អង្គការសហប្រជាជាតិទទួលស្គាល់ភាពបរាជ័យក្នុងការចរចាបញ្ចប់សង្រ្គាមនៅប្រទេសយេម៉ែន
នៅថ្ងៃសៅរ៍ ទី៨ កញ្ញា អង្គការសហប្រជាជាតិបានទទួលស្គាល់ពីភាពបរាជ័យក្នុងការរៀបចំឲ្យមានកិច្ចចរចារវាងភាគីជម្លោះនៅក្នុងប្រទេសយេម៉ែន។ ទីបំផុត ក្រុមអ្នកតំណាងឲ្យពួកឧទ្ទាមហ៊ូទីមិនបានធ្វើដំណើរទៅកាន់ទីក្រុងហ្សឺណែវ ប្រទេសស្វ៊ីសដើម្បីជួបចរចាជាមួយក្រុមអ្នកតំណាងឲ្យរដ្ឋាភិបាលទីក្រុងសាណាទេ។ បន្ទាប់ពីបានរង់ចាំតាំងពីថ្ងៃព្រហស្បតិ៍ ទី៦ កញ្ញាមក ក្រុមអ្នកតំណាងឲ្យរដ្ឋាភិបាលក៏បានសម្រេចចិត្តវិលត្រឡប់ចូលស្រុកវិញនាថ្ងៃសៅរ៍ ទី៨ កញ្ញា និងបានចោទក្រុមឧទ្ទាមពីបទធ្វើវិច្ឆេទកម្មលើកិច្ចចរចាក្នុងការស្វែងរកដំណោះស្រាយបញ្ចប់សង្រ្គាមដែលបានអូសបន្លាយតាំងពី ៣ឆ្នាំ។ យ៉ាងណាក៏ដោយ ប្រេសិតពិសេសអង្គការសហប្រជាជាតិទទួលបន្ទុកសំណុំរឿងយេម៉ែនលោកម៉ារតាំង គ្រីហ្វ៊ីមិនបានទម្លាក់កំហុសលើភាគីណាមួយទេ និងសង្ឃឹមរកបានកិច្ចព្រមព្រៀងនាពេលខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១២
« Ansar al Allah ដែលជាសាខានយោបាយនៃចលនាឧទ្ទាមហ៊ូទីសបានប្រឹងប្រែងគ្រប់បែបយ៉ាងដែលអាចធ្វើទៅបានដើម្បីធ្វើដំណើរមកកាន់ទីនេះ។ ពួកគេពិតជាចង់មកកាន់ទីនេះ ហើយពួកគេនឹងធ្វើដំណើរមកកាន់ទីនេះ។ វាជារឿងពិតដែលអង្គការសហប្រជាជាតិ និងរដ្ឋាភិបាលទីក្រុងសាណាបានធ្វើអ្វីៗគ្រប់យ៉ាងទាំងអស់ដើម្បីអាចឲ្យពួកគេធ្វើដំណើរមកកាន់ទីនេះ។
តែទីបំផុត យើងមិនបានទទួលជោគជ័យដូចដែលយើងចង់បាន។ វាមានបញ្ហាជាច្រើនដើម្បីដោះស្រាយ ហើយយើងមិនអាចដោះស្រាយបានទៅតាមពេលវេលាដែលកំណត់។ រឿងរ៉ាវមួយនេះក៏បានរីកកាន់តែធំ និងស្មុគស្មាញនារយៈពេលប៉ុន្មានថ្ងៃចុងក្រោយនេះ។ យ៉ាងណាក៏ដោយ នេះមិនមែនជាលើកទី១ ទេដែលយើងបានប្រឈមមុខនឹងបញ្ហាច្រំដែលមួយនេះក្នុងបរិបទនៃជម្លោះនៅយេម៉ែន។
នៅពេលណាមួយដែលយើងរកឃើញផ្លូវត្រូវ យើងនឹងធ្វើឲ្យមានភាពចម្រើន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ