ប្រេងឆៅ៖ អង្គការOPECនៅមិនទាន់ត្រៀមខ្លួន កាត់បន្ថយការផលិតប្រេង
តម្លៃប្រេងឆៅក្នុងទីផ្សារអន្តរជាតិនៅថ្ងៃព្រហស្បតិ៍ ទី ៣០កក្កដា បានធ្លាក់ចុះថ្លៃ មកនៅ៤៩ដុល្លារដុល្លារ ក្នុងមួយធុង។ ជាលើកទី ១ គិតតាំងពីខែមីនា ដែលតម្លៃប្រេងឆៅ ធ្លាក់មកនៅក្រោមតម្លៃ ៥០ដុល្លារ។ តម្លៃប្រេងឆៅនៅបន្តធ្លាក់ថ្លៃ ប៉ុន្តែ អគ្គលេខាធិការអង្គការប្រទេសនាំចេញប្រេង OPEC បានប្រកាសសាជាថ្មី កាលពីថ្ងៃព្រហស្បតិ៍ថា គេនៅមិនទាន់មានចំណាត់ការ ចង់កាត់បន្ថយការផលិតប្រេងនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
តម្លៃប្រេងឆៅធ្លាក់ចុះ បានប៉ះពាល់យ៉ាងខ្លាំងដល់សេដ្ឋកិច្ចរបស់ប្រទេសនាំចេញប្រេង ដែលនៅក្នុងនោះ ក៏មានផងដែរ រុស្ស៊ី។ រុស្ស៊ីដែលមិនមែនជាសមាជិករបស់អង្គការ OPEC ចង់ចរចាសុំឲ្យអង្គការប្រទេសនាំចេញប្រេង ពិចារណាឡើងវិញ កាត់បន្ថយការផលិតប្រេង ដើម្បី ធ្វើឲ្យតម្លៃប្រេងឆៅកើនឡើងវិញ។
គិតចាប់តាំងពីឆមាសទី ២ឆ្នាំ២០១៤ តម្លៃប្រេងឆៅធ្លាក់ចុះជាង ៥០ភាគរយ នៅទីផ្សារអន្តរជាតិ ប៉ុន្តែ អង្គការOPEC ដែលផលិតនាំចេញប្រេងច្រើនជាងគេ នៅលើពិភពលោក នៅតែមិនព្រមកាត់បន្ថយបរិមាណផលិតប្រេង។ នៅថ្ងៃព្រហស្បតិ៍ ម្សិលមិញ នៅក្នុងសន្និសីទកាសែតជាមួយរដ្ឋមន្រ្តីថាមពល រុស្ស៊ី ក្នុងទីក្រុងម៉ូស្គូ អគ្គលេខាធិការរបស់អង្គការOPECបានបញ្ជាក់សាជាថ្មីថា OPECនៅមិនទាន់បានត្រៀមខ្លួន ដើម្បីកាត់បន្ថយការផលិតប្រេងនោះទេ។ OPEC នៅតែរក្សាការផលិតប្រេង ឲ្យបាន៣០លានធុង ក្នុងមួយថ្ងៃដដែល។
តាមអ្នកវិភាគ តម្លៃប្រេង ធ្លាក់ចុះនៅទីផ្សារអន្តរជាតិ ក៏ដោយសារតែប្រទេសនាំចេញប្រេងនៅតែបង្កើនការផលិតប្រេង ច្រើនដូចមុន ដដែល នៅក្នុងពេលដែលតម្រូវការប្រេងបានធ្លាក់ថយចុះ ដោយសារតែសេដ្ឋកិច្ចមិនសូវល្អ។
ម្យ៉ាងទៀត ការវិលត្រលប់របស់អ៊ីរ៉ង់ ចូលទៅក្នុងទីផ្សារលក់ប្រេង ក៏ជាក្តីបារម្ភសម្បើម សម្រាប់ប្រទេសផលិតប្រេងផ្សេងទៀត រួមទាំងរុស្ស៊ីដែលជាសម្ព័ន្ធមិត្តរបស់អ៊ីរ៉ង់ផង។ ការដកទណ្ឌកម្មសេដ្ឋកិច្ច ពីអ៊ីរ៉ង់ ពីសំណាក់សហគមន៍អន្តរជាតិ នៅក្រោយអ៊ីរ៉ង់ គោរពកិច្ចព្រមព្រៀងនុយក្លេអ៊ែរស៊ីវិលនោះ នឹងបើកផ្លូវឲ្យអ៊ីរ៉ង់ ប្រទេសសំបូរប្រេងធំទី ៣ក្នុងពិភពលោក នាំចេញប្រេងទៅលក់ច្រើន ជាងមុន នៅក្នុងទីផ្សារអន្តរជាតិ។ ប្រេងសំបូរហូរហៀរ ច្រើនជាងតម្រូវការ នឹងរឹតតែធ្វើ តម្លៃប្រេងឆៅ ធ្លាក់ថ្លៃកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ