មេដឹកនាំ អាល់កៃដាអំពាវនាវយុវជនអ៊ីស្លាមឲ្យធ្វើភេរវកម្ម នៅប្រទេសលោកខាងលិច
មេកើយរបស់បណ្តាញអាល់កៃដា អៃម៉ាន់ អាល់ហ្សាវ៉ាហ៊ីរីបានអំពាវនាវយុវជនអ៊ីស្លាម នៅអាមេរិក និងនៅប្រទេសលោកខាងលិចផ្សេងទៀត ឲ្យធ្វើសកម្មភាពភេរវកម្ម នៅក្នុងប្រទេសទាំងនោះ ដោយយកគំរូតាមបងប្អូនត្រកូលគួរអាស្ហី និងត្សាណាវ ដែលបានបង្កភេរវកម្ម នៅទីក្រុងប៉ារីស និងនៅបូស្តុន។ មេអាល់កៃដា អំពាវនាវយ៉ាងដូច្នេះ នៅក្នុងសារសំឡេងមួយ ដែលចុះផ្សាយ នៅក្នុងវិបសៃតិ៍ កាលពីថ្ងៃអាទិត្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
នៅក្នុងសារជាសំឡេង របស់ខ្លួន មេដឹកនាំអាល់កៃដា អៃម៉ាន់ អាល់ហ្សាវ៉ាហ៊ីរីបានអំពាវនាវយុវជនអ៊ីស្លាម កុំឲ្យរារែក ធ្វើភេរវកម្ម ដើម្បីបំផ្លាញប្រទេសលោកខាងលិច។ “អ្វីដែលយើងត្រូវធ្វើនៅពេលនេះ គឺនាំសង្រ្គាមចូលទៅដល់ផ្ទះ ទីក្រុងរបស់បស្ចិមបទេស ជាពិសេស គឺអាមេរិកតែម្តង”។ នេះជាសំដីអំពាវនាវរបស់មេកើយអាល់កៃដា។
នៅក្នុងសារសំឡេង អៃម៉ាន់ អាល់ហ្សាវ៉ាហ៊ីរីបាននិយាយប្រាប់យុវជនកាន់សាសនាអ៊ីស្លាមដែលរស់នៅអឺរ៉ុបយកគំរូតាមបងប្អូន ត្រកូលគួរអាស្ហី ដែលធ្វើភេរវកម្មបាញ់សម្លាប់អ្នកកាសែតរបស់Charlie Hebdo នៅទីក្រុងប៉ារីស និងបងប្អូនត្រកូល ត្សាណាវ ដែលធ្វើភេរវកម្ម សម្លាប់មនុស្សនៅក្នុងឱកាសរត់ម៉ារ៉ាតុង នៅទីក្រុងបូស្តុន សហរដ្ឋអាមេរិក។
សំឡេងរបស់អៃម៉ាន់ អាល់ហ្សាវ៉ាហ៊ីរី ត្រូវបានចុះផ្សាយនៅក្នុងវិបសៃតិ៍ នៅថ្ងៃអាទិត្យ ប៉ុន្តែ តាមទីភ្នាក់ងារព័ត៌មានបារាំង AFP សាររបស់មេដឹកនាំអាល់កៃដា ត្រូវបានថតទុក តាំងពីយូរណាស់មកហើយ គឺ អាច ពីរ បីខែមុន ព្រោះថា នៅក្នុងសំឡេងនោះ អៃម៉ាន់ អាល់ហ្សាវ៉ាហ៊ីរីបាននិយាយយោងដល់មេដឹកនាំតាលីបង់ ដែលតាមពិត ត្រូវបានរដ្ឋាភិបាលអាហ្វហ្កានីស្ថាន បានប្រកាស ស្លាប់ តាំងពីខែកក្កដា។
នៅក្នុងសាររបស់ខ្លួន មេដឹកនាំកំពូលរបស់អាល់កៃដា បានបញ្ជាក់ជាថ្មី ក្រុមជីហាត នៃអង្គការរដ្ឋអ៊ីស្លាម ជាក្រុមខុសច្បាប់ ប៉ុន្តែ យ៉ាងណាក៏ដោយ អាល់កៃដា នៅតែត្រៀមដើម្បី ធ្វើការ រួមកម្លាំងជាមួយ ក្រុមនេះ ដើម្បី ប្រយុទ្ធប្រឆាំងនឹងប្រទេសលោកខាងលិច ហើយនិងពួកសត្រូវ នានា ក្នុងទឹកដីស៊ីរី និងអ៊ីរ៉ាក់។ ក្រុមអាល់កៃដា បានចុះខ្សោយ បែកបាក់កម្លាំង នៅក្រោយពេល មេដឹកនាំធំរបស់អាល់កៃដា អូសាម៉ា បិនឡាដិនត្រូវកងកុម្មង់ដូរអាមេរិកបាញ់សម្លាប់ កាលពីឆ្នាំ ២០១១។ ក្រោមការដឹកនាំរបស់ អៃម៉ាន់ អាល់ហ្សាវ៉ាហ៊ីរី អតីតគ្រូពេទ្យអេហ្ស៊ីប បណ្តាញអាល់កៃដា ត្រូវពើបប្រទះ នឹងការប្រជែង ដណ្តើមឥទ្ធិពលពីក្រុមជីហាតរដ្ឋអ៊ីស្លាម ដែលបច្ចុប្បន្ន កំពុងមានអំណាច វាយដណ្តើមកាន់កាប់ទឹកដី មួយផ្នែកធំ នៅស៊ីរី និងអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ