លោកអូបាម៉ានិងមេដឹកនាំអាស៊ាននឹងត្រូវទទួលស្វាគមន៍ដោយពាក្យបណ្តឹងជាច្រើន
លោក បារ៉ាក់ អូបាម៉ា ប្រធានាធិបតីសហរដ្ឋអាមេរិក និងមេដឹកនាំអាស៊ានផ្សេងទៀតនឹងត្រូវទទួលស្វាគមន៍ដោយពាក្យបណ្តឹងជាច្រើននៅក្នុងប្រទេសកម្ពុជា ក្នុងខណៈពេលដែលពួកគេចូលរួមកិច្ចប្រជុំកំពូលអាស៊ានពីថ្ងៃទី១៥ដល់ថ្ងៃទី២០ខែវិច្ឆិកាខាងមុខនេះ។ ពាក្យបណ្តឹងទាំងនោះជារួមមាន៖ បញ្ហាដីធ្លី បញ្ហាលំនៅដ្ឋាន បញ្ហាសិទ្ធិមនុស្ស បញ្ហាការងារ បញ្ហាព្រៃឈើ។ល។
ចុះផ្សាយនៅថ្ងៃ៖
ស្តាប់ - ០១:៥៩
អង្គការសង្គមស៊ីវិលជាតិនិងអន្តរជាតិជាច្រើនគ្រោងនឹងដាក់ញត្តិជូនមេដឹកនាំកំពូលអាស៊ាន អាស៊ី និងមេដឹកនាំសហរដ្ឋអាមេរិក នៅក្នុងអំឡុងកិច្ចប្រជុំកំពូល នៅទីក្រុងភ្នំពេញ ពីថ្ងៃទី១៥ ដល់ថ្ងៃទី២០ ខែវិច្ឆិកា ខាងមុខនេះ។
នៅក្នុងកិច្ចប្រជុំកំពូលអាស៊ាននៅចុងសប្តាហ៍ក្រោយនេះ មេដឹកនាំអាស៊ាន មេដឹកនាំសហរដ្ឋអាមេរិក មេដឹកនាំប្រទេសមហាអំណាចចិន ព្រមទាំងមេដឹកនាំនៃប្រទេសដទៃទៀតគ្រោងនឹងជជែកគ្នាអំពីបញ្ហាបរិស្ថាន សន្តិសុខថាមពល បញ្ហាតំបន់ និងបញ្ហាសកលមួយចំនួនផ្សេងទៀត។ ប៉ុន្តែសម្រាប់អង្គការសង្គមស៊ីវិលជាតិនិងអន្តរជាតិនៅក្នុងប្រទេសកម្ពុជាវិញ ពួកគេនឹងឆ្លៀតឱកាសនេះដើម្បីថ្លាថ្លែងពីទុក្ខកង្វល់របស់ពួកគេ។
បញ្ហាដីធ្លី បញ្ហាលំនៅដ្ឋាន បញ្ហាដីសម្បទាន បញ្ហានេសាទ បញ្ហារំលោភសិទ្ធិមនុស្ស បញ្ហាចំណាកស្រុក គឺសុទ្ធសឹងជាបញ្ហាចម្បងៗ ដែលអង្គការសង្គមស៊ីវិលនឹងលើកឡើងជម្រាបប្រាប់មេដឹកនាំអាស៊ាន និងមេដឹកនាំមហាអំណាចពិភពលោក។
លោក អាត់ ធន់ ប្រធានសហភាពការងារកម្ពុជាបានបញ្ជាក់ប្រាប់នៅថ្ងៃសៅរ៍នេះថា វត្តមានរបស់លោក អូបាម៉ា ប្រធានាធិបតីសហរដ្ឋអាមេរិកនិងមេដឹកនាំអាស៊ាននៅពេលនេះគឺមានសារៈសំខាន់ណាស់ពីព្រោះវាអនុញ្ញាតអោយរូបលោកអាចលើកឡើងនូវកង្វល់ជាច្រើនជម្រាបប្រាប់ដល់ពួកគេ។
លោក អាត់ ធន់ បន្តបញ្ជាក់ទៀតថា លោកនឹងសរសេរលិខិតជម្រាបប្រាប់មេដឹកនាំអាស៊ានអំពីបញ្ហាពលករចំណាកស្រុកក្នុងចំណោមប្រទេសនៃសមាជិកអាស៊ាន។ ម៉្យាងវិញទៀត លោក អាត់ ធន់ នឹងជំរុញអោយមានការបង្កើតស្ថាប័នលេខាធិការដ្ឋានការងារមួយនៅក្នុងសមាគមអាស៊ាន ដើម្បីជួយពលករចំណាកស្រុកដែលជួបប្រទះបញ្ហា។
វត្តមានរបស់លោក បារ៉ាក់ អូបាម៉ា នៅក្នុងប្រទេសកម្ពុជាពិតជាមានសារៈសំខាន់ខ្លាំងណាស់ សំខាន់ទាំងបញ្ហាសិទ្ធិមនុស្ស និងទាំងបញ្ហាសេដ្ឋកិច្ច។ សហរដ្ឋអាមេរិកគឺជាប្រទេសដែលទិញទំនិញសម្លៀកបំពាក់ច្រើនជាងគេពីប្រទេសកម្ពុជាក្នុងរយៈពេលជាង១០ឆ្នាំចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ