កងទ័ពអ៊ីរ៉ាក់បើកការវាយប្រហារដណ្តើមយកទីតាំងចុងក្រោយរបស់ពួកជីហាតនៅមូស៊ូល
កងទ័ពរដ្ឋាភិបាលអ៊ីរ៉ាក់ នៅថ្ងៃអាទិត្យទី ១៨មិថុនា បានបើកការប្រយុទ្ធ វាយប្រហារទៅលើក្រុងបុរាណ នៅទីក្រុងមូស៊ូល ដែលជាទីតាំងចុងក្រោយរបស់ពួកជីហាត អង្គការរដ្ឋអ៊ីស្លាម នៅក្នុងទឹកដីអ៊ីរ៉ាក់។ មន្រ្តីអង្គការសហប្រជាជាតិវិញ ព្រួយបារម្ភពីអាយុជីវិតរាប់ម៉ឺននាក់របស់ប្រជាជនស៊ីវិលអ៊ីរ៉ាក់ ដែលកំពុងនៅជាប់ក្នុងដៃ របស់ពួកជីហាតអង្គការរដ្ឋអ៊ីស្លាម ដែលមានគោលដៅយកប្រជាជនស៊ីវិលជាខែលបាំងការពារ ពីការវាយប្រហាររបស់កងទ័ពអ៊ីរ៉ាក់ គាំទ្រដោយសម្ព័ន្ធអន្តរជាតិ ដឹកនាំដោយអាមេរិក។
ចុះផ្សាយនៅថ្ងៃ៖
ទីក្រុងបុរាណ ដែលកងទ័ពអ៊ីរ៉ាក់បើកការវាយប្រហារ នៅថ្ងៃអាទិត្យនេះ គឺជាសំបុកទីតាំងចុងក្រោយរបស់ពួកជីហាត អង្គការរដ្ឋអ៊ីស្លាម នៅទីក្រុងមូស៊ូល។ តាំងពីខែតុលាឆ្នាំមុន ទីក្រុងមូស៊ូល ដែលបានធ្លាក់ទៅក្នុងដៃរបស់ពួកជីហាតអង្គការរដ្ឋអ៊ីស្លាមនៅឆ្នាំ ២០១៤ ត្រូវបានកងទ័ពរដ្ឋាភិបាលអ៊ីរ៉ាក់ ដែលមានជំនួយពីយន្តហោះចម្បាំងរបស់សម្ព័ន្ធអន្តរជាតិ ដឹកនាំដោយអាមេរិក វាយដណ្តើមយកបានមកវិញ ប្រមាណ៩០ភាគរយ។ ការវាយដណ្តើមយកក្រុងបុរាណ នៅថ្ងៃអាទិត្យនេះ គឺជាទិសដៅរបស់កងទ័ពរដ្ឋាភិបាល ដែលចង់ដណ្តើមបានទាំងស្រុងទីក្រុងមូស៊ូលពីដៃរបស់ក្រុមភេរវនិយម អង្គការរដ្ឋអ៊ីស្លាម។
បន្ទាប់ពីបរាជ័យជាបន្តបន្ទាប់ ក្រុមអង្គការរដ្ឋអ៊ីស្លាមបានរួញ មកប្រមូលផ្តុំនៅក្នុងក្រុងបុរាណ ដែលកំពុងឡោមព័ទ្ធដោយទាហានរដ្ឋាភិបាល។ ប៉ុន្តែ ការវាយដណ្តើមយកក្រុងបុរាណពីដៃពួកជីហាតអង្គការរដ្ឋអ៊ីស្លាមគឺជាបេសកកម្មដ៏លំបាក និងស្មុគស្មាញ ព្រោះថា ការវាយប្រហារទ្រង់ទ្រាយធំ ដោយប្រើរថក្រោះ និងគ្រាប់បែកផ្លោង នឹងអាចសម្លាប់ជីវិតប្រជាជនស៊ីវិល ដែលត្រូវបានពួកជីហាត ចាប់ជំរិត យកធ្វើជាខែល សម្រាប់បាំងពីការវាយប្រហាររបស់កងទ័ពអ៊ីរ៉ាក់។
អ្នកតំណាងឧត្តមស្នងការទទួលបន្ទុកជនភៀសខ្លួនរបស់អង្គការសហប្រជាជាតិវាយតម្លៃថា ប្រជាជនស៊ីវិលអ៊ីរ៉ាក់ ប្រមាណ ១សែននាក់ កំពុងស្ថិតនៅក្នុងក្រុងបុរាណ ដែលកាន់កាប់ដោយពួកជីហាតអង្គការរដ្ឋអ៊ីស្លាម។ គេដឹងទៀតថា ក្រុមនេះបានចេញទៅចាប់ប្រជាជនស៊ីវិលពីខាងក្រៅ ដើម្បីយកទៅធ្វើជាខែលមនុស្សនៅទីក្រុងបុរាណ។ គ្មានទឹក អាហារ និងគ្មានភ្លើងប្រើប្រាស់ ប្រជាជនស៊ីវិលអ៊ីរ៉ាក់ កំពុងរស់នៅក្នុងភាពអត់ឃ្លាន ហើយនិងភ័យខ្លាច។ តាមមន្រ្តីអង្គការសហប្រជាជាតិ ខ្មាន់កាំភ្លើង របស់ពួកជីហាតអង្គការរដ្ឋអ៊ីស្លាមនៅចាំបាញ់សម្លាប់ប្រជាជនដែលហ៊ានលួចរត់គេចចេញពីកណ្តាប់ដៃរបស់ខ្លួន នៅក្រុងបុរាណ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ