ទាហានលីបង់ស្លាប់១៦នាក់ ក្នុងការប្រយុទ្ធជាមួយក្រុមជីហាតស៊ីរី នៅជាប់ព្រំដែនស៊ីរី
បញ្ហាសង្គ្រាមរ៉ាំរ៉ៃនៅស៊ីរីពេលនេះ បានរាលដាលដល់ព្រំដែនលីបង់ហើយ។ ថ្ងៃចន្ទ៤សីហានេះ នៅក្រុងអាអារសាល Aarsal នៅលីបង់ ជិតព្រំដែនស៊ីរី ទាហានលីបង់បានប្រយុទ្ធនឹងក្រុមជីហាតស៊ីរី ដែលចូលមកកាន់កាប់ក្រុងអាអាសាល របស់លីបង់ ជាក្រុងស្ថិតនៅជាប់ព្រំដែនស៊ីរី។ ទាហានលីបង់១៦នាក់ បានស្លាប់ ទាហាន១៣នាក់ទៀតបាត់ខ្លួន ហើយប៉ូលិស២០នាក់ប្រហែលកំពុងស្ថិតក្នុងកណ្តាប់ដៃក្រុមឧទ្ទាមស៊ីរី។ នេះជាលើកទី១ហើយ ដែលតំបន់ជាប់ព្រំដែនស៊ីរី បានរងការប្រយុទ្ធហិង្សាធ្ងន់ធ្ងរបែបនេះ គិតចាប់ពីស៊ីរីធ្លាក់ក្នុងវិបត្តិសង្គ្រាម ក្នុងខែមិនាឆ្នាំ២០១១មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
នៅថ្ងៃចន្ទនេះ កងទ័ពលីបង់បានបាញ់កាណុងកាំភ្លើង វាយប្រហារក្រុមជីហាតដែលលាក់ខ្លួន នៅតាមភ្នំតូចៗ ក្នុងតំបន់អាអាសាល់ ជិតព្រំដែនស៊ីរី។ តំបន់អាអាសាល់ ជាតំបន់អ្នកកាន់និកាយស៊ុននីត ស្ថិតនៅ១៣០គីឡូម៉ែត្រ ខាងជើងក្រុងបេរូត។ យោងតាមព័ត៌មានផ្តល់ដោយយោធាលីបង់ ក្រុមជីហាតបានវាយប្រហារទីតាំងយោធាលីបង់ច្រើនកន្លែង។
ការប្រយុទ្ធរវាងកងទ័ពលីបង់និងក្រុមជីហាតមកពីស៊ីរីនោះ បានកើតឡើងតាំងពីថ្ងៃសៅរ៍មកម្ល៉េះ បន្ទាប់ពីកងទ័ពលីបង់បានចាប់ខ្លួនមេក្រុមឧទ្ទាមអាល់ណូស្រា ជាប់ពាក់ព័ន្ធនឹងក្រុមអាល់កៃដា មួយរូប។ ប្រជាជនស៊ីរីដែលរត់ភៀសខ្លួនពីសង្គ្រាមស៊ីរី មកជ្រកនៅតំបន់អាអាសាល់ក្នុងទឹកដីលីបង់ រួមនឹងប្រជាជនលីបង់ បាននាំគ្នារត់ភៀសខ្លួនពីការប្រយុទ្ធរវាងកងទ័ពលីបង់និងក្រុមឧទ្ទាមស៊ីរី។
អ្នកវិភាគកំពុងបារម្ភថា សង្គ្រាមស៊ីរីអាចរាលដាលដល់លីបង់ ប្រសិនបើកងទ័ពលីបង់ហ៊ានលេងធ្ងន់ដៃជាមួយក្រុមជីហាតស៊ីរី។ គួរបញ្ជាក់ថា ក្នុងវិបត្តិសង្គ្រាមស៊ីរី លីបង់បានបង្ហាញជំហរថា មិនលូកដៃចូលឡើយ។ ប៉ុន្តែ យោងតាមភាពជាក់ស្តែង សង្គមលីបង់បែកបាក់គ្នា។ អ្នកកាន់និកាយស៊ុននីតភាគច្រើន បានគាំទ្រក្រុមឧទ្ទាមនិកាយស៊ុននីតនៅស៊ីរី ប្រឆាំងប្រធានាធិបតី អាសាដ។ ប៉ុន្តែ ក្រុមប្រយុទ្ធអេស្បូឡានិកាយស្ហ៊ីអ៊ីតវិញ បានគាំទ្ររបបដឹកនាំលោកអាសាដ ដែលកាន់និកាយអាឡាវីត ជានិកាយមួយផ្សេងទៀត។
យោងតាមអ្នកវិភាគ នៅតំបន់អាអាសាល់ ជាប់ព្រំដែនស៊ីរី ដែលរងការវាយប្រហារនៅថ្ងៃចន្ទនេះ បើកងទ័ពលីបង់បង្ហាញជំហរតឹងរ៉ឹងប្រឆាំងក្រុមជីហាត ហើយបើប្រជាជនកាន់និកាយស៊ុននីត សហការជួយក្រុមឧទ្ទាមស៊ីរីនិកាយស៊ុននីតដែរនោះ នោះលីបង់អាចនឹងជួបបញ្ហាធ្ងន់។ ដើម្បីចៀសវាងជម្លោះស៊ីរីរាលដាលដល់តំបន់ផ្សេងទៀត នៅលីបង់ ក្រុមអេស្បូឡាលីបង់ក៏មិនត្រូវលូកដៃចូលពាក់ព័ន្ធក្នុងការប្រយុទ្ធនឹងក្រុមជីហាតស៊ីរីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ