ចិន ជប៉ុន និងកូរ៉េខាងត្បូងយល់ព្រមបើកកិច្ចចរចាលើកិច្ចព្រមព្រៀងដោះដូរដោយសេរី
នៅថ្ងៃអង្គារ ទី២៦ មីនា ប្រទេសចិន ជប៉ុន និងកូរ៉េខាងត្បូងបានសន្យាបើកកិច្ចចរចាដើម្បីចុះហត្ថលេខាលើកិច្ចព្រមព្រៀងបង្កើតតំបន់ដោះដូរពាណិជ្ជកម្មដោយសេរីរវាងគ្នា។ កិច្ចព្រមព្រៀងនេះនឹងជួយសម្រួលឲ្យមហាអំណាចសេដ្ឋកិច្ចទំាង ៣ប្រទេសនៅអាស៊ីធ្វើការដោះដូរពាណិជ្ជកម្មរវាងគ្នាដោយមិនមានឧបសគ្គអ្វីទំាងអស់។ គួរជម្រាបជូនថា ផលិតផលសរុបក្នុងស្រុករបស់ប្រទេសទំាង ៣បូកបញ្ចូលគ្នាមានប្រមាណជា ២០% នៃផលិតផលសរុបក្នុងពិភពលោក។
ចុះផ្សាយនៅថ្ងៃ៖
ស្តាប់ - ០១:៥៧
គឺនៅក្នុងទីក្រុងសេអ៊ូល ប្រទេសកូរ៉េខាងត្បូង ដែលភាគីពាក់ព័ន្ធទំាង ៣បានសន្យាបើកកិច្ចចរចាដើម្បីចុះហត្ថលេខាលើកិច្ចព្រមព្រៀងបង្កើតតំបន់ដោះដូរពាណិជ្ជកម្មដោយសេរីរវាងគ្នា។ តែបើយោងតាមអ្នកការទូតជាន់ខ្ពស់កូរ៉េខាងត្បូងម្នាក់ឲ្យដឹងថា កិច្ចពិគ្រោះយោបល់ដំបូងនៅពេលនេះមានគោលដៅកំណត់ទីតំាង ប្រក្រតិទិន និងរបៀបវារៈនៃកិច្ចចរចានាពេលខាងមុខ។ ម្យ៉ាងទៀត ការផ្តើមឲ្យមានការលើកយកសំណុំរឿងនេះមកនិយាយជាថ្មីត្រូវបានធ្វើឡើង ចំពេលដែលប្រទេសទំាង ៣ទើបមានប្រមុខដឹកនំាថ្មីរៀងៗខ្លួន។ នាយករដ្ឋមន្រ្តីថ្មីនៅជប៉ុន និងកូរ៉េខាងត្បូង ព្រមទំាងប្រធានាធិបតី និងនាយករដ្ឋមន្រ្តីនៅប្រទេសចិន។
គួរជម្រាបជូនថា តាមពិតទៅ គម្រោងនៃការបង្កើតតំបន់ដោះដូរពាណិជ្ជកម្មដោយសេរីរវាងប្រទេសមហាអំណាចសេដ្ឋកិច្ចទំាង ៣នៅអាស៊ីមានតំាងពីជិត ១៥ឆ្នំាមកហើយ។ តែបញ្ហានៅត្រង់ថា ក្រៅពីមានមហិច្ឆតាសេដ្ឋកិច្ចរួមគ្នា ប្រទេសទំាង ៣ក៏មានជម្លោះដណ្តើមទីប្រជុំកោះរវាងផងដែរ។ ជប៉ុន និងចិនកំពុងប្រទាញប្រទង់ដំណ្តើមទីប្រជុំកោះសេនកាគុនៅក្នុងសមុទ្រចិនខាងកើត រីឯកូរ៉េខាងត្បូង និងជប៉ុនវិញក៏កំពុងឈ្លោះដណ្តើមកូនកោះតូចមួយរវាងគ្នាដែរ។ ទំាងនេះអាចជាហេតុផលដែលបញ្ជាក់ពីការអូសបន្លាយនៃកិច្ចចរចានៅក្នុងការបង្កើតតំបន់ដោះដូរពាណិជ្ជកម្មដោយសេរីរវាងគ្នា។
តែនៅពេលនេះ និងក្នុងនាមជាដៃគូពាណិជ្ជកម្មទីមួយជាមួយជប៉ុន និងកូរ៉េខាងត្បូង ចិនបានចេញមុខ និងកំពុងខ្នះខ្នែងយ៉ាងសកម្មដើម្បីសម្រេចឲ្យបានឆាប់រហ័សនូវគម្រោងនេះ។ ហេតុផលនោះគឺថា ទីក្រុងប៉េកំាងចង់ឆ្លើយតបទៅនឹងឥទ្ធិពលរបស់សហរដ្ឋអាមេរិកដែលមានកាន់តែខ្លំាងឡើងនៅក្នុងតំបន់ ពិសេសគឺប្រឆំាងនឹងគម្រោងរបស់ទីក្រុងវ៉ាស៊ីនតោននៅកិច្ចចរចាជាមួយក្រុមប្រទេសនៅជុំវិញមហាសមុទ្រប៉ាស៊ីហ្វិកដើម្បីបង្កើតមហាតំបន់ដោះដូរដោយសេរីមួយ។ នៅក្នុងកិច្ចចរចារវាងក្រុមប្រទេសនៃមហាសមុទ្រប៉ាស៊ីហ្វិក គឺគ្មានវត្តមានប្រទេសចិនទេ តែជប៉ុនបានប្រកាសពីបំណងចង់ចូលរួមរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ