វិបត្តិអារ៉ាប៊ីសាអូឌីត-អ៊ីរ៉ង់៖អ.ស.ប.ផ្តើមអន្តរាគមន៍ដើម្បីទប់ការឆ្លងរាលដាលក្នុងតំបន់
វិបត្តិការទូតរវាងប្រទេសអារ៉ាប៊ីសាអូឌីត និងប្រទេសអ៊ីរ៉ង់បាន និងកំពុងធ្វើឲ្យសហគមន៍អន្តរជាតិព្រួយបារម្ភកាន់តែខ្លាំង។ អ្វីដែលសហគមន៍អន្តរជាតិបារម្ភខ្លាំងជាងគេនោះ គឺសង្រ្គាមមិនអាចគ្រប់គ្រងបានរវាងមហាអំណាចទាំងពីរនៅក្នុងតំបន់ដែលកំពុងញំាញីដោយសង្រ្គាមស៊ីវិលនៅស៊ីរី និងយេម៉ែន។ ប្រទេសមហាអំណាចក្នុងលោក មានអាមេរិក បារាំង អង់គ្លេស ឬមួយក៏ចិនបានចេញមុខអំពាវនាវឲ្យភាគីជម្លោះទាំងពីរមានការអត់ធ្មត់ និងព្យាយាមដោះស្រាយដោយសន្តិវិធី។ ប្រទេសរុស្ស៊ីបានយល់ព្រមធ្វើជាអាជ្ញាកណ្តាល ហើយនៅថ្ងៃនេះ លោកស្តាហ្វាន មីស្ទូរ៉ា (Staffan Mistura) អន្តរការីរបស់អង្គការសហប្រជាជាតិទទួលបន្ទុកសំណុំរឿងស៊ីរីកំពុងស្ថិតក្នុងប្រទេសអារ៉ាប៊ីសាអូឌីត និងគ្រោងបន្តដំណើរទៅកាន់ប្រទេសអ៊ីរ៉ង់ក្នុងសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០៦:២៥
គោលដៅសំខាន់របស់លោកស្តាហ្វាន មីស្ទូរ៉ា គឺដើម្បីជួយកាត់បន្ថយភាពតានតឹងរវាងប្រទេសអារ៉ាប៊ីសាអូឌីត និងប្រទេសអ៊ីរ៉ង់។ ភាពតានតឹងដែលបានកើតចេញពីការប្រហារជីវិតមន្រ្តីជាន់ខ្ពស់និកាយស្ហ៊ីអីតលោកនីមៀរ អាល់ នីមៀរដោយអារ៉ាប៊ីសាអូឌីតកាលពីថ្ងៃសៅរ៍ ទី២ មករា។ តែសំណួរដែលគ្រប់គ្នាកំពុងចោទពេលនេះគឺថា លោកស្តាហ្វាន មីស្ទូរ៉ាជាអន្តរការីរបស់អង្គការសហប្រជាជាតិទទួលបន្ទុកសំណុំរឿងវិបត្តិស៊ីរីទេ ចុះហេតុអ្វីបានជាលោកចេញមុខទៅដោះស្រាយវិបត្តិរវាងអារ៉ាប៊ីសាអូឌីត និងអ៊ីរ៉ង់ពេលនេះទៅវិញ។
លោកស្តាហ្វានមិនបានបញ្ជាក់ត្រង់ៗថាលោកទៅអារ៉ាប៊ីសាអូឌីត និងទៅអ៊ីរ៉ង់ដើម្បីដោះស្រាយវិបត្តិការទូតរវាងប្រទេសមហាអំណាចទាំងពីរនៅក្នុងតំបន់ទេ តែបានអះអាងថា លោកមានការព្រួយបារម្ភជាពន់ពេកចំពោះវិបត្តិនេះ ព្រោះវាអាចនឹងជះឥទ្ធិពលអាក្រក់នៅក្នុងតំបន់ដែលកំពុងញំាញីដោយសង្រ្គាមស៊ីវិលនៅក្នុងប្រទេសស៊ីរី និងយេម៉ែន។ ឥទ្ធិពលអាក្រក់នៅចំពោះមុខដែលលោកស្តាហ្វានមិនអាចលាក់កំបាំងបាននោះ គឺដំណើរស្វែងរកដំណោះស្រាយឲ្យវិបត្តិនៅស៊ីរីដែលអារ៉ាប៊ីសាអូឌីត និងអ៊ីរ៉ង់ជាតួអង្គសំខាន់ពីរមិនអាចខ្វះបាន។
នៅអារ៉ាប៊ីសាអូឌីត ក៏ដូចជានៅអ៊ីរ៉ង់ លោកស្តាហ្វាននឹងសាកល្បងស្វែងយល់ថា តើវិបត្តិការទូតរវាងគូប្រជែងទាំងពីរក្នុងតំបន់អាចនឹងធ្វើឲ្យប៉ះពាល់ដល់អនាគតកិច្ចប្រជុំរវាងក្រុមអ្នកតំណាងរដ្ឋាភិបាលស៊ីរី និងក្រុមប្រឆាំងកម្រិតណា។ កិច្ចប្រជុំដែលគ្រោងរៀបចំចាប់ពីថ្ងៃទី២៥ មករាខាងមុខក្នុងទីក្រុងហ្សឺណែវ ប្រទេសស្វីស។ គួររម្លឹកជូនថា អារ៉ាប៊ីសាអូឌីត និងអ៊ីរ៉ង់បានចូលរួមនៅក្នុងសន្និសីទអន្តរជាតិស្តីពីវិបត្តិស៊ីរីរៀបចំក្នុងខែតុលា និងវិច្ឆិកាឆ្នាំកន្លងទៅ។ ក្រៅពីវិបត្តិស៊ីរី វិបត្តិយេម៉ែនក៏ជាក្តីបារម្ភរបស់បេសកជនពិសេសអង្គការប្រជាជាតិទទួលបន្ទុកសំណុំរឿងយេម៉ែនលោកអ៊ីស្មែល អ៊ុល ឆែក អាម៉េដដែរ ព្រោះអារ៉ាប៊ីសាអូឌីត និងអ៊ីរ៉ង់ក៏បានលូកដៃយ៉ាងជ្រៅនៅក្នុងវិបត្តិយេម៉ែន។ លោកអាម៉េដនឹងធ្វើដំណើរទៅកាន់អារ៉ាប៊ីសាអូឌីតនៅថ្ងៃពុធ ទី៦ មករា។
តួនាទីរបស់អារ៉ាប៊ីសាអូឌីត និងអ៊ីរ៉ង់នៅក្នុងវិបត្តិស៊ីរី យេម៉ែន ឬបារ៉ែន
គួររម្លឹកជូនឡើងវិញថា វិបត្តិនយោបាយនៅស៊ីរី នៅបារ៉ែនក៏ដូចជានៅយេម៉ែន គឺបានឆ្លងពីបដិវត្តន៍អារ៉ាប់នៅក្នុងប្រទេសទុយនីស៊ី។ វាជារឿងល្អណាស់ដែលអារ៉ាប៊ីសាអូឌីត និងអ៊ីរ៉ង់ក្នុងនាមជាប្រទេសមានឥទ្ធិពលក្នុងតំបន់បានជួយឈឺឆ្អាលដោះស្រាយ តែបញ្ហានៅត្រង់ថា ទីក្រុងរីយ៉ាដដែលជាមហាអំណាចស៊ុយនីត និងទីក្រុងតេហេរ៉ង់ដែលជាមហាអំណាចស្ហ៊ីអ៊ីតបែរជាកាន់ជើងតែក្រុមនិកាយសាសនារៀងៗខ្លួនទៅវិញ។
ជាក់ស្តែងនៅស៊ីរី ទីក្រុងរីយ៉ាដបានចេញមុខគាំទ្រក្រុមប្រឆាំងរដ្ឋាភិបាលដែលជានិកាយស៊ុយនីត ចំណែកទីក្រុងតេហេរ៉ង់ រួមទាំងក្រុមហេស្បូឡាលីបង់បានចេញមុខគាំទ្ររដ្ឋាភិបាលស៊ីរីរបស់លោកប្រធានាធិបតីអាសាដនិកាយស្ហ៊ីអីត។ វិបត្តិនយោបាយនៅក្នុងប្រទេសយេម៉ែន ក៏ដូចជានៅក្នុងប្រទេសបារ៉ែន អារ៉ាប៊ីសាអូឌីត និងអ៊ីរ៉ង់បានគាំទ្រក្រុមនិកាយរៀងៗខ្លួន។ ឃើញថា ទីក្រុងរីយ៉ាដ និងទីក្រុងតេហេរ៉ង់បានសម្លឹងឃើញដំណោះស្រាយផ្ទុយគ្នារួចទៅហើយនៅក្នុងដំណោះស្រាយនៅស៊ីរី នៅយេម៉ែន ក៏ដូចជានៅបារ៉ែន។
អ្វីដែលសហគមន៍អន្តរជាតិចង់បាននោះ គឺចង់ឲ្យក្រុមជម្លោះផ្ទៃក្នុងនៅស៊ីរី នៅយេម៉ែន ឬនៅបារ៉ែនចូលអង្គុយចរចាទល់មុខគ្នា។ នៅត្រង់ចំណុចនេះ គឺមានតែអារ៉ាប៊ីសាអូឌីត និងអ៊ីរ៉ង់ទេដែលអាចនិយាយបញ្ចុះបញ្ចូលភាគីជម្លោះផ្ទៃក្នុងទាំងនោះបាន។ ខណៈនេះ សហគមន៍អន្តរជាតិហាក់ដូចជាទើសទាល់ចិត្តខ្លាំងណាស់នៅចំពោះមុខវិបត្តិការទូតរវាងអារ៉ាប៊ីសាអូឌីត និងអ៊ីរ៉ង់ពេលនេះ។ តែអារ៉ាប៊ីសាអូឌីតបានចេញមុខធានាថា ទោះបីជាមានវិបត្តិផ្លូវទូតជាមួយអ៊ីរ៉ង់ក្តី ក៏ខ្លួននឹងបន្តប្រឹងប្រែងដើម្បីឲ្យមានសន្តិភាពនៅស៊ីរី និងនៅយេម៉ែន។
សហគមន៍អន្តរជាតិអំពាវនាវរួមគ្នាឲ្យអារ៉ាប៊ីសាអូឌីត និងអ៊ីរ៉ង់អត់ធ្មត់ និងដោះស្រាយដោយសន្តិវិធី
ជាទូទៅគេសង្កេតឃើញថា ទោះបីជាធ្លាប់មានជំហរបែបណាក៏ដោយ ជាសត្រូវ ឬមួយជាសម្ព័ន្ធមិត្តជិតឆ្ងាយរបស់អារ៉ាប៊ីសាអូឌីត និងអ៊ីរ៉ង់ក៏ដោយ ក៏ប្រទេសភាគច្រើន ពិសេសប្រទេសមហាអំណាចគ្រាក់ៗបានបញ្ចេញប្រតិកម្មស្រដៀងគ្នាដោយអំពាវនាវទីក្រុងរីយ៉ាដ និងទីក្រុងតេហេរ៉ង់ឲ្យមានការអត់ធ្មត់ និងព្យាយាមដោះស្រាយវិបត្តិដោយសន្តិវិធី។ គួរជម្រាបជូនថា ក្រៅពីផ្តាច់ទំនាក់ទំនងទូតជាមួយអ៊ីរ៉ង់ អារ៉ាប៊ីសាអូឌីតក៏បានព្យួរចោលរាល់សកម្មភាពពាណិជ្ជកម្មជាមួយទីក្រុងតេហេរ៉ង់។ ស្របគ្នានេះ មានប្រទេសមួយចំនួនដែលប្រកាន់និកាយសាសនាស៊ុយនីតដូចអារ៉ាប៊ីសាអូឌីតក៏បានរួមសាមគ្គីគ្នាប្រឆាំងអ៊ីរ៉ង់ដោយព្យួរទំនាក់ទំនងការទូតដូចគ្នា។
អាមេរិកតាមរយៈលោកប្រមុខការទូតចន ឃ៊ែរីបានទូរស័ព្ទនិយាយផ្ទាល់ជាមួយសមភាគីអារ៉ាប៊ីសាអូឌីត និងអ៊ីរ៉ង់ដោយស្នើឲ្យមានការកាត់បន្ថយភាពតានតឹងរវាងគ្នា។ ប្រទេសរុស្ស៊ីដែលមានជំហរគាំទ្រអ៊ីរ៉ង់ និងរបបស៊ីរីរបស់លោកប្រធានាធិបតីអាសាដបានសុំធ្វើជាអាជ្ញាកណ្តាលនៅក្នុងជម្លោះរវាងអារ៉ាប៊ីសាអូឌីត និងអ៊ីរ៉ង់។ ការចេញមុខឈឺឆ្អាលរបស់ក្រុមប្រទេសមហាអំណាចពេលនេះមកពីគេយល់ឃើញដូចគ្នាថា បើសង្រ្គាមនឹងផ្ទុះឡើងរវាងអារ៉ាប៊ីសាអូឌីត និងអ៊ីរ៉ង់នៅថ្ងៃណាមួយនោះ គឺតំបន់ដើមបូព៌ាទាំងមូលតែម្តងដែលនឹងធ្លាក់ក្នុងភ្លើងសង្រ្គាមមិនអាចគ្រប់គ្រងបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ