លោកខាងលិចទាមទារឲ្យពិន័យអ៊ីរ៉ង់ រឿងបាញ់កាំជ្រួចម៊ីស៊ីល
ប្រទេសមហាអំណាចលោកខាងលិច មានបារាំង អង់គ្លេស អាល្លឺម៉ង់ និងសហរដ្ឋអាមេរិក បានធ្វើការស្នើសុំទៅគណៈកម្មាធិការទណ្ឌកម្ម របស់អង្គការសហប្រជាជាតិឲ្យ ធ្វើការស៊ើបអង្កេត ឲ្យបានហ្មត់ចត់ ស្តីពីសកម្មភាព បាញ់សាកល្បងកំាជ្រួចម៊ីស៊ីល របស់អ៊ីរ៉ង់ នាពេលថ្មីៗនេះ។ តាមការប៉ាន់ស្ថាន ការបាញ់សាកល្បង កាំជ្រួចម៊ីស៊ីល របស់អ៊ីរ៉ង់ បានរំលោភទៅលើសេចក្តីសម្រេចចិត្ត លេខ១៩២៩ របស់អង្គការសហប្រជាជាតិ ដែលបានហាមឃាត់ អ៊ីរ៉ង់ មិនឲ្យប្រើប្រាស់ កាំជ្រួចធន់ធំ ដែលអាចផ្ទុកក្បាលគ្រាប់នុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
កិច្ចប្រជុំបិទទ្វារមួយ បានធ្វើឡើង នៅល្ងាចថ្ងៃពុធ ទី ២១ តុលា នាក្រុមប្រឹក្សាសន្តិសុខអង្គការសហប្រជាជាតិ តាមរយៈ ការទាមទាររបស់សហរដ្ឋអាមេរិក។ សហរដ្ឋអាមេរិក រួមជាមួយប្រទេសបីទៀត បារាំង អង់គ្លេស និងអាល្លឺម៉ង់ បានស្នើទៅគណៈកម្មាធិការទណ្ឌកម្ម នៃអង្គការសហប្រជាជាតិ ដើម្បីស៊ើបអង្កេត ពីសកម្មភាពបាញ់កាំជ្រួចម៊ីស៊ីល របស់អ៊ីរ៉ង់ កាលពីថ្ងៃទី ១១ តុលាកន្លងទៅថ្មីៗនេះ។
ប្រទេសមហាអំណាចទាំងបួន បានធ្វើលិខិតមួយរួមគ្នា ផ្តល់ទៅដល់សមាជិកក្រុមប្រឹក្សាសន្តិសុខទាំងអស់ដោយបានលើកឡើងថា ការបាញ់សាកល្បងកាំជ្រួចរបស់អ៊ីរ៉ង់ ជាការរំលោភបំពានយ៉ាងធ្ងន់ធ្ងរ ទៅលើមាត្រា៩ នៃសេចក្តីសម្រេចចិត្តលេខ ១៩២៩ របស់អង្គការសហប្រជាជាតិ ដែលបានចូលជាធរមានកាលពីឆ្នាំ២០១០។ ប្រទេសមហាអំណាចទាំងបួន បានទាមទារឲ្យក្រុមអ្នកជំនាញ របស់គណៈកម្មាធិការទណ្ឌកម្ម ធ្វើការស៊ើបអង្កេត ដើម្បីបង្ហាញឲ្យល្អិតល្អន់ ថាសកម្មភាពបាញ់បង្ហោះកាំជ្រួចម៊ីស៊ីល របស់អ៊ីរ៉ង់ ពិតជាត្រឹមត្រូវរឺក៏មិនមែន។
សូមបញ្ជាក់ថា អ៊ីរ៉ង់ បានបាញ់កាំជ្រួចសាកល្បង ដែលខាងគេបានអះអាងថា ជាកាំជ្រួចសាមញ្ញ ដែលប្រើប្រាស់ក្នុងការការពារខ្លួន ក៏ប៉ុន្តែមិនបានផ្តល់ព័ត៌មានលំអិតបន្ថែមទេ។ ក៏ប៉ុន្តែក្នុងលិខិត របស់ប្រទេសមហាអំណាចទាំងបួន បានសន្និដ្ឋានថា កាំជ្រួចដែលអ៊ីរ៉ង់ បានបាញ់ ជាកាំជ្រួច ប្រភេទបាលីស្ទីក (Missile balistique) ដែលអាចបំពាក់ដោយក្បាលគ្រាប់នុយក្លេអ៊ែរ។ ហើយដែលការបាញ់បង្ហោះអាវុធប្រភេទនេះ ត្រូវបានហាមឃាត់ ដោយជាក់ច្បាស់ ក្នុងមាត្រា៩ នៃសេចក្តីសម្រេចចិត្តលេខ ១៩២៩។
លោកស្រី សាម៉ាន់តា ផោវើ ប្រមុខការទូតអាមេរិកប្រចាំអង្គការសហប្រជាជាតិ បានអះអាងថា នេះគឺជាសកម្មភាពផ្គើន និងក្អេងក្អាងរបស់អ៊ីរ៉ង់ ហើយដែលវាអាចបង្ករអស្ថិរភាពក្នុងតំបន់ដើមបូព៌ា។ សហរដ្ឋអាមេរិក និងមហាអំណាចទាំងបីទៀត បានទាមទារ ឲ្យក្រុមប្រឹក្សាស៊ើបអង្កេត ធ្វើការប្រកាសលទ្ធផលស៊ើបអង្កេត ឲ្យបានឆាប់ជាទីបំផុត។
ប៉ុន្តែទោះជាយ៉ាងណាក៏ដោយ គេពិបាកសង្ឃឹមណាស់ថា អង្គការសហប្រជាជាតិ នឹងដាក់ទណ្ឌកម្មទៅលើអ៊ីរ៉ង់ ស្តីពីសកម្មភាពព្រហើននេះ ព្រោះថា ចិន និងរុស្ស៊ី ដែលជាសម្ព័ន្ធមិត្តរបស់អ៊ីរ៉ង់ ប្រាកដជានឹងមិនបោះឆ្នោតយល់ព្រមទេ។ មួយវិញទៀត កិច្ចព្រមព្រៀងស្តីពីការគ្រប់គ្រងកម្មវិធីនុយក្លេអ៊ែរអ៊ីរ៉ង់ ទើបតែបានចូលជាធរមាន ជាស្ថាពរ ដែលនេះគឺជាលទ្ធផល នៃការចរចា ដ៏ត្រដាបត្រដួស រាប់សិបឆ្នាំមកហើយ។ ដូច្នេះ គ្មាននរណាជឿទេ ថា មហាអំណាច លោកខាងលិច នឹងដាក់ទណ្ឌកម្មថ្មីបន្ថែម ទៅលើអ៊ីរ៉ង់ នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ