បីឆ្នាំ ក្រោយមេផ្តាច់ការធ្លាក់ពីអំណាច លីប៊ីនៅតែជួបភាពវឹកវរ
អំពើហិង្សានៅតែបន្តកើតមាន និងរឹតតែសាហាវ នៅក្នុងប្រទេសលីប៊ី។ នៅក្នុងរបាយការណ៍ របស់អង្គការការពារសិទ្ធិមនុស្សរបស់អង្គការសហប្រជាជាតិ ដែលចេញផ្សាយកាលពីថ្ងៃអង្គារទី២៣ ធ្នូ ការប្រយុទ្ធ ហែកហួរគ្នា ដ៏ហិង្សា រវាងគូភាគីប្រឆាំង ទាំងពីរបានសម្លាប់មនុស្សជាច្រើនរយនាក់ និងធ្វើឲ្យមនុស្សរាប់ម៉ឺននាក់ត្រូវភៀសខ្លួន ចាកចេញពី ផ្ទះសម្បែង។ នៅក្នុងរបាយការណ៍ មន្រ្តីការពារសិទ្ធិមនុស្សរបស់អង្គការសហប្រជាជាតិមិនខ្លាចនឹងប្រើពាក្យ ឧក្រិដ្ឋកម្មសង្រ្គាមសម្រាប់សំដៅអំពើហិង្សាដែលបង្កដោយគូភាគីជម្លោះទាំងពីរ នៅលីប៊ី។
ចុះផ្សាយនៅថ្ងៃ៖
ស្តាប់ - ០២:២៦
កាលពីឆ្នាំ ២០១១ បន្ទាប់ពីសង្រ្គាមស៊ីវិលអស់រយៈពេល ៨ខែ និងការទម្លាក់គ្រាប់មិនឈប់ឈររបស់កងទ័ពអូតង់ របបផ្តាច់ការកាដាហ្វីបានដួលរលំ នៅប្រទេសលីប៊ី។ លីប៊ីត្រូវធ្លាក់ទៅក្នុងដៃគ្រប់គ្រងរបស់មនុស្សជាច្រើនក្រុម ដោយមានសភាពីរ និងរដ្ឋាភិបាលពីរផ្សេងគ្នា។ ម្ខាងគឺក្រុមអ៊ីស្លាមជ្រុលនិយម និងម្ខាងទៀតជាក្រុមសហគមន៍អន្តរជាតិទទួលស្គាល់។
ការប្រជែងដណ្តើមអំណាច និងទីតាំងភូមិសាស្រ្តរវាងក្រុមប្រដាប់អាវុធ ដែលនៅក្នុងនោះមានតាំងពីក្រុមអ៊ីស្លាមជ្រុលនិយមជាច្រើនក្រុម និងក្រុមប្រដាប់អាវុធ ដែលស្និទ្ធនឹងអតីតមេដឹកនាំកាដាហ្វី ហើយនិងកម្លាំងទ័ពរដ្ឋាភិបាល បានធ្វើឲ្យលីប៊ីនៅតែជាប់ត្រាំត្រែងក្នុងសង្រ្គាមស៊ីវិលបង្ហូរឈាម នោះបើទោះបី របបផ្តាច់ការកាដាហ្វី បានដួលរលំអស់ទៅ ៣ឆ្នាំក្តី។
នៅក្នុងរបាយការណ៍ដែលឧត្តមស្នងការដើម្បីសិទ្ធិមនុស្ស និងបេសកកម្មរបស់អង្គការសហប្រជាជាតិដើម្បីលីប៊ី បានសរសេររួមគ្នា និងចេញផ្សាយកាលពីថ្ងៃអង្គារ គេបានលើកឡើងយ៉ាងច្បាស់ថា ក្នុងរយៈពេលតែ២ខែ (ពីចុងខែសីហាដល់ខែតុលា) ការប្រយុទ្ធគ្នាដ៏ហិង្សារវាងក្រុមប្រដាប់អាវុធ ដែលជាសត្រូវនឹងគ្នា បានសម្លាប់មនុស្សជាង ១០០នាក់ និងធ្វើឲ្យមនុស្សជាង៥០០នាក់ផ្សេងទៀត រងរបួស។
ការប្រយុទ្ធគ្នារវាងក្រុមបដិបក្ខបានបង្កឲ្យមានវិបត្តិសិទ្ធិមនុស្សយ៉ាងធ្ងន់ធ្ងរ ព្រោះថា មនុស្សជាង ១សែន ២ម៉ឺននាក់ត្រូវភៀសខ្លួនចេញពីផ្ទះសម្បែង និងមិនអាចទទួលបានជំនួយអាហារ និងថ្នាំពេទ្យ។ ក្រៅតែពីការបាត់ជីវិតមនុស្សនៅក្នុងជម្លោះប្រដាប់អាវុធរវាងក្រុមជ្រុលនិយមជាច្រើនក្រុមជាមួយទ័ពរដ្ឋាភិបាល របាយការណ៍របស់អង្គការសហប្រជាជាតិបានលើកឡើងផងដែរ ពីបទឧក្រិដ្ឋនានាដែលកើតមាន ដូចជាការចាប់ជំរិតមនុស្ស ការធ្វើទារុណកម្ម និងការកាត់ទោសប្រហារជីវិតក្រៅផ្លូវច្បាប់។ តាមរបាយការណ៍ ក្រុមប្រដាប់អាវុធបានចាប់ជំរិតមនុស្ស ដោយមើលទៅលើសាសនា ក្រុមកុលសម្ព័ន្ធ ឬគណបក្សនយោបាយ។ ការចាប់ជំរិតត្រូវបានធ្វើឡើងដោយក្រុមជម្លោះទំាងសងខាង គឺទាំងខាងក្រុមអ៊ីស្លាម និងទាហានររដ្ឋាភិបាល ដើម្បី ជាការជំរិតទារប្រាក់ផង និងដើម្បីជាថ្នូរទាមទារដោះលែងសមាជិករបស់ខ្លួន ដែលភាគីម្ខាងចាប់ជាចំណាប់ខ្មាំងផង។
ជារួម អ្នកសរសេររបាយការណ៍របស់អង្គការការពារសិទ្ធិមនុស្សរបស់អង្គការសហប្រជាជាតិទាមទារឲ្យគ្រប់ភាគីពាក់ព័ន្ធទាំងពីរ គឺមេដឹកនាំរបស់ក្រុមប្រដាប់អាវុធ និងមន្រ្តីជាន់ខ្ពស់របស់រដ្ឋាភិបាល បញ្ជាឲ្យកូនចៅរបស់ខ្លួនឲ្យឈប់ប្រព្រឹត្តជាបន្ទាន់អំពើហិង្សា ដែលគេចាត់ទុកជាការរំលោភសិទ្ធិមនុស្សនិងជាបទល្មើសផ្ទុយនឹងច្បាប់អន្តរជាតិ។ ដើម្បីទប់ស្កាត់អំពើហិង្សារបស់ទាហាន និងក្រុមប្រដាប់អាវុធថ្នាក់ក្រោម មេបញ្ជាការទ័ពត្រូវតែហ៊ានពិន័យលើអ្នកដែលប្រព្រឹត្តបទឧក្រិដ្ឋ។ នេះជាការអំពាវនាវលោកZeid Ra’ad Al Hussein របស់ប្រធានឧត្តមស្នងការសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ