កម្ពុជាផ្តើមសាងសង់ស្ពានអ្នកលឿងបម្រើដល់ផលប្រយោជន៍អាស៊ាន
នៅព្រឹកថ្ងៃអាទិត្យទី១២ខែកុម្ភៈនេះ កម្ពុជាបានបើកការដ្ឋានសាងសង់ស្ពានឆ្លងទន្លេមេគង្គ ដ៏ធំមួយទៀត ឈ្មោះ “ស្ពានមិត្តភាពកម្ពុជា-ជប៉ុន “ត្រង់ចំណុចអ្នកលឿង។ ស្ពានមិត្តភាព កម្ពុជា-ជប៉ុន កសាងក្នុងទឹកប្រាក់ប្រមាណ១០០ លានដុល្លារសហរដ្ឋអាមេរិក ជាជំនួយឥតសំណងរបស់ប្រទេសជប៉ុន ជាស្ពានទី២ ដែលជប៉ុន ជួយដល់កម្ពុជា។ ស្ពានអ្នកលឿង មិនមែនបម្រើអោយវិស័យគមនាគមន៍ សម្រាប់តែប្រជាពលរដ្ឋខ្មែរប៉ុណ្ណោះទេ ស្ពាននេះក៏ជាសរសៃឈាមសេដ្ឋកិច្ច របស់បណ្តាប្រទេសសមាជិកអាស៊ានផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អ៊ឹម ណាវិន ពីភ្នំពេញ
រយៈពេល៥១ខែទៅមុខទៀត ពោលគឺ នៅក្នុងខែមីនាឆ្នាំ២០១៥ កម្ពុជានឹងមានស្ពានឆ្លងកាត់ទន្លេមេគង្គមួយទៀត គឺស្ពានអ្នកលឿង ដែលមានឈ្មោះផ្លូវការថា “ស្ពានមិត្តភាពកម្ពុជា-ជប៉ុន” គឺជាស្ពានវែងជាងគេនៅកម្ពុជា សង់ក្នុងលក្ខណៈបច្ចេកទេសខ្ពស់ ប្រើខ្សែកាបរំយោល ចាប់ផ្តើមសាងសង់នៅព្រឹកថ្ងៃអាទិត្យ ទី១២ខែកុម្ភៈនេះ។
ស្ពានអ្នកលឿងមិនត្រឹមតែជាស្ពានសម្រាប់ការធ្វើដំណើររបស់ប្រជាពលរដ្ឋខ្មែរក្នុងស្រុកប៉ុណ្ណោះទេ តែស្ពាននេះក៏ជាបណ្តាញគមនាគមន៍យ៉ាងសំខាន់ ក្នុងក្របខ័ណ្ឌ តភ្ជាប់បណ្តាប្រទេសក្នុងអាស៊ាន និងអនុតំបន់ទន្លេមេគង្គផងដែរ។
ស្ពានអ្នកលឿងនឹងតភ្ជាប់ទីក្រុងសំខាន់ៗរបស់ប្រទេសសមាជិកអាស៊ានបី គឺទីក្រុងភ្នំពេញរបស់កម្ពុជា ទីក្រុងបាងកកប្រទេសថៃ និងទីក្រុងហូជីមិញ ប្រទេសវៀតណាម។ នេះបើតាមការបញ្ជាក់របស់លោកនាយករដ្ឋមន្រ្តីកម្ពុជា ហ៊ុន សែន។
ស្ពានអ្នកលឿងស្ថិតនៅលើផ្លូវជាតិលេខ១ ពីភ្នំពេញទៅខេត្តស្វាយរៀង ឆ្លងកាត់ខេត្តកណ្តាល និងខេត្តព្រៃវែង។
ស្ពានមិត្តភាពកម្ពុជា-ជប៉ុន ឬស្ពានអ្នកលឿងគ្រោងចំណាយថវិកាប្រមាណជិត ១០០លានដុល្លារអាមេរិក មានបណ្តោយ ប្រវែង២.២២០ម៉ែត្រ។ ស្ពាននេះគឺជាសមិទ្ធិផលទី២ នៃជំនួយជាស្ពានរបស់ប្រទេសជប៉ុន អោយកម្ពុជា។ ស្ពានទី១ជំនួយរបស់ជប៉ុន គឺស្ពានគីហ្ស៊ូណា ក្នុងខេត្តកំពង់ចាម សម្ពោធអោយប្រើប្រាស់ កាលពីឆ្នាំ២០០១។
នាយករដ្ឋមន្រ្តីកម្ពុជាថ្លែងក្នុងពិធីបើកការដ្ឋានសាងសង់ស្ពានអ្នកលឿង នៅព្រឹកថ្ងៃសៅរ៍ទី១២កុម្ភៈ ព្រឹកមិញថា ជប៉ុនជាប្រទេសផ្តល់ជំនួយដ៏ធំមួយដល់កម្ពុជា។តាមលោកនាយករដ្ឋមន្រ្តី មកដល់ពេលនេះ ជប៉ុនបានផ្តល់ជំនួយអោយកម្ពុជា ក្នុងទឹកប្រាក់ប្រមាណ ១ ៩០០ លានដុល្លារអាមេរិកហើយ។
លោកហ៊ុន សែន បន្តថា ពេលណាកម្ពុជាមានលំនឹងសេដ្ឋកិច្ច កម្ពុជានឹងឈប់ទទួលជំនួយពីជប៉ុន ពីព្រោះជប៉ុនត្រូវជួយដល់ប្រទេសផ្សេងច្រើនទៀត។ តែលោក ហ៊ុន សែន មិនបញ្ជាក់ថា ពេលណាកម្ពុជាឈប់ពឹងជំនួយបរទេសនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ