តួកគីចាប់ខ្លួនអ្នករិះគន់ប្រតិបត្តិការយោធាតួកគី នៅក្នុងទឹកដីស៊ីរី
អាជ្ញាធរតួកគីនៅថ្ងៃសុក្រទី២កុម្ភៈ បានចាប់ខ្លួន មនុស្ស១៣នាក់ ដែលបានរិះគន់រដ្ឋាភិបាល ក្នុងរឿងបើកប្រតិបត្តិការទ័ព នៅទឹកដីភាគខាងជើងស៊ីរី។ តាំងពីថ្ងៃទី ២០មករា មក កងទ័ពតួកគីបានបើកយុទ្ធនាការ វាយប្រហារទៅលើក្រុមទាហានគួឌីស្ថាន ស៊ីរី ដែលតួកគីចាត់ទុកជាក្រុមភេរវនិយម ដែលគ្រោះថ្នាក់សម្រាប់សន្តិសុខជាតិតួកគី។ នៅថ្ងៃសុក្រដែរ គ្រាប់ផ្លោងរ៉ុក្កែត ពីរគ្រាប់បាញ់ចេញពីទឹកដីខាងជើងស៊ីរី បានសម្លាប់មនុស្ស២នាក់ ក្នុងភូមិមួយរបស់តួកគី ជាប់ព្រំដែនជាមួយស៊ីរី។ នេះបើតាមប្រភពព័ត៌មានពីអាជ្ញាធរតួកគី។
ចុះផ្សាយនៅថ្ងៃ៖
ក្នុងចំណោមមនុស្ស១៣នាក់ ដែលប៉ូលិសតួកគីចាប់ខ្លួន នៅថ្ងៃសុក្រ មាន១១នាក់ ជាថ្នាក់ដឹកនាំជាន់ខ្ពស់របស់សមាគមគ្រូពេទ្យតួកគី ដែលជាអ្នកផ្តួចផ្តើមគំនិតដំបូង សរសេរអត្ថបទរិះគន់ ប្រឆាំង ចំណាត់ការយោធារបស់រដ្ឋាភិបាល ក្នុងទឹកដីស៊ីរី។ តាមកាសែតតួកគី មនុស្សជាច្រើនត្រូវបានចាប់ខ្លួន ដោយសារតែពួកគេបានសរសេរគាំទ្រ អត្ថបទមួយ ដែលបង្ហោះផ្សាយនៅលើបណ្តាញសង្គម ដោយសមាគម គ្រូពេទ្យ តួកគី។ នៅក្នុងអត្ថបទនោះ សហភាពគ្រូពេទ្យតួកគី ដែលមានសមាជិកជាង ៨៣ ០០០នាក់ បានសរសេរចាត់ទុកសង្រ្គាមថា ជម្ងឺសាធារណៈ និងទាមទារឲ្យបញ្ចប់សង្រ្គាម និងនាំមកនូវសន្តិភាពនៅ គ្រប់កន្លែង។
ការចាប់ឃុំខ្លួនគ្រូពេទ្យ តួកគី គឺជាឧទាហរណ៍មួយទៀត ដែលស្តែងឲ្យឃើញ ពីវិធានការបង្រ្កាប មិនយោគយល់របស់រដ្ឋាភិបាល ទៅលើអ្នកដែលហ៊ានរិះគន់ប្រឆាំង។ ចាប់តាំងពីតួកគី បើកប្រតិបត្តិការយោធា វាយប្រហារទៅលើក្រុមគួឌីស្ថានស៊ីរី នៅទឹកដីភាគខាងជើង ស៊ីរី នៅថ្ងៃទី ២០មករា មក ប្រធានាធិបតីតួកគី រេស៊ីប អ៊ែរដូហ្កាន បាននិយាយព្រមានរួចហើយថា អ្នកដែលហ៊ានរិះគន់ ឬតវ៉ាប្រឆាំងនឹងអន្តរាគមន៍យោធារបស់តួកគី នៅស៊ីរី នឹងប្រឈមនឹងការដាក់ទោស ដ៏ធ្ងន់មួយ។
នៅក្នុងសេចក្តីថ្លែងការណ៍ នៅថ្ងៃសុក្រ រដ្ឋមន្រ្តីការបរទេសអឺរ៉ុប លោកស្រី Federica Mohgerini និងអ្នកទទួលបន្ទុកគណៈកម្មការទទួលបន្ទុកការពង្រីកវិសាលភាពអឺរ៉ុបបានសំដែងការព្រួយបារម្ភពីអព្យាក្រឹត្យភាព ហើយនិងយុត្តិធម៌របស់តុលាការតួកគី នៅក្រោយការចាប់ខ្លួន ក្រុមគ្រូពេទ្យតួកគី។
ចាប់តាំងពីបើកប្រតិបត្តិការយោធានៅក្នុងទឹកដីស៊ីរី ក្នុងហេតុផលបោសសម្អាត ក្រុមគួឌីស្ថាន ដែលជាក្រុមភេរវជនក្នុងក្រសែភ្នែករបស់តួកគី អាជ្ញាធរតួកគីបានប្រមូលចាប់ឃុំខ្លួនមនុស្ស ៣០០នាក់ ក្នុងបទឃោសនាគាំទ្រ ក្រុមភេរវនិយម។ តាមកាសែតក្នុងស្រុកតួកគី អ្នកដែលអាជ្ញាធរតួកគីចាប់ខ្លួនភាគច្រើន គឺបានសរសេរនៅបណ្តាញសង្គម ដោយបានបញ្ចេញមតិ ប្រឆាំងនឹងប្រតិបត្តិការយោធារបស់តួកគី នៅខេត្តអាហ្វ្រាំង ក្នុងទឹកដីស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ