រដ្ឋាភិបាលរុស្ស៊ីថាខ្លួនពិតជាបានបញ្ជូនទីប្រឹក្សាយោធាទៅស៊ីរីតែមិនមែនជាទ័ពប្រយុទ្ធ
រុស្ស៊ីពិតជាបានបញ្ជូនទីប្រឹក្សាយោធាឲ្យទៅជួយកងទ័ពស៊ីរីពិតមែន តែមិនមែនជាកងទ័ពប្រយុទ្ធនោះទេ។ នេះគឺជាការអះអាងរបស់ក្រសួងការបរទេសរុស្ស៊ី នៅថ្ងៃពុធនេះ ដោយបានបញ្ជាក់បន្ថែមថា រុស្ស៊ីកំពុងតែពិចារណាចាត់វិធានការយោធាថ្មីៗបន្ថែមទៀត ប្រសិនបើចាំបាច់ ក្នុងការប្រយុទ្ធប្រឆាំងនឹងភេរវកម្មនៅស៊ីរី។ សេចក្តីប្រកាសរបស់ក្រសួងការបរទេសរុស្ស៊ីនៅពេលនេះត្រូវបានធ្វើឡើង នៅក្នុងពេលដែលមានការសង្ស័យកាន់តែខ្លាំងជុំវិញវត្តមានកងទ័ពរុស្ស៊ី នៅក្នុងប្រទេសស៊ីរី ដែលធ្វើឲ្យអាមេរិក និងបក្សសម្ព័ន្ធអូតង់នាំគ្នាសម្តែងក្តីព្រួយបារម្ភ។ ចំណែកឯប្រទេសមួយចំនួន រួមមាន ក្រិក និងប៊ុលហ្ការី ជាដើម ដែលជាសមាជិកបក្សសម្ព័ន្ធអូតង់ បាននាំគ្នាហាមឃាត់លែងឲ្យយន្តហោះរុស្ស៊ី ធ្វើការហោះកាត់ដែនអាកាសរបស់ខ្លួន ដើម្បីឆ្លងកាត់ទៅកាន់ប្រទេសស៊ីរី។
ចុះផ្សាយនៅថ្ងៃ៖
អស់រយៈពេលជាច្រើនថ្ងៃមកហើយ ដែលគេលេចឮព័ត៌មានជុំវិញវត្តមានកងទ័ពរុស្ស៊ី នៅក្នុងប្រទេសស៊ីរី។ កាសែតអាមេរិក The New York Times ជាអ្នកដែលបានចេញផ្សាយមុនគេ កាលពីថ្ងៃសៅរ៍ ដោយអះអាងថា រុស្ស៊ីបានបញ្ជូនទាហានមួយក្រុម ព្រមទាំងបរិក្ខាយោធាផងឲ្យទៅដំឡើងមូលដ្ឋានទ័ពអាកាស នៅក្នុងតំបន់ Lattaquié ដែលជាមូលដ្ឋានធំរបស់ក្រុមលោកបាស្ហា អាល់អាសាដ។
ទាក់ទងនឹងរឿងនេះ លោកចន ឃែរី រដ្ឋមន្រ្តីការបរទេសអាមេរិក បានទូរស័ព្ទដោយផ្ទាល់ទៅកាន់សមភាគីរុស្ស៊ី គឺលោកស៊ែរហ្គៃ ឡាវរ៉ូហ្វ ដើម្បីសុំឲ្យមានការបកស្រាយ។ លោកប្រមុខការទូតរុស្ស៊ីបានត្រឹមតែឆ្លើយតបមកវិញថា រុស្ស៊ីមិនដែលលាក់លៀមទេនូវជំហររបស់ខ្លួនតាំងពីដើមមក អំពីការគាំទ្រខាងផ្នែកយោធាដល់រដ្ឋាភិបាលស៊ីរី ក្នុងការប្រយុទ្ធប្រឆាំងនឹងភេរវកម្ម ក៏ប៉ុន្តែ រុស្ស៊ីបានបដិសេធមិនព្រមប្រាប់ឲ្យដឹងលម្អិតទេថា តើយន្តហោះដឹកជញ្ជួនយោធារបស់រុស្ស៊ី ដែលហោះទៅហោះមក ទៅកាន់ប្រទេសស៊ីរី មានដឹកអ្វីពិតប្រាកដ។
លោកប្រធានាធិបតីរុស្ស៊ី វ៉្លាឌីមៀរ ពូទីន ក៏ដូចជារដ្ឋាភិបាលស៊ីរី សុទ្ធតែបានធ្វើសេចក្តីប្រកាសបដិសេធជាផ្លូវការ អំពីវត្តមានកងទ័ពរុស្ស៊ីនៅស៊ីរី។
ក៏ប៉ុន្តែ បើទោះបីជាមានការបដិសេធយ៉ាងនេះក៏ដោយ កាលពីថ្ងៃអង្គារ មន្រ្តីរដ្ឋាភិបាលអាមេរិកបានប្រាប់ទីភ្នាក់ងារព័ត៌មាន AFP ថា នៅក្នុងរយៈពេលប៉ុន្មានថ្ងៃកន្លងទៅនេះ មានយន្តហោះដឹកជញ្ជូនយោធារបស់រុស្ស៊ីយ៉ាងតិច ៣គ្រឿង បានចុះចតនៅក្នុងប្រទេសស៊ីរី។ ចំណែកឯរដ្ឋាភិបាលប៊ុលហ្ការី និងក្រិក ដែលសុទ្ធសឹងជាសមាជិកបក្សសម្ព័ន្ធអូតង់ បាននាំគ្នាហាមឃាត់មិនឲ្យយន្តហោះរបស់រុស្ស៊ីហោះឆ្លងកាត់ដែនអាកាសប្រទេសពួកគេ ដើម្បីឆ្លងកាត់ទៅកាន់ប្រទេសស៊ីរី។ ការហាមឃាត់នេះធ្វើឡើងទៅតាមសំណើរបស់សហរដ្ឋអាមេរិក។
នៅថ្ងៃពុធនេះ រដ្ឋាភិបាលប៊ុលហ្ការីបានអះអាងថា ខ្លួននឹងអនុញ្ញាតឲ្យយន្តហោះរុស្ស៊ីហោះកាត់ដែនអាកាសរបស់ខ្លួន ប្រសិនបើអាជ្ញាធររុស្ស៊ីអនុញ្ញាតឲ្យប៊ុលហ្ការីត្រួតពិនិត្យមើលថាតើយន្តហោះទាំងនេះដឹកជញ្ជូនអ្វីពិតប្រាកដ។
រដ្ឋាភិបាលក្រុងម៉ូស្គូបានទទួលស្គាល់ថា ខ្លួនពិតជាបានបញ្ជូនទីប្រឹក្សាយោធាទៅកាន់ប្រទេសស៊ីរីពិតមែន ក៏ប៉ុន្តែ មិនមែនជាកងទ័ពប្រយុទ្ធនោះទេ។ ចំណែកឯយន្តហោះដឹកជញ្ជូនយោធា ដែលហោះទៅហោះមក ទៅកាន់ប្រទេសស៊ីរី នៅក្នុងរយៈពេលប៉ុន្មានថ្ងៃចុងក្រោយនេះ គឺមានដឹកជញ្ជូនតែជំនួយមនុស្សធម៌តែប៉ុណ្ណោះ។
ក៏ប៉ុន្តែទោះជាយ៉ាងណា សហរដ្ឋអាមេរិក ក៏ដូចជាបក្សសម្ព័ន្ធអូតង់ហាក់ដូចជានៅតែមិនជឿការឆ្លើយបកស្រាយរបស់រុស្ស៊ី ដោយសារតែគេធ្លាប់ឃើញប្រវត្តិរបស់រុស្ស៊ី ក៏ដូចជា សហភាពសូវៀត ដែលលួចដាក់ពង្រាយកងទ័ពទៅបរទេសដោយសម្ងាត់ដោយមិនទទួលស្គាល់ជាសាធារណៈ ដូចជាករណីនៅតំបន់គ្រីមេរបស់អ៊ុយក្រែន កាលពីពេលថ្មីៗនេះ ដែលជាឧទាហរណ៍ជាក់ស្តែងនិងស្រស់ៗ។
នៅក្នុងករណីគ្រីមេ រុស្ស៊ីបានបញ្ជូនកងកុម្ម៉ង់ដូឲ្យចូលទៅកាន់កាប់តំបន់គ្រីមេ ដើម្បីកាត់យកតំបន់នេះចេញពីអ៊ុយក្រែន ទៅភ្ជាប់នឹងទឹកដីរុស្ស៊ី ក្រោមរូបភាពធ្វើការបោះឆ្នោតប្រជាមតិ។ កាលពីដំបូង រដ្ឋាភិបាលក្រុងម៉ូស្គូតែងតែបដិសេធថាខ្លួនមិនបានបញ្ជូនទាហានទៅកាន់តំបន់គ្រីមេនោះទេ។ ក៏ប៉ុន្តែមួយឆ្នាំក្រោយមក លោកប្រធានាធិបតីរុស្ស៊ី វ៉្លាឌីមៀរ ពូទីន ខ្លួនឯងផ្ទាល់ ដែលបានសារភាពនៅក្នុងបទសម្ភាសន៍ជាមួយទូរទស្សន៍ថា លោកគឺជាអ្នករៀបចំផែនការដោយផ្ទាល់ ក្នុងការធ្វើអន្តរាគមនយោធាកាត់យកតំបន់គ្រីមេពីអ៊ុយក្រែន។
នៅក្នុងពេលបច្ចុប្បន្ននេះ អាមេរិកនិងសម្ព័ន្ធមិត្តនាំគ្នាព្រួយបារម្ភថា រុស្ស៊ីកំពុងតែដាក់ពង្រាយកងទ័ពនៅក្នុងប្រទេសស៊ីរី ហើយកងទ័ពទាំងនេះមិនមានបេសកកម្មត្រឹមតែប្រយុទ្ធប្រឆាំងនឹងក្រុមជីហាតរដ្ឋអ៊ីស្លាមនោះទេ ក៏ប៉ុន្តែ គោលដៅពិតប្រាកដ គឺទៅជួយរដ្ឋាភិបាលរបស់លោកបាស្ហា អាល់អាសាដ ក្នុងការប្រយុទ្ធតទល់នឹងក្រុមឧទ្ទាមស៊ីរី ដើម្បីរក្សាអំណាចតទៅទៀត។
កាលពីថ្ងៃអង្គារ មន្រ្តីអ្នកនាំពាក្យប្រធានាធិបតីអាមេរិកបានធ្វើការព្រមានថា ការពង្រឹងវត្តមានយោធារបស់រុស្ស៊ីនៅស៊ីរី អាចនឹងនាំឲ្យមានការប្រឈមមុខដាក់គ្នាជាមួយនឹងកងទ័ពអាមេរិកនិងសម្ព័ន្ធមិត្ត ដែលកំពុងប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ