ក្រុមអ៊ីស្លាមជ្រុលនិយមដណ្តើមបានមូលដ្ឋានយោធាពិសេសក្រុងបិនហ្កាហ្ស៊ី
ការប្រយុទ្ធរវាងក្រុមប្រជែង នៅតែបន្តនៅប្រទេសលីប៊ី។ យោធាលីប៊ីបានប្រាប់នៅថ្ងៃអង្គារម្សិលមិញ ថាមូលដ្ឋានកងទ័ពពិសេសក្រុងបិនហ្កាហ្ស៊ី បានធ្លាក់ក្នុងកណ្តាប់ដៃក្រុមអ៊ីស្លាមជ្រុលនិយម ក្នុងនោះមានក្រុមអាន់សា អាស្ហារីយ៉ា ដែលអាមេរិកបានចាត់ទុកជាក្រុមភេរវជន។ មកដល់ថ្ងៃពុធនេះ គឺ៤ថ្ងៃហើយ ដែលក្រុងទ្រីប៉ូលីបន្តធ្លាក់ក្នុងការគំរាមកំហែងដោយអគ្គិភ័យ។ ការប្រយុទ្ធរវាងក្រុមប្រជែងក្នុងស្រុក នៅភាគខាងត្បូងក្រុងទ្រីប៉ូលី ជាង២សប្តាហ៍នេះ បានសម្លាប់មនុស្សជាង១០០នាក់ និងធ្វើអោយមនុស្ស៤០០នាក់ទៀតរងរបួស។ នៅក្រុងបិនហ្កាហ្ស៊ីវិញ តាំងពីថ្ងៃសៅរ៍មក ការប្រយុទ្ធបានសម្លាប់មនុស្សជាង៦០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ប្រទេសជាច្រើន មានអាមេរិក អង់គ្លេស ហូឡង់ កាណាដា រឺក៏ប៊ុលហ្ការី បានអំពាវនាវអោយពលរដ្ឋខ្លួនចាកចេញពីលីប៊ី យ៉ាងបន្ទាន់។ បារាំងបានជម្លៀសពលរដ្ឋខ្លួន ចេញពីលីប៊ី តាមផ្លូវទឹក ព្រោះថា ស្ថានភាពក្នុងស្រុក កំពុងស្ថិតក្នុងភាពច្របូកច្របល់។ ទីតាំងទ័ពពិសេសក្រុងបិនហ្កាហ្ស៊ី នៅភាគខាងកើតលីប៊ី បានធ្លាក់ក្រោមការកាន់កាប់របស់ក្រុមអ៊ីស្លាមជ្រុលនិយម ក្នុងនោះមានក្រុមក្រុមអាន់សា អាស្ហារីយ៉ា ដែលអាមេរិកចាត់ទុកថា ជាក្រុមភេរវជន។ សភាលីប៊ី កើតចេញពីការបោះឆ្នោតថ្ងៃ២៥មិថុនា ដែលត្រូវដាក់ទីតាំងនៅក្រុងបិនហ្កាហ្ស៊ី ពេលនេះ ពិបាកនឹងដំណើរការឡើងបាន ដោយសារហិង្សានៅបិនហ្កាហ្ស៊ី។
តាំងពីថ្ងៃ១៣កក្កដាមក នៅក្រុងទ្រីប៉ូលី និងក្រុងបិនហ្កាហ្ស៊ី ក្រុមប្រជែងក្នុងស្រុក បាន ដណ្តើមគ្នា កាន់កាប់អាកាសយានដ្ឋាន រឺក៏ទីតាំងប្រេង។ រ៉ុកកែតក្រុមប្រយុទ្ធបានបង្កជាភ្លើងឆេះឃ្លាំងប្រេង នៅក្រុងទ្រីប៉ូលី។ ៤ថ្ងៃមកនេះ អាជ្ញាធរមិនទាន់អាចបង្ក្រាបអគ្គិភ័យនេះនៅឡើយទេ។ អាជ្ញាធរកំពុងបារម្ភខ្លាចភ្លើង បង្កជាគ្រោះថ្នាក់ដល់ជីវិតមនុស្ស និងបរិស្ថាន។
ក្រោយបដិវត្តន៍ផ្តួលរបបលោកកាដាហ្វ៊ីនៅឆ្នាំ២០១១ បិទបញ្ចប់ទៅ អាជ្ញាធរថ្មីមិនទាន់មានសមត្ថភាពគ្រប់គ្រងក្រុមប្រយុទ្ធជាង១០ក្នុងស្រុកទេ។ ក្រុមប្រយុទ្ធទាំងនេះ សុទ្ធតែជាអតីតក្រុមបះបោរ ធ្លាប់ចូលរួមផ្តួលលោកកាដាហ្វ៊ី។ កងទ័ពនិងប៉ូលិសលីប៊ី មិនសូវជាបានទទួលការបណ្តុះបណ្តាល ដូច្នេះ ខ្វះលទ្ធភាពគ្រប់គ្រងស្ថិរភាពសន្តិសុខ។ ក្រុមប្រយុទ្ធមកពីក្រុងហ្សិនតិន ភាគខាងត្បូងក្រុងទ្រីប៉ូលី ជាក្រុមប្រយុទ្ធរបស់ចលនានយោបាយសេរីនិយម កំពុងកាន់កាប់អាកាសយានដ្ឋានអន្តរជាតិ និងទីតាំងយោធាច្រើនកន្លែង។ ក្រុមហ្សិនតិនប្រយុទ្ធប្រឈមនឹងក្រុមអ៊ីស្លាម និងក្រុមមកពីក្រុងមីស្រាតា មកពីភាគខាងកើតប្រទេស។
មូលហេតុអំពើហិង្សានៅលីប៊ី ប្រហែលដោយសារតែចលនានយោបាយសេរីនិយម អាចទទួលជោគជ័យខ្ពស់ លើចលនានយោបាយអ៊ីស្លាមនិយម ក្នុងការបោះឆ្នោតសភា ថ្ងៃ២៥មិថុនា កន្លងទៅ ដូច្នេះ ក្រុមនយោបាយអ៊ីស្លាមមិនសុខចិត្ត ក៏បង្កភាពច្របូកច្របល់ឡើង។ រដ្ឋអំណាចលីប៊ីបានសុំជំនួយពីបរទេសដែរ តែប្រទេសលោកខាងលិចបានដាក់លក្ខខណ្ឌអោយបញ្ចប់ហិង្សាជាមុនសិន។
ឆ្លៀតឱកាសពេលមានហិង្សាក្នុងស្រុកដូច្នេះ ជនអន្តោប្រវេសន៍ខុសច្បាប់រាប់រយនាក់ បានឡើងទូកព្យាយាមធ្វើដំណើរទៅទ្វីបអឺរ៉ុប។ ក្នុងសប្តាហ៍នេះ ជនអន្តោប្រវេសន៍ជាង២០នាក់ បានស្លាប់ក្នុងការលិចទូក ហើយជាង១០នាក់ទៀតបាត់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ