ការផ្អាកឈប់បាញ់នៅស៊ីរី បានផលវិជ្ជមាន តែនៅផុយស្រួយ
ជិតមួយសប្តាហ៍បន្ទាប់ពីបទឈប់បាញ់បណ្តោះអាសន្ន បានចូលជាធរមាននៅស៊ីរី យោងតាមក្រុមការងារសង្កេតការណ៍បទឈប់បាញ់នេះ ឃើញថាភាគីទាំងអស់បានគោរព អនុវត្តវាជាទូទៅ។ ចំនួនមនុស្សស្លាប់ មានការថយចុះ ឯក្រុមការងារមនុស្សធម៌ កំពុងព្យាយាមដឹកជំនួយស្បៀងអាហារ ទៅជួយប្រជាជនស៊ីរី ប្រមាណជាជាង៥លាននាក់ ដែលត្រូវហ៊ុំព័ទ្ធដោយសមរភូមិប្រយុទ្ធ។ ក៏ប៉ុន្តែការទម្លាក់អាវុធបណ្តោះអានស្ននេះ នៅតែមានភាពផុយស្រួយ ដដែល ព្រោះភាគីទាំងអស់ អាចចាប់យកអាវុធវិញ គ្រប់ពេលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
“សម្រាប់ពេលនេះ ស្ថានភាពនៅស៊ីរី អាចសរុបបានថា វានៅមានភាពផុយស្រួយ។ ជោគជ័យនៃបទឈប់បាញ់បណ្តោះអាសន្ន នៅមិនទាន់អាចធានាបាន១០០%ទេ។ ប៉ុន្តែយើងអាចសង្កេតឃើញនូវ ចំណុចប្រសើរមួយចំនួនធំ បើមិនជឿ សួរប្រជាជនស៊ីរីខ្លួនឯងចុះ!”។ នេះគឺជាប្រសាសន៍របស់លោក ស្តេហ្វាន ដឺមីស្ទូរ៉ា ប្រេសិតរបស់អង្គការសហប្រជាជាតិទទួលបន្ទុកកិច្ចការស៊ីរី ក្រោយពីបញ្ចប់កិច្ចប្រជុំជាមួយនឹងក្រុមការងារឃ្លាំមើលការទំលាក់អាវុធ។
លោកប្រេសិតពិសេសបានបន្តថា ធម្មតាទេ នៅក្នុងបទឈប់បាញ់បណ្តោះអាសន្នណាក៏ដោយ គឺមិនមានការដាក់អាវុធ ឈប់បាញ់ទាំងស្រុង១០០%ដែរ ពោលគឺតែងតែមានការបាញ់បោះត្រង់នេះបន្តិច ត្រង់នោះបន្តិចជារឿយៗ។ ជាក់ស្តែងនៅស៊ីរី ការប្រយុទ្ធតបតគ្នា នៅមានដោយកន្លែង ដូចជានៅក្បែរក្រុងដាម៉ាស តំបន់ហូមស៍ និងតំបន់ហាម៉ាជាដើម។ ប៉ុន្តែសរុបជារួម ការប្រយុទ្ធបាញ់បោះ ការទម្លាក់គ្រាប់បែក បានថយចុះគួរឲ្យកត់សម្គាល់ បន្ទាប់ពីបទឈប់បាញ់បានចូលជាធរមាននៅយប់ថៃ្ងសុក្រទី ២៦កុម្ភៈ។ ក្រុមការងារ ឃ្លាំមើលដំណើរការឈប់បាញ់ បានប្រជុំជាញឹកញាប់នៅក្រុងហ្សឺណែវ ដោយមានការទាមទារពីសំណាក់លោក ហ្សង់ម៉ាក អេរ៉ូ រដ្ឋមន្ត្រីការបរទេសបារាំង។
ជាការពិត បើយោងតាមតួលេខរបស់ក្រុមការងារឃ្លាំមើលសិទ្ធិមនុស្សនៅស៊ីរី បានឲ្យដឹងថា ចាប់តាំងពីការទម្លាក់អាវុធបណ្តោះអាសន្នបានចូលជាធរមាន ចំនួនអ្នកស្លាប់ដែលជាប្រជាជនស្លូតត្រង់ បានថយចុះយ៉ាងច្រើន។ កាលពីមុនមានបទឈប់បាញ់ ចំនួនប្រជាជនស្លូតត្រង់ស្លាប់ក្នុងមួយថ្ងៃៗប្រមាណជា ៣៨នាក់។ ប៉ុន្តែសរុបពេលមួយសប្តាហ៍បន្ទាប់ពីមានបទឈប់បាញ់ មានអ្នកស្លាប់តែ២៤នាក់ប៉ុណ្ណោះ។ ករណីថ្ងៃទី២៦ កុម្ភៈ មុនពេលបទឈប់បាញ់ចូលជាធរមានមួយថ្ងៃ គឺជាករណីពិសេស ព្រោះកងទ័ពរុស្ស៊ីបានសម្រុកទម្លាក់គ្រាប់បែក ដោយក្នុងថ្ងៃនោះមួយថ្ងៃ មានអ្នកស្លាប់ដល់ទៅ៦៨នាក់ ជាប្រជាជនស្លូតត្រង់។
យ៉ាងណាមិញកាលពីថ្ងៃពុធទី២មីនា អង្គការអូតង់ បានចោទប្រកាន់កងទ័ពរុស្ស៊ី ថាបានទម្លាក់គ្រាប់បែក លើប្រជាជនស៊ីរីស្លូតត្រង់ ហើយដោយសារតែគ្រាប់បែកទម្លាក់ឥតរើសមុខរបស់រុស្ស៊ីនេះហើយ ទើបប្រជាជនស៊ីរីរាប់លាននាក់ នាំគ្នារត់ចោលផ្ទះសម្បែង ទៅសុំសិទ្ធិជ្រកកោណនៅទ្វីបអឺរ៉ុប។ ដូចគ្នាដែរ កាលពីថ្ងៃព្រហស្បតិ៍ ទី៣ មីនា ប្រធានាធិបតីបារាំង និងលោកនាយករដ្ឋមន្ត្រីអង់គ្លេស បានព្រមព្រៀងគ្នា ធ្វើសេចក្តីអំពាវនាវរួមមួយ ដោយទទូចសុំឲ្យរុស្ស៊ីឈប់ធ្វើការទំលាក់គ្រាប់បែក ទៅលើក្រុមឧទ្ទាមកណ្តាលនិយម នៅស៊ីរីតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ