ទាហានបាឆាអាល់អាសាដ ទម្លាក់គ្រាប់បែក សម្លាប់ប្រជាជន៧១នាក់នៅក្រុងអាឡឹប
កាលពីថ្ងៃសៅរ៍ ទី៣០ ឧសភា ទាហានបំរើរបបផ្តាច់ការស៊ីរី ដែលដឹកនាំដោយលោក បាឆា អាល់ អាសាដ បានទម្លាក់គ្រាំបែកទៅលើទីប្រជុំជន ក្នុងក្រុងអាឡឹប ដែលបានបង្កឲ្យមានប្រជាជនស្លូតត្រង់ស្លាប់ ចំនួន៧១នាក់ និងរបួសធ្ងន់ស្រាល ជាច្រើននាក់ផ្សេងទៀត។ បេសកជនអង្គការសហប្រជាជាតិ ក្នុងវិបត្តិស៊ីរី បានថ្កោលទោសរបបផ្តាច់ការស៊ីរី ហើយបានបរិហារថានេះ គឺជាការសម្លាប់រង្គៀល លើជនស្លូតត្រង់ យ៉ាងស្រស់ៗតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
៧១នាក់ នេះជាចំនួនអ្នកស្លាប់ដែលសុទ្ធសឹងតែប្រជាជនស្លូតត្រង់ ដែលបានស្លាប់ ដោយការទំលាក់គ្រាប់បែកក្នុងទីក្រុងអាឡឹប របស់ទាហានបាឆាអាល់ អាសាដ កាលពីថ្ងៃសៅរ៍ ទី៣០ឧសភា។ តាមការរាយការណ៍របស់ ទីភ្នាក់ងារសិទ្ធិមនុស្សប្រចាំនៅស៊ីរី បានបញ្ជាក់ថា ទាហានស៊ីរី បានជ្រើសរើសទីតាំងដែលជាទីប្រជុំជន និងចំពេលដែលមានមនុស្សអ៊ូរអរ ក្នុងសង្កាត់អាស់អាឆា នៅក្រុងអាឡឹប។ លោក Staffan de Mistura បានចោទដោយត្រង់ៗថា នេះគឺជាអំពើយង់ឃ្នងបំផុត ដែលអាចចាត់ទុកថាជាការសម្លាប់រង្គៀលលើជាតិសាសន៍ឯង ពីសំណាក់របបផ្តាច់ការរបស់បាឆា អាល់ អាសាដ។
យោងតាមក្រុមការងារសិទ្ធិមនុស្សរបស់អង្គការសហប្រជាជាតិ បានបញ្ជាក់ថា ទាហានបាឆា អាល់ អាសាដ បានជ្រើសរើសវាយប្រហារកាលពីថ្ងៃសៅរ៍ ទីមួយគឺក្រុងអាល់បាប ដែលស្ថិតក្នុងការគ្រប់គ្រងរបស់ក្រុមជីហាដ ហើយទីពីរគឺ សង្កាត់អាល់ឆា ក្នុងទីក្រុងអាឡឹប ដែលស្ថិតក្រោមការគ្រប់គ្រងរបស់ក្រុមប្រឆាំងបះបោរនឹងរបបស៊ីរី។
លោក Staffan de Mistura បានបន្ថែមថា នេះមិនមែនជាលើកទីមួយទេ ដែលក្រុមទាហានបាឆា អាល់ អាសាដ ធ្វើការសម្លាប់រង្គៀលលើប្រជាជនស្លូតត្រង់ ដោយការទម្លាក់គ្រាប់បែក។ គ្រាប់បែកដែលគេទម្លាក់ មិនមែនជាគ្រាប់បែកធម្មតាទេ តែជាធុងដែកដ៏ធំ ដែលផ្ទុកពេញ ទៅដោយគ្រាប់បែកឆ្នៃរ បង្កប់ដោយកម្ទេចដែកមុតស្រួច ធ្វើឲ្យមានអ្នកស្លាប់ និងរបួសច្រើន។ លោកបានអំពាវនាវ ឲ្យរបបផ្តាច់ការស៊ីរី បញ្ឈប់សកម្មភាពព្រៃផ្សៃនេះ ជាបន្ទាន់។ ក្នុងខណៈនេះដែរ លោកកំពុងតែវាយតម្លៃស្ថានការណ៍ ដើម្បីកំណត់ថា ត្រូវធ្វើអ្វីបន្តទៀត ដើម្បីឈានទៅរកការចរចា ស្វែងរកសន្តិភាពនៅស៊ីរី។
សូមបញ្ជាក់ផងដែរថា វិបតិ្តស៊ីរី បានអូសបន្លាយអស់រយៈពេល៤ឆ្នាំមកហើយ ក្រោយមានការបះបោះរបស់ប្រជាជន និងក្រុមប្រឆាំងជាច្រើនក្រុម ទល់នឹងអំណាចផ្តាច់ការរបស់បាឆា អាល់ អាសាដ។ តាំងពីឆ្នាំ២០១១មក វិបត្តិនេះ បានសម្លាប់ជីវិតមនុស្សប្រមាណជាជាង២សែននាក់ហើយ។ បញ្ហាកាន់តែស្មុគស្មាញ នៅពេលដែលក្រុមជីហាដអ៊ីស្លាម បានធ្វើការវាយដណ្តើម យកតំបន់សំខាន់ៗជាច្រើន ក្នុងដីស៊ីរី។ ចុងក្រោយនេះ ក្រុមជីហាដ ទើបបានសង្គ្រុបកាន់កាប់ក្រុងប្រវត្តិសាស្រ្តប៉ាល់មៀរ ហើយក៏បានដាក់គ្រាប់បែកបំផ្ទុះ ម្ទេចគុកដ៏ធំរបស់ក្រុងនេះដែរ។ គុកប៉ាល់មៀរនេះ ជានិម្មិតរូប និងជាភស្តុតាងនៃរបបផ្តាច់ការយង់ឃ្នង របស់បាឆា អាល់ អាសាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ