មនុស្សរាប់សិបនាក់ស្លាប់នៅយេម៉ែន ដោយសារការវាយប្រហារតាមអាកាស
ជនស៊ីវិលរាប់សិបនាក់ដែលក្នុងនោះមានទាំងកុមារផងបានស្លាប់នៅក្នុងខេត្តសាដា (Saada) នៃប្រទេសយេម៉ែន ដោយសារការទម្លាក់គ្រាប់បែកពីសំណាក់បក្សសម្ព័ន្ឋអារ៉ាប់ដឹកនាំដោយអារ៉ាប៊ីសាអូឌីត។ នេះបើតាមការឲ្យដឹងរបស់ក្រុមប្រឹក្សាសន្តិសុខយេម៉ែន និងគណៈកម្មាធិការកាកបាទក្រហមអន្តរជាតិ (ICRC)។
ចុះផ្សាយនៅថ្ងៃ៖
ការវាយប្រហារតាមផ្លូវអាកាស ធ្វើឡើងដោយបក្សសម្ព័ន្ឋអារ៉ាប់ ទៅលើរថយន្តក្រុង នៅក្នុងប្រទេសយេម៉ែន បានបណ្តាលឲ្យជនស៊ីវិលរាប់សិបនាក់ស្លាប់និងរងរបួស ហើយក្នុងចំណោមនោះមានទាំងកុមារផងដែរ។ ប្រធានមន្ទីរសុខាភិបាលយេម៉ែននៅខេត្តសាដាបានឲ្យដឹងថា មកដល់ពេលនេះ ចំនួនមនុស្សស្លាប់បានកើនដល់៤៣ នាក់ ហើយ៦១ នាក់ផ្សេងទៀតរងរបួស។
ពាក់ព័ន្ឋរឿងនេះដែរ តំណាងគណៈប្រតិភូកាកបាទក្រហមអន្តរជាតិ ប្រចាំនៅប្រទេសយេម៉ែនបានសរសេរនៅលើបណ្តាញសង្គម Twitter ថា ជនរងគ្រោះនៅក្នុងការវាយប្រហារដោយការទម្លាក់គ្រាប់នោះ ភាគច្រើនជាកុមារមានអាយុក្រោម១០ ឆ្នាំ។
ផ្ទុយទៅវិញ ក្រោយហេតុការណ៍វាយប្រហារ បក្សសម្ព័ន្ឋអារ៉ាប់គាំទ្រដោយលោកខាងលិចបាននិយាយថាការវាយប្រហាររបស់ខ្លួន គឺតម្រង់លើទីតាំងដែលក្រុមឧទ្ទាមហ៊ូទីនៅយេម៉ែន ប្រើប្រាស់ដើម្បីបាញ់មីស៊ីល ចូលទៅក្នុងទឹកដីអារ៉ាប៊ីសាអូឌីតដែលមានព្រំដែនជាប់នឹងប្រទេសយេម៉ែន។ បក្សសម្ព័ន្ឋអារ៉ាប់បានបន្តទៀតថាហេតុការណ៏នេះបានសម្លាប់មនុស្សតែម្នាក់ប៉ុណ្ណោះ។
គួរបញ្ជាក់ថា សហរដ្ឋអាមេរិកនិងប្រទេសមហាអំណាចលោកខាងលិចបានផ្តល់អាវុធនិងព័ត៌មានចារកិច្ចទៅឲ្យសម្ព័ន្ធមិត្តរបស់ខ្លួន ដើម្បីកម្ទេចពួកឧទ្ទាមហ៊ូទី។ ការណ៍នេះបានធ្វើឲ្យក្រុមអ្នកឃ្លាំមើលសិទិ្ធមនុស្ស រិះគន់យ៉ាងខ្លាំងពីព្រោះថា ការវាយប្រហារឥតស្រាកស្រាន្តនៅយេម៉ែន បានសម្លាប់ប្រជាជនស្លូតត្រង់ជាច្រើននាក់មកហើយ។
មិនតែប៉ណ្ណោះ បើយោងតាមអង្គការសហប្រជាជាតិ សង្រ្គាមដ៏រុំារ៉ៃនៅក្នុងប្រទេសយេម៉ែនបានសម្លាប់មនុស្សជាង ១ ម៉ឺននាក់ និងធ្វើឲ្យមនុស្សជាង ២ លាននាក់គ្មានទីជម្រក ហើយនិងបានធ្វើឱ្យប្រទេសនេះថ្នាក់ក្នុងមហន្តរាយមួយដ៏សែនខ្លោចផ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ