អង្គការការពារសិទ្ធិមនុស្សស៊ីរី៖ ការវាយប្រហារតាមផ្លូវអាកាសរបស់រុស្ស៊ី សម្លាប់មនុស្ស៣៧០នាក់
ចាប់តាំងពីថ្ងៃទី ៣០ ខែកញ្ញា ការវាយប្រហាររបស់រុស្ស៊ី នៅប្រទេសស៊ីរី បានសម្លាប់មនុស្ស៣៧០នាក់ ដែលនៅក្នុងនោះ មាន៣៦នាក់ ជាកុមារ។ នេះបើតាមការប្រកាសរបស់អង្គការការពារសិទ្ធិមនុស្សស៊ីរី OSDH។ អង្គការអូតង់កាលពីថ្ងៃអង្គារសំដែងក្តីបារម្ភ ខ្លាចក្រែងមានការប៉ះទង្គិចគ្នា រវាងយន្តហោះចម្បាំងរុស្ស៊ី និងយន្តហោះរបស់សម្ព័ន្ធអន្តរជាតិដឹកនាំដោយអាមេរិក ដែលមានបេសកកម្ម វាយប្រហារក្រុមជីហាតនៃអង្គការរដ្ឋអ៊ីស្លាម នៅស៊ីរី និងអ៊ីរ៉ាក់។
ចុះផ្សាយនៅថ្ងៃ៖
ក្នុងរយៈពេល ២០ ថ្ងៃ ដែលរុស្ស៊ី បានបើកការវាយប្រហារតាមផ្លូវអាកាស នៅស៊ីរី មនុស្ស៣៧០នាក់ រងគ្រោះ ស្លាប់បាត់បង់ជីវិត។ តាមអង្គការការពារសិទ្ធិមនុស្សស៊ីរី ហៅកាត់ថា OSDHមួយភាគបី នៃជនរងគ្រោះ ស្លាប់ ដោយសារការទម្លាក់គ្រាប់បែករបស់យន្តហោះរុស្ស៊ី គឺជាជនស៊ីវិល ដែលនៅក្នុងនោះ ៣៦នាក់ ជាកុមារ។
តាមអង្គការការពារសិទ្ធិមនុស្សស៊ីរី ដែលមានបណ្តាញរបស់ខ្លួន នៅក្នុងទឹកដីស៊ីរី ក្រៅពីប្រជាជនស៊ីវិល ការវាយប្រហារទ័ពអាកាសរបស់រុស្ស៊ីបានសម្លាប់ក្រុមជីហាត នៃអង្គការរដ្ឋអ៊ីស្លាម និងសកម្មប្រយុទ្ធរបស់ក្រុមអាល់នូស្រា ដែលជាបណ្តាញអាល់កៃដា នៅស៊ីរី។ តាមOSDH គ្រាន់តែ នៅចុងសប្តាហ៍មុននេះ ទាហានរបស់ក្រុមជីហាត នៃអង្គការរដ្ឋអ៊ីស្លាម ៤០នាក់បានស្លាប់ នៅក្នុងការវាយប្រហារ របស់យន្តហោះចម្បាំង ដែលគេដឹងថា មិនមែនជារបស់សម្ព័ន្ធអន្តរជាតិ ដឹកនាំដោយអាមេរិក។ មន្ទីរបញ្ចកោន កាលពីថ្ងៃចន្ទ បានបញ្ជាក់ថា ប្រតិបត្តិការរបស់សម្ព័ន្ធអន្តរជាតិ ទើបបានសម្លាប់មេកើយថ្មីមួយទៀត របស់ក្រុមកូរ៉ាសាន ដែលអាមេរិកចាត់ទុកជាក្រុមភេរវនិយមដ៏គ្រោះថ្នាក់សម្រាប់សន្តិសុខអាមេរិក។
នៅថ្ងៃអង្គារ ថ្ងៃខួបទី ២០ ដែលរុស្ស៊ី ចាប់បើកប្រតិបត្តិការទ័ពអាកាសក្នុងប្រទេសស៊ីរី ប្រធានាធិបតីរុស្ស៊ី លោកពូទីន បាននិយាយ ថា ក្រៅពីស៊ីរី អង្គការក្រុមភេរវនិយមកំពុងគ្រោងនឹងពង្រីកដែនឥទ្ធិពលរបស់ខ្លួន នៅក្រៅប្រទេស និងដើរអុកឡុក បង្កអសន្តិសុខ នៅតំបន់ផ្សេងទៀត។ និយាយនៅក្នុងអង្គប្រជុំជាមួយមន្រ្តីយោធា ជាន់ខ្ពស់រុស្ស៊ី មន្រ្តីតុលាការ និងភ្នាក់ងារស៊ើបការណ៍សម្ចាត់រុស្ស៊ី លោកប្រធានាធិបតីរុស្ស៊ី បានប្រកាសដែរថា អន្តរាគមន៍ទ័ពរុស្ស៊ី នៅស៊ីរីបានបង្ហាញថា រុស្ស៊ី មានសមត្ថភាព អាចប្រឈមមុខ រាល់ការគំរាមកំហែង ពីក្រុមភេរវនិយម ឬការគំរាមកំហែងពីប្រភពដទៃទៀត។
ដោយបានការសហការពីរដ្ឋាភិបាលស៊ីរី រុស្ស៊ីបានបញ្ជូនយន្តហោះចម្បាំងទៅទម្លាក់គ្រាប់បែកស្ទើររាល់ថ្ងៃ ទៅលើក្រុមប្រដាប់អាវុធ ដែលរុស្ស៊ី ចាត់ទុកជាទាហានរបស់ក្រុមជីហាតនៃអង្គការរដ្ឋអ៊ីស្លាម ឬក្រុមភេរវនិយម ផ្សេងទៀត។ ប៉ុន្តែ អាមេរិក និងអង្គការអូតង់ រួមទាំងក្រុមប្រឆាំងស៊ីរី សំដែងការសោកស្តាយដែលថា ការវាយប្រហាររបស់រុស្ស៊ី សំដៅមិនត្រឹមតែទៅលើក្រុមជីហាត ប៉ុន្តែ សំដៅផងដែរទៅលើក្រុមទាហានដែលប្រយុទ្ធប្រឆាំងនឹងរដ្ឋាភិបាលស៊ីរី។ លោកAlexandre Vershbow អគ្គលេខាធិការរងរបស់អង្គការអូតង់ កាលពីថ្ងៃអង្គារ បានថ្លែងថា អូតង់កំពុងបារម្ភពីគ្រោះថ្នាក់ បុកយន្តហោះ នៅលើផ្ទៃមេឃស៊ីរី ដែលពេលនេះ គេលែងអាចគ្រប់គ្រងបានដូចមុន។ អូតង់សន្យាបើកកិច្ចប្រជុំបន្ទាន់មួយ នៅសប្តាហ៍ខាងមុខ ដើម្បី រិះរកវិធានការការពារបន្ថែមផ្ទៃអាកាសតួកគី ក្រោយការបើករំលោភចូលយ៉ាងតិច៣ដងរបស់យន្តហោះចម្បាំង រុស្ស៊ី ទៅក្នុងដែនអាកាសតួកគី កាលពីដើមខែតុលានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ