រដ្ឋាភិបាលបារាំងទទួលស្គាល់បរាជ័យក្នុងការតាមដានភេរវជន
នៅថ្ងៃសុក្រ២៩កក្កដានេះ ក្នុងបទសម្ភាសន៍ជាមួយសារព័ត៌មាន Le Monde នាយករដ្ឋមន្ត្រីបារាំងបានទទួលស្គាល់ជាលើកដំបូងថា ការសម្រេចរបស់តុលាការកន្លងមក អោយដោះលែងភេរវជនម្នាក់ ដោយអោយរូបគេស្ថិតក្រោមការតាមដានដោយឧបករណ៍អេឡិចត្រូនិក គឺជាភាពបរាជ័យ។ ភេរវជនរូបនេះ បានធ្វើសកម្មភាពចាប់ចំណាប់ខ្មាំងនៅវិហារមួយ នៅភាគខាងជើងប្រទេសបារាំង ជាមួយភេរវជនម្នាក់ផ្សេងទៀត កាលពីថ្ងៃអង្គារ។ ពួកគេបានអារកសម្លាប់សង្ឃកាតូលិក ក្នុងវិហារនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
នេះជាលើកដំបូង ដែលរដ្ឋាភិបាលបារាំងទទួលស្គាល់បរាជ័យរបស់តុលាការ ក្នុងការតាមដានភេរវជន។ ការទទួលស្គាល់នេះធ្វើឡើង ខណៈរដ្ឋាភិបាលរងការចោទប្រកាន់ថា មានភាពធូររលុងផ្លូវច្បាប់។
ក្នុងចំណោមភេរវជនទាំង២រូបដែលបានធ្វើសកម្មភាពចាប់ចំណាប់ខ្មាំង នៅវិហារកាតូលិក ភាគខាងជើងប្រទេស កាលពីថ្ងៃអង្គារ ភេរវជនម្នាក់ត្រូវបានតុលាការសម្រេចដោះលែងអោយនៅក្រៅឃុំបណ្តោះអាសន្ន កាលពិខែមិនា។ ភេរវជនរូបនេះស្ថិតក្រោមការតាមដានដោយឧបករណ៍អេឡិចត្រូនិក។
ថ្ងៃព្រហស្បតិ៍ម្សិលមិញ វីដេអូរបស់ភេរវជនម្នាក់ទៀត ត្រូវបានទីភ្នាក់ងារព័ត៌មានAmaq យកមកចុះផ្សាយ។ ក្នុងវីដេអូនេះ ភេរវជនទី២នេះបានប្រើពាក្យពេចន៍គំរាមបារាំង និងគំរាមផ្ទាល់ដល់ប្រធានាធិបតីហូឡង់ និងនាយករដ្ឋមន្ត្រីវ៉ាល់ តែម្តង។
ភេរវជនទី២នេះ មិនដែលធ្លាប់ជាប់ទោសផ្លូវច្បាប់ទេ តែទើបតែត្រូវអាជ្ញាធរចុះឈ្មោះក្នុងបញ្ជីជនជ្រុលនិយម កាលពីចុងខែមិថុនាប៉ុណ្ណោះ។ គួររំលឹកថា ភេរវជនទាំង២រូប ដែលធ្វើសកម្មភាពចំណាប់ខ្មាំង និងអារកសង្ឃកាតូលិក កាលពីថ្ងៃអង្គារ សុទ្ធតែនៅក្មេងវ័យ អាយុ១៩ឆ្នាំ។
ក្រោយហេតុការណ៍ចាប់ចំណាប់ខ្មាំងកាលពីថ្ងៃអង្គារ បក្សស្តាំនិយមបារាំងរបស់អតីតប្រធានាធិបតីសាកូហ្ស៊ី បានទាមទារអោយរដ្ឋមន្ត្រីក្រសួងមហាផ្ទៃចុះពីតំណែង។ សម្រាប់នាយករដ្ឋមន្ត្រីម៉ានុយអែល វ៉ាល់ ទោះជារដ្ឋអាជ្ញាត្រូវកែប្រែរបៀបរបបធ្វើការខុសពីមុន បន្ទាប់ពីជួបបរាជ័យក្នុងការតាមដានភេរវជនក្តី ក៏គេមិនត្រូវធ្វើរហូតដល់ថ្នាក់ ចោទបង្ខំអោយតុលាការទទួលខុសត្រូវ ករណីមានភេរវកម្មកើតឡើងដែរ។
ពេលនេះ លោកម៉ានុយអែល វ៉ាល់ ចង់ចាត់វិធានការហាមឃាត់ការឧបត្ថម្ភប្រាក់មកពីបរទេស សម្រាប់ការសាងសង់វិហារអ៊ីស្លាម នៅបារាំង។ លើសពីនេះ នាយករដ្ឋមន្ត្រីបារាំងចង់អោយអ្នកដឹកនាំពិធីសូត្រធម៌អ៊ីស្លាម នៅបារាំង ទទួលការបណ្តុះបណ្តាលតែក្នុងស្រុកបារាំងប៉ុណ្ណោះ មិននៅប្រទេសណាផ្សេង ក្រៅពីបារាំងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ