់ពីអារ៉ាប៊ី សាអ៊ូឌីត អារ៉ាប់រួម និងកាតា អៀរ៉ង់ គឺជាអ្នកផ្គត់ផ្គង់ប្រេងឆៅដ៏ធំមួយទៅឲ្យជប៉ុន។ បើទោះជាបានសម្រេចដាក់ទណ្ឌកម្មលើអៀរ៉ង់ក៏ដោយ ក៏ជប៉ុន នៅព្យាយាមរក្សាទំនាក់ទំនងជាមួយអៀរ៉ង់ឲ្យនៅល្អដែរ។
គួររំឭកថា កាលពីថ្ងៃទី១ កក្កដា កន្លងទៅ សហរដ្ឋអាមេរិកបានសម្រេចដាក់ទណ្ឌកម្មបន្ថែមលើអៀរ៉ង់ ជាឯកតោភាគី ក្រៅក្របខ័ណ្ឌនៃទណ្ឌកម្មអនុម័តដោយក្រុមប្រឹក្សាសន្តិសុខអ.ស.ប.។ សហភាពអឺរ៉ុប និងបណ្តាប្រទេសមួយចំនួនទៀត ដែលជាសម្ព័ន្ធមិត្តរបស់អាមេរិក រួមមាន កាណាដា និងអូស្រ្តាលី ជាដើម បានអនុម័តដាក់ទណ្ឌកម្មបន្ថែមលើអៀរ៉ង់ តាមអាមេរិក។ ជប៉ុន ដែលជាសម្ព័ន្ធមិត្តរបស់អាមេរិកនោះ ក៏ទទួលសម្ពាធឲ្យអនុម័តទណ្ឌកម្មថ្មីនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ