លីបេរីយ៉ាគ្រោងប្តឹងជនជាតិលីបេរីយ៉ាដែលនាំអេបូឡាទៅអាមេរិក
ក្នុងចំណោមប្រទេសបីដែលរងគ្រោះមុនគេដោយមេរោគអេបូឡានៅអាហ្រ្វិកខាងលិច លីបេរីយ៉ាដែលសំបូរអ្នកជម្ងឺ និងមនុស្សស្លាប់ដោយមេរោគអេបូឡា បានប្រកាសកាលពីថ្ងៃសុក្រទី ៣តុលាថា មេរោគអេបូឡាបានរាតត្បាតទៅដល់គ្រប់ខេត្តទាំងអស់របស់ប្រទេស។ ប្រធានាធិបតីលីបេរីយ៉ាអំពាវនាវរកការគាំទ្រពីអង្គការសហប្រជាជាតិដើម្បីប្រយុទ្ធប្រឆាំងនឹងមេរោគអេបូឡានៅទីជនបទ ជាទីដែលអ្នកជម្ងឺបានរត់ទៅសំងំលាក់ខ្លួន ឆ្ងាយពីទីក្រុង។ អ្នកជម្ងឺជាតិលីបេរីយ៉ាម្នាក់ក៏ទើបរកឃើញនៅក្នុងទឹកដីអាមេរិក រហូតធ្វើឲ្យអាជ្ញាធរអាមេរិកបានសម្រេច កាលពីថ្ងៃព្រហស្បតិ៍ ដាក់ឃុំដាច់ដោយឡែក មនុស្សជាង១០០នាក់ ដែលធ្លាប់មានទំនាក់ទំនងជាមួយអ្នកជម្ងឺលីបេរីយ៉ា នៅរដ្ឋតិចសាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
នៅចំពោះមុខការរាតត្បាតយ៉ាងខ្លាំងក្លារបស់មេរោគអេបូឡា ប្រទេសលីបេរីយ៉ាអស់សង្ឃឹម អស់លទ្ធភាពដើម្បីប្រយុទ្ធប្រឆាំងនឹងមេរោគអេបូឡា តទៅទៀត។ តាមលោកស្រីប្រធានាធិបតីលីបេរីយ៉ា គ្រប់ខេត្តទាំង១៥របស់លីបេរីយ៉ាបានផ្ទុះកើតជម្ងឺអេបូឡា បន្ទាប់ពីប្រជាជនដែលមានផ្ទុកមេរោគបានរត់ចាកចេញពីទីក្រុង ទៅសំងំព្យាបាលតាមបែបបុរាណនៅទីជនបទ។
យោងតាមរបាយការណ៍ចុងក្រោយរបស់អង្គការសុខភាពពិភពលោក មេរោគអេបូឡាបានសម្លាប់មនុស្ស ៣៣៣៨នាក់ ក្នុងចំណោមចំនួនឆ្លងជាង ៧ពាន់ករណី។ ហើយចំនួនពាក់កណ្តាលនៃអ្នកស្លាប់ដោយមេរោគអេបូឡា គឺជាជនជាតិលីបេរីយ៉ា។
នៅថ្ងៃសុក្រ ប្រធានាធិបតីលីបេរីយ៉ាលោកស្រី Ellen Johnson Sirleaf បានសំដែងការសោកស្តាយ និងខឹងសម្បារ ដែលបុរសជាតិលីបេរីយ៉ា លោកDuncan បាននាំមេរោគអេបូឡាទៅក្នុងទឹកដីអាមេរិក ក្នុងពេលអាមេរិកជាអ្នកផ្តល់ជំនួយដ៏សំខាន់ក្នុងយុទ្ធនាការប្រឆាំងនឹងមេរោគអេបូឡា នៅលីបេរីយ៉ា។ តាមលោកស្រីប្រធានាធិបតីលីបេរីយ៉ា រដ្ឋាភិបាលនឹងចាត់ការជាមួយលោកDuncan នៅពេលលោកជះស្បើយពីជម្ងឺ។
កាលពីថ្ងៃព្រហស្បតិ៍ ប្រធានអាកាសចរណ៍ជាតិលីបេរីយ៉ាបានបង្ហាញពីការប៉ុនប៉ងប្តឹង លោកDuncan ទៅតុលាការលីបេរីយ៉ា។ តាមអាជ្ញាធរលីបេរីយ៉ា លោកDuncan បានភូតភរ នៅក្នុងពេលលោកចុះព័ត៌មាន មុនពេលឡើងយន្តហោះ។ លោកDuncan បានគូសប្រអប់ដែលសរសេរថា លោកគ្មានប៉ះពាល់អ្នកជម្ងឺអេបូឡា ប៉ុន្តែ តាមក្រុមស៊ើបអង្កេតលីបេរីយ៉ា នៅ៤ថ្ងៃមុនឡើងយន្តហោះ សំដៅអាមេរិក លោកDuncan បានដឹកជញ្ជូនអ្នកជិតខាងរបស់គាត់ម្នាក់ ដែលបានស្លាប់ដោយមេរោគអេបូឡា។
នៅអាមេរិក បន្ទាប់ពីរកឃើញថា ជនជាតិលីបេរីយ៉ា Duncan មានផ្ទុកមេរោគអេបូឡា ក្នុងរដ្ឋតិចសាស់ អាជ្ញាធរបានប្រកាសដាក់ឃាំង ដាក់ឲ្យដាច់ដោយឡែក មនុស្សជាង១០០នាក់ ដែលធ្លាប់ពាក់ព័ន្ធ ផ្ទាល់ និងប្រយោលជាមួយអ្នកជម្ងឺជាតិលីបេរីយ៉ា។ សមាជិកគ្រួសាររបស់លោក Duncan ត្រូវគេបញ្ជាឲ្យស្ថិតនៅក្នុងផ្ទះ មិនចេញក្រៅទាល់តែសោះ ក្នុងរយៈពេល ២១ថ្ងៃ (រយៈពេលដែលបញ្ជាក់ថា គេឆ្លង ឬមិនឆ្លងមេរោគអេបូឡា)។ នៅថ្ងៃសុក្រ អ្នកថតយកព័ត៌មានរបស់ទូរទស្សន៍អាមេរិក NBC ម្នាក់ ដែលបានក្លាយជាជនជាតិអាមេរិកទី៤ ដែលឆ្លងមេរោគអេបូឡា ត្រូវបានបញ្ជូនត្រលប់ទៅព្យាបាលនៅអាមេរិក។
អង្គការគ្រូពេទ្យគ្មានព្រំដែនវិញបានសំដែងការខកចិត្តដែលជំនួយរបស់ប្រទេសជាច្រើនមិនសមស្របនឹងស្ថានការណ៍នៅអាហ្វ្រិកខាងលិច។ ក្រុមគ្រូពេទ្យគ្មានព្រំដែនដែលមានបុគ្គលិកបម្រើការ៣ពាន់នាក់ បានអំពាវនាវសុំឲ្យគេផ្តល់ជំនួយជាគ្រឿងបរិក្ខាពេទ្យ និងអ្នកជំនាញសុខាភិបាល ជាជាងផ្តល់កញ្ចប់លុយ។ ដោយសារតែរឿងនេះ អង្គការពេទ្យគ្មានព្រំដែនបានបដិសេធជំនួយជាទឹកប្រាក់របស់ប្រទេសអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ