យន្តហោះចម្បាំងអាមេរិកាំងរារាំងមិនឲ្យក្បួនរថយន្តដឹកក្រុមជីហាត ផ្លាស់ទី នៅស៊ីរី
ក្រុមទាហានអេស្បូឡា នៅលីបង់បានអះអាងនៅថ្ងៃសៅរ៍ម្សិលមិញ ថា យន្តហោះរបស់កងទ័ពសម្ព័ន្ធមិត្តដឹកនាំដោយអាមេរិក បានបិទខ្ទប់ រាំរាំងមិនឲ្យក្បួនរថយន្តដឹកក្រុមជីហាត និងក្រុមគ្រួសារ បើកធ្វើដំណើរទៅកាន់តំបន់ភាគខាងកើតស៊ីរី។ ទៅតាមកិច្ចព្រមព្រៀងជាមួយ ទាហានអេស្បូឡា លីបង់ ដែលប្រយុទ្ធកៀកស្មាជាមួយ ទាហានរដ្ឋាភិបាលស៊ីរី ក្រុមជីហាតរដ្ឋអ៊ីស្លាមត្រូវបានអនុញ្ញាតឲ្យធ្វើដំណើរចាកចេញជាមួយក្រុមគ្រួសារ ពីតំបន់ដែលឡោមព័ទ្ធដោយទាហានរដ្ឋាភិបាលស៊ីរី សំដៅ ទៅតំបន់កាន់កាប់របស់អង្គការរដ្ឋអ៊ីស្លាមនៅក្បែរព្រំដែនស៊ីរីជាមួយអ៊ីរ៉ាក់។
ចុះផ្សាយនៅថ្ងៃ៖
នៅក្នុងសេចក្តីថ្លែងការណ៍របស់ខ្លួន ចេញផ្សាយនៅថ្ងៃសៅរ៍ម្សិលមិញ ពួកទាហានអេស្បូឡាលីបង់ ដែលជាសម្ព័ន្ធមិត្តរបស់ទាហានរដ្ឋាភិបាលស៊ីរីបានលើកឡើងថា យន្តហោះប្រមាញ់របស់អាមេរិក បានព្យាយាមរារាំងមិនឲ្យក្បួនរថយន្តដឹកក្រុមជីហាតអង្គការរដ្ឋអ៊ីស្លាម អាចធ្វើដំណើរទៅព្រំដែនស៊ីរី និងអ៊ីរ៉ាក់។
តាមក្រុមអេស្បូឡា លីបង់ យន្តហោះចម្បាំងអាមេរិក រារាំងផងដែរ ក្បួនរថយន្តដែលដឹកជំនួយមនុស្សធម៌ ទៅឲ្យក្រុមគ្រួសាររបស់ពួកជីហាត ដែលនៅក្នុងនោះ មានទាំងមនុស្សចាស់ កុមារ និងស្រ្តីមានផ្ទៃពោះ។ ដោយសារការរារាំងរបស់យន្តហោះរបស់ក្រុមសម្ព័ន្ធអន្តរជាតិដឹកនាំដោយអាមេរិក ក្បួនរថយន្តដឹកក្រុមជីហាត កំពុងនៅជាប់គាំង ក្នុងតំបន់ដែលកំពុងឡោមព័ទ្ធដោយទាហានរដ្ឋាភិបាល ស៊ីរី ដែលស្ថិតនៅក្បែរព្រំដែនស៊ីរី លីបង់។
សូមបញ្ជាក់ថា ពួកទាហានអេស្បូឡា រួមជាមួយកងទ័ពរដ្ឋាភិបាល ស៊ីរី បានយល់ព្រមអនុញ្ញាតបើកផ្លូវឲ្យពួកជីហាតអង្គការរដ្ឋអ៊ីស្លាម រួមទាំងក្រុមគ្រួសាររបស់ពួកគេ ធ្វើដំណើរចាកចេញពីតំបន់ដែលឡោមព័ទ្ធជុំជិតដោយទាហានអេស្បូឡា និងកងទ័ពស៊ីរី។ តាមគម្រោង ក្បួនរថយន្តចំនួន ១៧ ដែលដឹកពួកទាហាន ជីហាត៣០០នាក់ ហើយនិងប្រជាជនស៊ីវិល៣០០នាក់ ត្រូវបើកសំដៅទៅជំរំសំបុករបស់ពួកអង្គការរដ្ឋអ៊ីស្លាម នៅ Al Boukamal ដែលស្ថិតនៅជាប់ព្រំដែនស៊ីរីជាមួយអ៊ីរ៉ាក់។
គំនិតផ្តួចផ្តើមរបស់ទាហានស៊ីរីរួមជាមួយពួកអេស្បូឡា លីបង់ដែលចង់ជម្លៀសពួកជីហាត ឲ្យទៅនៅព្រំដែនស៊ីរី ជាមួយអ៊ីរ៉ាក់ បានបង្កឲ្យការមិនពេញចិត្តពីសំណាក់រដ្ឋាភិបាលអ៊ីរ៉ាក់។ សម្ព័ន្ធអន្តរជាតិដឹកនាំដោយអាមេរិកវិញ បានបដិសេធមិនទទួលស្គាល់កិច្ចព្រមព្រៀងរវាងពួកអេស្បូឡា ជាមួយ ក្រុមជីហាតរដ្ឋអ៊ីស្លាម និងថា សម្ព័ន្ធអន្តរជាតិគ្មានកាតព្វកិច្ច ដែលត្រូវគោរពធ្វើតាមនោះទេ។ សម្រាប់សម្ព័ន្ធអន្តរជាតិ ដែលកំពុងធ្វើប្រតិបត្តិការទ័ពអាកាសនៅអ៊ីរ៉ាក់ និងនៅស៊ីរី ក្រុមទាហានជីហាតរបស់អង្គការរដ្ឋអ៊ីស្លាម ដែលត្រូវផ្ទេរចេញពីព្រំដែនលីបង់ ស៊ីរី ទៅភាគខាងកើតស៊ីរី នឹងទៅប្រមូលកម្លាំង ដើម្បីប្រយុទ្ធអុកឡុក បន្តទៀត នៅព្រំដែនអ៊ីរ៉ាក់ជាមួយស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ