លោកអូបាម៉ា ៖ ឱកាសនៃការរាតត្បាតមេរោគអេបូឡានៅអាមេរិក មានកម្រិតទាបណាស់
លោកប្រធានាធិបតីអាមេរិក បារ៉ាក់ អូបាម៉ា បានលើកឡើងនៅថ្ងៃចន្ទទី៦តុលាថា ឱកាសនៃការរាតត្បាតមេរោគអេបូឡានៅសហរដ្ឋអាមេរិក គឺមានកម្រិតទាបណាស់។ ការបញ្ជាក់នេះ ធ្វើឡើងបន្ទាប់ពីអ្នកផ្ទុកមេរោគអេបូឡាម្នាក់ ត្រូវគេរកឃើញនៅរដ្ឋតិចសាស់ សហរដ្ឋអាមេរិក កាលពីចុងខែកញ្ញាកន្លងទៅ។ មេរោគអេបូឡាដ៏កាចសាហាវ បានសម្លាប់មនុស្សអស់ជាង៣ពាន់៤រយនាក់ហើយ រហូតមកទល់ពេលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
នៅថ្ងៃចន្ទទី៦តុលា បន្ទាប់ពីបានស្ដាប់មន្ដ្រីសុខាភិបាលកំពូលៗធ្វើបទបង្ហាញពីយុទ្ធសាស្ត្ររបស់អាមេរិក ប្រឆាំងនឹងការរីករាតត្បាតនៃមេរោគអេបូឡាដ៏កាចសាហាវ លោកអូបាម៉ា បានលើកឡើងថា មេរោគអេបូឡាជាបញ្ហាប្រឈមមួយ ដែលអាមេរិកត្រូវចាត់វិធានការយ៉ាងម៉ឺងម៉ាត់ បើទោះបីជាឱកាសនៃការរាតត្បាតមេរោគនេះនៅសហរដ្ឋអាមេរិក នៅមានកម្រិតទាបយ៉ាងណាក្ដី។
ការបញ្ជាក់នេះ ធ្វើឡើងបន្ទាប់ពីអ្នកផ្ទុកមេរោគអេបូឡាម្នាក់ ត្រូវគេរកឃើញនៅរដ្ឋតិចសាស់ សហរដ្ឋអាមេរិក កាលពីចុងខែកញ្ញាកន្លងទៅ។
បើតាមលោកអូបាម៉ា មេរោគអេបូឡាពិបាកនឹងរាតត្បាតនៅអាមេរិកដោយសារតែ អាមេរិកមានប្រព័ន្ធសុខាភិបាល ទំនើប មានមន្ទីរពេទ្យ បណ្តាញប្រយុទ្ធប្រឆាំងនឹងមេរោគអេបូឡា និងកំពុងធ្វើពិសោធន៍ដើម្បីផលិតថ្នាំព្យាបាលជម្ងឺអេបូឡា។ និងការពិតមួយទៀតគឺថា មេរោគអេបូឡានេះ មិនងាយចម្លងពីមនុស្សម្នាក់ ទៅមនុស្សម្នាក់ទៀតឡើយ។ គេមិនអាចឆ្លងមេរោគអេបូឡាតាមផ្លូវដកដង្ហើម ទេ ប៉ុន្តែ តាមការប៉ះពាល់វត្ថុជាតិរាវ ដូចជាឈាម ទឹកមាត់ ឬញើស របស់អ្នកដែលចេញរោគសញ្ញាអេបូឡា។
ទោះជាយ៉ាងនេះក្ដី សហរដ្ឋអាមេរិកបានដាក់ចេញនូវវិធានការចម្បងៗមួយចំនួន ដើម្បីប្រឆាំងនឹងការឆ្លង ឬការរីករាលដាលនៃមេរោគអេបូឡានៅអាមេរិក។ ក្នុងនោះ អ្នកដំណើរដែលចូលមកកាន់ព្រលានយន្តហោះនៅអាមេរិកទាំងអស់ នឹងត្រូវត្រួតពិនិត្យបន្ថែម ដើម្បីស្វែងរកមុខសញ្ញានៃមេរោគអេបូឡា។
ជាមួយគ្នានេះដែរ លោកអូបាម៉ាក៏បានគូសបញ្ជាក់ថា លោកនឹងដាក់សម្ពាធទៅលើបណ្ដាប្រទេសសម្ព័ន្ធមិត្តរបស់ខ្លួន ឲ្យរួមចំណែកច្រើនជាងនេះទៅទៀត ដើម្បីប្រឆាំងនឹងមេរោគអេបូឡា។ លោកថា ប្រទេសធំៗមួយចំនួន នៅមិនទាន់រួមចំណែកគ្រប់គ្រាន់នៅឡើយទេ ទាក់ទងនឹងការរាតត្បាតនៃមេរោគអេបូឡា។ មេរោគអេបូឡា ដែលរហូតមកទល់ពេលនេះ បានសម្លាប់មនុស្សអស់ជាង៣ពាន់៤រយនាក់ហើយ ក្នុងចំណោមករណីឆ្លងជាង៧ពាន់៤រយករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ