អាមេរិក និងរុស្ស៊ី អំពាវនាវឲ្យគ្រប់គ្នាគោរពការដាក់អាវុធបណ្តោះអាសន្ននៅស៊ីរី
ថ្វីបើស្ថានភាពនៅប្រទេសស៊ីរី នៅតែមិនទាន់ប្រសើរឡើងក្តី ក៏ប៉ុន្តែអ្វីៗហាក់កំពុងតែបត់ទៅរកច្រកចេញ ដោយសារមហាអំណាចពីរនាក់ សហរដ្ឋអាមេរិក និងរុស្ស៊ី បានអំពាវនាវជាថ្មីម្តងទៀត ឲ្យភាគីពាក់ព័ន្ធទាំងអស់ គោរពកិច្ចទម្លាក់អាវុធបណ្តោះអាសន្ន ដែលនឹងចូលជាធរមានចាប់ពីយប់ថ្ងៃសុក្រ នៅម៉ោង១២រំលងអាធ្រាត្រ។ ដោយឡែក កាលពីថ្ងៃពុធ ទី២៤កុម្ភៈ ក្រុមបេសកកម្មមនុស្សធម៌របស់អង្គការសហប្រជាជាតិ បានទំលាក់ស្បៀងអាហារចំនួន ២១តោនជាលើកតំបូង ប្រកបដោយជោគជ័យ ដើម្បីជួយសង្រ្គោះប្រជាជនស៊ីរី ដែលហ៊ុំព័ទ្ធដោយក្រុមជីហាដអង្គការរដ្ឋអ៊ីស្លាមនៅតំបន់ ដៀរ អេហ្ស ហ្ស័រ ភាគខាងកើតស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០១
កិច្ចសន្យាព្រមព្រៀងដាក់អាវុធ ដែលអាមេរិក និងរុស្ស៊ីបានព្រមព្រៀងគ្នានៅក្រុងមុយនិច ជាមួយនឹងប្រទេស១៥ផ្សេងទៀត ដែលមានជាប់ពាក់ព័ន្ធក្នុងវិបត្តិស៊ីរី តាមធម្មតា នឹងចូលជាធរមាននៅយប់ថ្ងៃសុក្រ ទី ២៦ កុម្ភៈនេះ នៅម៉ោង១២រំលងអាធ្រាត្រ។ កាលពីដើមសប្តាហ៍នេះ លោកអូបាម៉ា និងលោកពូទីន បានអះអាងរួមគ្នា អំពីឆន្ទៈរបស់មហាអំណាចទាំងពីរ ដែលចង់ឲ្យការដាក់អាវុធនេះ មានប្រសិទ្ធិភាព១០០%។ ការនេះអាចសម្រេចទៅបានទាល់តែភាគីទាំងអស់ នាំគ្នាគោរព។
ក្រុមសម្ព័ន្ធប្រឆាំងរដ្ឋាភិបាលបាស្ឆា ទទួលស្គាល់បទឈប់បាញ់៖
សួរថាតើភាគីណាខ្លះព្រម ភាគីណាមិនព្រម? ដូចយើងដឹងហើយថា មានភាគីច្រើនណាស់ ជាពិសេសគឺក្រុមចលនាតស៊ូ ដែលចែកបក្សពួកជាច្រើនក្រុម មានទីតាំងខុសៗគ្នា។ កាលពីថ្ងៃពុធ ទី ២៤កុម្ភៈនេះ ក្រុមគណកម្មាធិការជាន់ខ្ពស់ដើម្បីការចរចា ដែលជាបក្សសម្ព័ន្ធក្រុមប្រឆាំងនឹងរដ្ឋាភិបាលបាស្ឆា បានប្រកាសថាពួកគេសុខចិត្ត ទទួលយកការទម្លាក់អាវុធបណ្តោះអាសន្ននេះ។
អ្វីដែលពួកគេចង់បាន គឺការផ្អាកការបាញ់បោះ ក្នុងគោលការណ៍បណ្តោះអាសន្នរយៈពេល២សប្តាហ៍ ដើម្បីឲ្យមានការបើកផ្លូវ ដឹកជញ្ជូនស្បៀងទៅជួយប្រជាជនស៊ីរី។ ហើយចំណុចមួយទៀត ការផ្អាកឈប់បាញ់បណ្តោះអាសន្ននេះ ក៏ជាឱកាសមួយ ដើម្បីស្ទៀបស្ទង់មើល ពីភាពស្មោះត្រង់របស់ប្រធានាធិបតីបាស្ឆា ថាពិតជាចង់ស្វែងរកច្រកចេញដោយសន្តិវិធី រឺមួយយ៉ាងណា។ ក៏ប៉ុន្តែបើនិយាយឲ្យត្រង់ទៅ តាមពិតក្រុមឧទ្ទាមប្រឆាំង គ្មានជម្រើសអីផ្សេង ក្រៅពីគាំទ្រការទម្លាក់អាវុធទេ ព្រោះថានៅសមរភូមិពួកគេ បានវាយដកថយ បាត់បង់កម្លាំងច្រើនណាស់ ដោយសារតែចាញ់កងទ័ពរដ្ឋាភិបាលបាស្ឆា និងគ្រាប់បែករបស់រុស្ស៊ី។
បាស្ឆា សន្យាព្យាយាមគោរព៖
សម្រាប់ភាគីរដ្ឋាភិបាលបាស្ឆាវិញ ត្រូវបានខាងរុស្ស៊ីអះអាងថា លោកបាស្ឆា អាល់អាសាដ បានធានាជាមួយលោកប្រធានាធិបតីពូទីនរួចរាល់ហើយ ថាសុខចិត្តធ្វើគ្រប់យ៉ាង ដើម្បីគោរពការឈប់បាញ់បណ្តោះអាសន្ន។ ចំណែកកងទ័ពរុស្ស៊ីបានបញ្ជាក់ឲ្យដឹងនៅថ្ងៃព្រហស្បតិ៍នេះថា ខាងគេបានចាប់ផ្តើមចរចាទម្លាក់អាវុធ ជាមួយក្រុមកម្លាំងឧទ្ទាម នៅតំបន់៥ផ្សេងៗគ្នា មានតំបន់ Hama Homs Lattaquié Damas និង Deraa។
ក្រៅពីភាគីទាំងនេះ អារ៉ាប៊ីសាអូឌីត និងអ៊ីរ៉ង់ ក៏បានព្រមព្រៀងទទួលយកកិច្ចឈប់បាញ់បណ្តោះអាសន្ននេះដែរ បន្ទាប់ពីប្រធានាធិបតីពូទីន បានទូរស័ព្ទទៅបញ្ចុះបញ្ចូលម្តងមួយៗ។ ប៉ុន្តែសូមបញ្ជាក់ជាថ្មីម្តងទៀត ថាការទម្លាក់អាវុធបណ្តោះអាសន្ននេះ គឺមិនអនុវត្តជាមួយនឹងក្រុមជីហាដអង្គការរដ្ឋអ៊ីស្លាម និងក្រុមអាល់ន័រស្រា ដែលជាក្រុមអាល់កាយដាទេ។ ក្រុមទាំងពីរនេះ ជាក្រុមភេរវកម្ម ដូច្នេះ ការវាយប្រហារទៅលើក្រុមនេះនឹងនៅតែបន្តដដែល។
ផ្អាកឈប់បាញ់១០០% ទូទាំងស៊ីរី ជារឿងសុបិន្ត៖
ចំណុចដែលនៅតែជាមន្ទិលសង្ស័យ គឺថាទន្ទឹមនឹងការដាក់អាវុធត្រូវផ្អាកទូទាំងប្រទេស ក៏ប៉ុន្តែការប្រយុទ្ធប្រឆាំងជាមួយក្រុមជីហាដអង្គការរដ្ឋអ៊ីស្លាម និងក្រុមអាល់ន័រស្រា នៅតែបន្តដដែល។ មេទ័ពម្នាក់របស់កងទ័ពរដ្ឋាភិបាល បាស្ឆា បានបញ្ជាក់ឲ្យដឹងថា ទីក្រុងដារ៉ាយ៉ា ដែលធ្លាប់ជាមូលដ្ឋានធំមួយរបស់ក្រុមឧទ្ទាម នឹងមិនត្រូវចាត់បញ្ចូលក្នុងបទឈប់បាញ់នេះទេ ព្រោះនៅទីក្រុងនេះ មានក្រុមឧទ្ទាមអាល់ន័រស្រា បើទោះបីជាចំនួនកម្លាំងរបស់ក្រុមនេះនៅទីនោះមានតិចតួចក៏ដោយ ក៏កងកម្លាំងរដ្ឋាភិបាលស៊ីរី នឹងបន្តវាយកម្ទេចដដែល។
ក្រៅពីនេះ នៅមានតំបន់មួយចំនួន ដែលក្រុមឧទ្ទាមប្រឆាំងស៊ីរី មានទំនាក់ទំនងរួមកម្លាំងគ្នាជាមួយនឹងក្រុមឧទ្ទាមអាល់ន័រស្រា។ អញ្ចឹងកងទ័ពរដ្ឋាភិបាល អាចយកលេសនេះ បន្តវាយទៅលើក្រុមឧទ្ទាមប្រឆាំងបន្តទៀត។ ដូចគ្នាដែរ តួកគី ក៏នៅមិនទាន់បានសន្យាថា នឹងឈប់ទំលាក់គ្រាប់ទៅលើក្រុមឧទ្ទាមគួដទេ។
ធ្វើម្តេចតាមដានថា បទឈប់បាញ់ត្រូវគេគោរព?
សួរថាតើត្រូវមានយន្តការអី្វ ដើម្បីតាមដានបទឈប់បាញ់នេះ? តាមការឲ្យដឹង ពីលោកចន ឃែរី ក្រុមអ្នកជំនាញអាមេរិក និងរុស្ស៊ី នឹងជួបប្រជុំគ្នាក្នុងពេលដ៏ឆាប់ខាងមុខនេះ ដើម្បីបង្កើតក្រុមការងារពិសេសមួយ ដែលមានតួនាទីតាមដានឃ្លាំមើល ការគោរពបទឈប់បាញ់នេះ។
ឃ្លាំមើលដោយវិធីណា យើងនៅមិនទាន់ដឹងទេ។ ក៏ប៉ុន្តែអ្វីដែលអ្នកវិភាគយល់ថាចាំបាច់នាពេលនេះ គឺត្រូវកំណត់ឲ្យច្បាស់លាស់ ថាក្រុមណា ភាគីណាត្រូវគោរព ទីតាំងតំបន់ណាខ្លះដែលត្រូវគោរព។ ព្រោះថាបើនៅតែមានការប្រយុទ្ធនៅត្រង់នេះនៅត្រង់នោះ ដោយម្នាក់ៗអះអាងថាដោយសារមានវត្តមានក្រុមជីហាដ រឺក្រុមអាល់ន័រស្រា នោះមានន័យថា គ្មានការឈប់បាញ់បណ្តោះអាសន្នស្អីទេ។
លោក ចន ឃែរី គម្រាមថានឹងប្រើជម្រើសចុងក្រោយ៖
អ្វីដែលលោក ចន ឃែរី បានថ្លែងកាលពីពុធទី ២៤កុម្ភៈ គឺលោកសំដៅថា ការដាក់អាវុធត្រូវតែគោរព ហើយបន្ទាប់មកទៀត បាស្ឆា ត្រូវតែចូលតុចរចាដើម្បីដោះស្រាយវិបត្តិដោយសន្តិវិធី។ តែបើនៅតែបរាជ័យ គេនឹងប្រើជម្រើសទីពីរ។
តាំងពីដើមទីមក រដ្ឋាភិបាលលោកអូបាម៉ា ព្យាយាមដោះស្រាយបញ្ហាតាមរយៈការអំពាវនាវ ឲ្យភាគីទាំងអស់មកចរចាដោយសន្តិវិធី ខុសពីចំណាត់ការកាលពីជំនាន់ប្រធានាធិបតីប៊ូស ដែលចូលទៅប្រើកម្លាំងទ័ពវាយភ្លាមៗតែម្តង។ ក៏ប៉ុន្តែដល់ដំណាក់កាលនេះ អ្វីៗហាក់នៅតែជាប់គាំង។ ដូច្នេះហើយ បានជាគេគិតសង្ស័យថា លោកអូបាម៉ា អាចនឹងប្តូរយុទ្ធសាស្ត្រ លេងធម្មក្តៅម្តង តាមរយៈការប្រើកម្លាំងជាទ្រង់ទ្រាយធំ បើសិនការទម្លាក់អាវុធបណ្តោះអាសន្នជួបបរាជ័យ។
យកសង្រ្គាម ទៅបញ្ចប់សង្រ្គាម?
សម្រាប់ពេលនេះ អ្វីៗគ្រាន់តែជាការប៉ាន់ស្មានរបស់អ្នកវិភាគប៉ុណ្ណោះ។ តែលោកចន ឃែរី បានឆ្លើយទៅអ្នកកាសែតដែរថា នរណាដែលគិតចង់បំផ្លាញបទឈប់បាញ់បណ្តោះអាសន្ននេះ និងស្តាយក្រោយជាក់ជាមិនខាន។ អ្នកកាសែតសួរគាត់ទៀតថា ជម្រើសទីពីរនោះ មានពិតប្រាដកមែនរឺអត់? គាត់ឆ្លើយថា ចាំតែតាមដានមើលទៅ ក្នុងពេលខាងមុខ ថាវាមានមែនរឺក៏អត់។ សរុបទៅ យើងអាចសន្និដ្ឋានបានថា រដ្ឋាភិបាលលោកអូបាម៉ា អាចនឹងប្រើកម្លាំងជាទ្រង់ទ្រាយធំ ដោយប្រើទ័ពថ្មើរជើង ជាមួយសម្ព័ន្ធមិត្តផ្សេងទៀត ដើម្បីបញ្ចប់បញ្ហាស៊ីរី។ គឺមានន័យថា ដើម្បីបញ្ចប់សង្រ្គាម គឺត្រូវធ្វើសង្រ្គាម ដោយចៀសមិនរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ