សភាលីប៊ីថ្មីបើកកិច្ចប្រជុំមិនផ្លូវការ ខណៈការប្រយុទ្ធហិង្សានៅបន្តកើតឡើង
នៅថ្ងៃសៅរ៍៣កក្កដានេះ សភាលីប៊ីថ្មីកើតចេញពីការបោះឆ្នោតថ្ងៃ២៥មិថុនា បានបើកកិច្ចប្រជុំដំបូង មិនផ្លូវការ នៅក្រុងតូប្រ៊ុក Tobrouk ភាគខាងកើតប្រទេស។ ភាពច្របូកច្របល់នៅតែបន្តមានក្នុងស្រុក។ ឃ្លាំងស្តុកប្រេងទី៤ នៅក្រុងទ្រីប៉ូលីបានឆេះ ដោយគ្រាប់រ៉ុកកែត របស់ក្រុមប្រយុទ្ធ។ ប្រទេសជាច្រើន ដូចជាចិន អង់គ្លេស រឺប៉ូឡូញ បានជម្លៀសពលរដ្ឋខ្លួនចេញពីលីប៊ី។ ទុយនីស៊ី ដែលស្ថិតជាប់ព្រំដែនជាមួយលីប៊ី កំពុងភ័យខ្លាចពីការហូរចូលនៃជនភៀសខ្លួន ក្នុងទឹកដីខ្លួន។ រហូតពេលនេះ ការប្រយុទ្ធរវាងក្រុមប្រជែងក្នុងស្រុក បានសម្លាប់មនុស្សជាង២០០នាក់ និងបង្ករបួសជិត១០០០នាក់។
ចុះផ្សាយនៅថ្ងៃ៖
ស្តាប់ - ០១:៤៨
កិច្ចប្រជុំរបស់សភាលីប៊ីថ្មី នៅក្រុងតូប្រ៊ុក ភាគខាងកើត ថ្ងៃសៅរ៍នេះ មិនមែនជាកិច្ចប្រជុំផ្លូវការទេ គ្រាន់តែជាកិច្ចប្រជុំផ្តល់យោបល់គ្នាប៉ុណ្ណោះ។ សភាលីប៊ីថ្មី កើតចេញពីការបោះឆ្នោតថ្ងៃ២៥មិថុនា ជាការបោះឆ្នោតផ្តល់ជោគជ័យអោយចលនានយោបាយសេរីនិយម ឈ្នះលើចលនានយោបាយអ៊ីស្លាមនិយម។ ប្រហែលដោយសារមូលហេតុនេះ ទើបក្រុមអ៊ីស្លាមជ្រុលនិយម មិនសុខចិត្ត បានបង្កភាពច្របូកច្របល់ឡើង។
ប៉ុន្តែ ក្នុងកិច្ចប្រជុំសភាមិនផ្លូវការនេះ មានវត្តមាននាយករដ្ឋមន្ត្រីអាប់ដាឡា អាល់ថេនី និងសមាជិកចលនាជាតិនិយមរបស់មហាសន្និបាតជាតិ ដូច្នេះ នេះជាកិច្ចប្រជុំមានរូបភាពបែបផ្លូវការដែរ។ គួរបញ្ជាក់ថា មហាសន្និបាតជាតិលីប៊ី សំបូរសមាជិកជាអ្នកអ៊ីស្លាមនិយម។
ស្របពេលមានកិច្ចប្រជុំសភា ការប្រយុទ្ធនៅតែបន្តមាន នៅក្រុងទ្រីប៉ូលី រវាងក្រុមអ៊ីស្លាមជ្រុលនិយម និងក្រុមប្រឆាំងចលនាអ៊ីស្លាម។ នៅក្រុងបិនហ្កាហ្ស៊ីវិញ កងកម្លាំងប្រដាប់អាវុធនៅតែបន្តវាយប្រហារជាមួយក្រុមអ៊ីស្លាមជ្រុលនិយមដដែល។ កាលពីថ្ងៃសុក្រ មនុស្ស២ពាន់នាក់ នៅបិនហ្កាហ្ស៊ី បាននាំគ្នាធ្វើបាតុកម្មប្រឆាំងក្រុមអ៊ីស្លាមជ្រុលនិយម និងអតីតក្រុមឧទ្ទាម ដែលបានដណ្តើមកាន់កាប់មូលដ្ឋានយោធាពិសេសនៅជាយក្រុង។ ក្រុមបាតុករបានបរិហារក្រុមជ្រុលនិយម និងសំដែងការគាំទ្រដល់កងទ័ពរដ្ឋាភិបាល។
ដោយឡែក នៅព្រំដែនរវាងលីប៊ីនិងទុយនីស៊ី មានជនបរទេសរាប់រយនាក់ បានព្យាយាមរត់គេចពីការប្រយុទ្ធក្នុងស្រុក ដើម្បីចូលទឹកដីទុយនីស៊ី ធ្វើអោយមានការប៉ះទង្គិចជាមួយកងកម្លាំងប៉ុស្តិ៍ព្រំដែន នៅរ៉ាស ចេដៀ។ យោងតាមក្រសួងមហាផ្ទៃទុយនីស៊ី មានមនុស្សប្រមាណ៦ពាន់នាក់ បានជាប់ខ្លួននៅប៉ុស្តិ៍ព្រំដែន រ៉ាស ចេដៀ ខាងប្រទេសលីប៊ី។
ទុយនីស៊ីអនុញ្ញាតអោយតែជនជាតិលីប៊ី និងទុយនីស៊ីដែលមានក្រដាសស្នាមស្របច្បាប់ចេញចូលតាមព្រំដែនខ្លួនប៉ុណ្ណោះ។ ទុយនីស៊ីមិនអនុញ្ញាតអោយជនបរទេសអារ៉ាប់ រឺអាស៊ីឆ្លងកាត់ទេ លើកលែងតែរដ្ឋាភិបាលប្រទេសអារ៉ាប់និងអាស៊ីទាំងនោះ រៀបចំអោយពលរដ្ឋពួកគេចាកចេញពីលីប៊ីប៉ុណ្ណោះ។ ទុយនីស៊ីកំពុងជួបបញ្ហាសេដ្ឋកិច្ចក្នុងស្រុក ដូច្នេះ ទុយនីស៊ីមិនចង់ជួបបញ្ហាបង្កឡើងដោយជនភៀសខ្លួនរាប់សែននាក់ ដូចក្នុងជំនាន់សង្គ្រាមផ្តួលរបបផ្តាច់ការរបស់លោកកាដាហ្វ៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ