អគ្គរាជទូតជប៉ុនថ្មីប្រចាំប្រទេសចិនប្តេជ្ញាពង្រីកទំនាក់ទំនងជាមួយចិនអោយបានប្រសើរឡើង
ជាច្រើនខែ បន្ទាប់ពីមាន ជំលោះតានតឹង ជាមួយប្រទេសចិន ក្នុងរឿងប្រជុំកោះ សិនសាគូ នាតំបន់សមុទ្រចិនខាងត្បូងមក ប្រទេសជប៉ុនហាក់ចាប់ផ្តើម សំរាលនូវគោលជំហររបស់ខ្លួន។ នៅថ្ងៃចន្ទនេះ អគ្គរាជទូតជប៉ុនថ្មី លោក ម៉ាសាតូ គីតេរ៉ា ដែលនឹងត្រូវចូលកាន់ដំណែង ប្រចាំការនៅ ប្រទេសចិន ក្នុងពេលឆាប់ៗនេះ បានប្រកាសពីគោលបំណងរបស់ ជប៉ុនក្នុងការ ខំប្រឹងពង្រីកវិស័យទំនាក់ទំនងជាមួយចិន អោយបានប្រសើរឡើងវិញ។ អនាគតនាយករដ្ឋមន្ត្រី ជប៉ុន លោក ស្ហ៊ីនហ្សូ អាបេ ដែលទើបនឹង ព្រមានចិនជុំវិញជម្លោះដណ្តើមប្រជុំកោះ សិនសាគូនា ពេលថ្មីៗនេះ បានសំរាលឥរិយាបថរបស់ខ្លួន កាលពីថ្ងៃសៅរ៍កន្លងមក ដោយសន្យាថាជប៉ុននឹងប្រឹងប្រែង ធ្វើការទាក់ទង សហប្រតិបត្តការជាមួយចិន ឡើងវិញ ក្នុងដំនើរការស្វែងរកប្រយោជន៍យុទ្ធសាស្ត្ររួម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
លោក ម៉ាសាតូ គីតេរ៉ា អគ្គរាជទូតជប៉ុនថ្មីប្រចាំប្រទេសចិន បានប្រាប់ទូរទស្សន៍ NHK របស់ជប៉ុនថា “ខ្ញុំនឹងពន្យល់ដល់អ្នកដឹកនាំចិននានា ថា ជប៉ុននឹងពង្រឹងអោយទំនាក់ទំនងសេដ្ឋកិច្ចជាមួយចិន មានភាពរស់រវើកឡើងវិញ បើទោះជា ទំនាក់ទំនងនយោបាយរវាងប្រទេសទាំងពីរ មានភាពតឹងតែងក៏ដោយ ព្រោះថា សកម្មភាពការងាររបស់ក្រុមហ៊ុនជប៉ុន ជាការចូលរួមលើកស្ទួយសេដ្ឋកិច្ចរបស់ប្រទេសចិន។ ជប៉ុននិងចិនត្រូវតែ ផ្លាស់ប្តូរទំនាក់ទំនងគ្នា ក្នុងវិស័យផ្សេងៗទៀត ដើម្បីបន្ថយនូវស្ថានភាពតានតឹង រវាងប្រទេសទាំងពីរ” ។
ប្រទេសជប៉ុន ហាក់សំរាលនូវឥរិយាបថរបស់ខ្លួន បន្ទាប់ពីមាន ជំលោះតានតឹង ជាមួយប្រទេសចិន ទាក់ទងរឿងប្រជុំកោះ សិនសាគូ នាតំបន់សមុទ្រចិនខាងត្បូង អស់រាប់ខែមក។ ប្រជុំកោះ សិនសាគូ ស្ថិតនៅ ២០០គីឡូម៉ែត្រ ភាគឥសានពីឆ្នេរប្រទេសតៃវ៉ាន់ និង ៤០០ គីឡូម៉ែត្រ ខាងលិចកោះជប៉ុន អូគីណាវ៉ា។ ប្រជុំកោះនេះ ជាកន្លែងដែលគ្មានមនុស្សរស់នៅ។ ចិន និងជប៉ុន បានឈ្លោះដណ្តើមបូរណភាពដែនដី រៀងៗខ្លួន ក្នុងតំបន់កោះនេះ។
ស្ថានភាពជំលោះ មានលក្ខណៈកាន់តែតឹងតែងខ្លាំង ចាប់ពីខែ កញ្ញាកន្លងមក នៅពេលដែលជប៉ុន បានទិញដីមួយភាគនៃប្រជុំកោះ នេះពីឯកជន យកមកធ្វើជាកម្មសិទ្ធិ របស់ជាតិខ្លួន។ បន្ទាប់ពីនោះ មក ប្រជាជនចិនបាននាំគ្នាបញ្ឈប់ការប្រើប្រាស់ ផលិតផលជប៉ុន ពិសេស ផលិតផលរថយន្ត ដែលធើ្វអោយការលក់រថយន្តជប៉ុន នៅក្នុងប្រទេសចិន ថយចុះ ជាង ៨៤ភាគរយ។
ដើម្បីបន្ធូរបន្ថយនូវភាពតានតឹងទាំងនេះ អនាគតនាយករដ្ឋមន្ត្រី ជប៉ុន លោក ស្ហ៊ីនហ្សូ អាបេ ត្រៀមនឹង ផ្តល់លិខិតសុំធ្វើការផ្សះផ្សារជាមួយចិន នៅខែមករា ខាងមុខនេះ តាមរយៈបេសកកម្មរបស់លោក កូម៉ូរ៉ា អនុប្រធានាធិបតី នៃគណបក្សអភិរក្សនិយមជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ