សភាអង់គ្លេសអនុម័តអោយអង់គ្លេសសង់នាវាមុជទឹកនុយក្លេអ៊ែរថ្មី ជំនួសនាវាចាស់
យប់ថ្ងៃចន្ទម្សិលមិញ សភាអង់គ្លេសបានបោះឆ្នោតអនុម័តអោយរដ្ឋាភិបាលអង់គ្លេសសង់នាវាមុជទឹកនុយក្លេអ៊ែរ Trident ចំនួន៤គ្រឿង ដើម្បីជំនួសនាវាមុជទឹកចាស់។ ការសម្រេចសាងសង់នាវាមុជទឹកនុយក្លេអ៊ែរថ្មីនេះ សបង្ហាញថា អង់គ្លេសខិតខំរក្សាឈ្មោះខ្លួនថា ជាប្រទេសមហាអំណាចពិភពលោក។
ចុះផ្សាយនៅថ្ងៃ៖
ស្តាប់ - ០១:០៨
សម្រាប់គម្រោងសាងសង់នាវាមុជទឹកនុយក្លេអ៊ែរ៤គ្រឿងថ្មី ដើម្បីជំនួសនាវាមុជទឹកចាស់ អង់គ្លេសអាចចំណាយទឹកប្រាក់៣៧លានអឺរ៉ូ។ យប់ថ្ងៃចន្ទម្សិលមិញ សមាជិកសភាបានអនុម័តអោយមានការសាងសង់នាវាមុជទឹកនុយក្លេអ៊ែរនេះឡើង ជាមួយសម្លេងអនុម័ត ៤៧២សម្លេង ទល់នឹងសម្លេងប្រឆាំង១១៧សម្លេង។
នាយករដ្ឋមន្ត្រីថ្មី ថេរេសា មៃ បានការពារគម្រោងសាងសង់នេះ ដោយចាត់ទុកថា វាជាការធានាបាននូវសុវត្ថិភាពសន្តិសុខរបស់អង់គ្លេស។ យោងតាមលោកស្រី ថេរេសា មៃ អង់គ្លេសមិនអាចបោះបង់នាវាមុជទឹកនុយក្លេអ៊ែរទេ។ នាវាមុជទឹកនេះ អាចជួយលើកទឹកចិត្តប្រទេសសម្ព័ន្ធមិត្តនានា ហើយក៏បំបាក់ទឹកចិត្តសត្រូវរបស់អង់គ្លេសដែរ។
ជាការកត់សម្គាល់ សមាជិកសភាជាង៧០ភាគរយ មកពីគណបក្សការងារដែលជាបក្សប្រឆាំង បានបោះឆ្នោតគាំទ្រអោយមានការសាងសង់នាវាទាំងនេះ តាមការចង់បានរបស់រដ្ឋាភិបាលអភិរក្សនិយម។ ប៉ុន្តែ ប្រធានបក្សប្រឆាំងនៅបក្សការងារ គឺលោក ចេរេមី ឃរប៊ីន ជាអ្នកជំទាស់ដាច់អហង្កា នូវការសាងសង់នាវាមុជទឹកនុយក្លេអ៊ែរថ្មី។ សម្រាប់លោកឃរប៊ីន ការសាងសង់នេះត្រូវចំណាយថវិកាសន្ធឹកសន្ធាប់ ហើយការដែលអង់គ្លេសមានអាវុធប្រល័យលោកដូច្នេះ គឺជាការប៉ះពាល់ដល់ផ្នែកសីលធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ