សមាជិកសភាបក្សប្រឆាំង៖ រដ្ឋាភិបាលមិនត្រូវប្រើកម្លាំងទ័ព និងតុលាការគំរាមកំហែងកសិករខ្មែរ
ក្រុមសមាជិកសភាគណបក្សសង្រ្គោះជាតិបានសុំឲ្យរដ្ឋាភិបាលកម្ពុជា ទទួលស្គាល់កំហុសរបស់ខ្លួន ហើយមិនត្រូវប្រើកម្លាំងទ័ព និងកម្លាំងតុលាការទៅគំរាមកំហែងកសិករខ្មែរ ដែលកំពុងទាមទារការដោះស្រាយលើបញ្ហាតម្លៃស្រូវ ដែលរដ្ឋាភិបាលជាអ្នកទទួលខុសត្រូវនោះទេ។ ការទាមទាររបស់សមាជិកសភាគណបក្សប្រឆាំង ធ្វើឡើងក្រោយពីមានការតវ៉ាពីតម្លៃស្រូវផ្ទុះឡើងនៅក្នុងស្រុកសង្កែ ខេត្តបាត់ដំបងកាលពីថ្ងៃម្សិលមិញ។
ចុះផ្សាយនៅថ្ងៃ៖
ស្តាប់ - ០២:១៥
ក្រុមតំណាងរាស្ត្រពីគណបក្សសង្រ្គោះជាតិបានលើកឡើងក្នុងសេចក្តីថ្លែងការណ៍ចុះថ្ងៃទី១៩ កញ្ញាថា មូលហេតុដែលធ្វើឲ្យមានការតវ៉ាពីកសិករក្នុងស្រុកសង្កែខេត្តបាត់ដំបង កាលពីថ្ងៃទី១៨ ខែកញ្ញា ពីតម្លៃស្រូវធ្លាក់ចុះ គឺជាលទ្ធផលដែលបានកើតជាបណ្តើរៗ ពីនយោបាយខុសរបស់រដ្ឋាភិបាល ដែលដឹកនាំដោយគណបក្សប្រជាជនកម្ពុជា។
តាមរយៈសេចក្តីថ្លែងការណ៍នោះ សមាជិកសភាបក្សប្រឆាំងបានលើកយកអ្វី ដែលខ្លួនហៅថានយោបាយខុសរបស់រដ្ឋាភិបាល៦ចំណុច រួមមានៈ ការផ្តល់ដីសម្បទានសេដ្ឋកិច្ច៩៩ឆ្នាំធ្វើឲ្យកសិករបាត់បង់ដី ការពុំបានជួយកាត់បន្ថយការចំណាយលើថ្លៃផលិតរបស់កសិករ ការពុំបានផ្តល់ជំនួយបច្ចេកទេសដល់កសិករបានទូលាយ ការពុំបានបង្កើតមូលដ្ឋានទីផ្សារកសិផល ការចំណាយថវិកាជាតិសង់ប្រព័ន្ធធារាសាស្ត្រដែលគ្មានប្រសិទ្ធភាព និងការគ្មានគោលនយោបាយកាត់បន្ថយ អត្រាការប្រាក់ខ្ពស់ចំពោះកសិករ។
យ៉ាងណាមិញតំណាងរាស្ត្រគណបក្សប្រឆាំងក៏បានទាមទារឲ្យមាននយោបាយត្រឹមត្រូវ ដើម្បីលើកស្ទួយជីវភាពកសិករខ្មែរ ក្នុងនោះរដ្ឋាភិបាលត្រូវផ្តល់ដីធ្លី មធ្យោបាយ និងបច្ចេកទេសសម្រាប់ការបង្កបង្កើនផល និងបង្កើតទីផ្សារសម្រាប់លក់កសិផលរបស់កសិករ។ ក្នុងសេចក្តីថ្លែងការណ៍នោះ ក្រុមតំណាងរាស្ត្រសង្រ្គោះជាតិ បានសុំឲ្យរដ្ឋាភិបាលទទួលស្គាល់កំហុសរបស់ខ្លួន ហើយត្រូវរៀបចំកែលម្អ ដើម្បីសង្រ្គោះកសិករខ្មែរ។
ការទាមទារក៏ដូចជាការអំពាវនាវរបស់ក្រុមសភាគណបក្សសង្រ្គោះជាតិ ធ្វើឡើងក្រោយពីប្រជាកសិករក្នុងស្រុកសង្កែ ខេត្តបាត់ដំបង បានប្រមូលផ្តុំគ្នាបិទផ្លូវជាតិលេខ៥ កាលពីថ្ងៃទី១៨ ខែកញ្ញា ដើម្បីទាមទារឲ្យអាជ្ញាធរជួយអន្តរាគមន៍ដោះស្រាយបញ្ហាតម្លៃស្រូវ ដែលបានធ្លាក់ចុះខ្លាំងក្រោយពេលប្រមូលផល។
ក្នុងថ្ងៃជាមួយគ្នានៃការបិទផ្លូវទាមទារឲ្យមានការអន្តរាគមនដោះស្រាយតម្លៃស្រូវនោះ លោកផៃ ស៊ីផានអ្នកនាំពាក្យរដ្ឋាភិបាលបានសរសេរក្នុងហ្វេសប៊ុករបស់លោកថាជន ឬក្រុមទុច្ចរិតទាំងឡាយណា ដែលយករបៀបវារៈ តម្លៃស្រូវនេះ ជាមធ្យោបាយគៀងគរ ដើម្បីបង្កភាពចលាចល ប្រឆាំងនឹងសណ្តាប់ធ្នាប់សង្គម និងត្រូវតែ ទទួលខុសត្រូវចំពោះមុខច្បាប់។ លោកបញ្ជាក់ថា រាជរដ្ឋាភិបាលនឹងចាត់វិធានការ ដ៏ម៉ឺងម៉ាត់ចំពោះភាពញុះញង់នេះ៕
នៅថ្ងៃទី១៩ កញ្ញា នេះលោកនាយករដ្ឋមន្ត្រីហ៊ុន សែនបានបញ្ជាក់ជាថ្មីថារដ្ឋាភិបាលបានបញ្ចេញថិវកាប្រមាណ២០លានដុល្លារអាមេរិក និងថវិការបស់ធនាគារអភិវឌ្ឍន៍ជនបទ៧លានដុល្លារអាមេរិក មានសមត្ថភាពអាចទិញស្រូវពីកសិករប្រមាណ១០ម៉ឺនតោន ក្នុងតម្លៃមិនទាប៨៤ម៉ឺនរៀលក្នុង១តោន។ លោកនាយករដ្ឋមន្ត្រីក៏បានអំពាវនាវដល់គ្រឹះស្ថានមីក្រូហិរញ្ញវត្ថុកុំប្តឹងតុលាការរឹបអូសផ្ទះប្រជាកសិករ ឬដីធ្លីគាត់ ហើយយោគយល់ពន្យារពេលសង ឬបន្ថយការប្រាក់។
ចំណែកវិធានការរយៈពេលមធ្យមលោកនាយករដ្ឋមន្ត្រីបញ្ជាក់ថាកម្ពុជាត្រូវការពីចិន៣០០លានដុល្លារ ដើម្បីកសាងរោងម៉ាស៊ិនកិនស្រូវ ឡសម្ងួត ឃ្លាំងស្តុក និងជាទុនសម្រាប់ទិញស្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ