មេដឹកនាំក្រុមជីហាតរដ្ឋអ៊ីស្លាមហ្វីលីពីនប្រហែលជាបានរត់គេចពីតំបន់Marawiភាគខាងត្បូង
កងទ័ពហ្វីលីពីនបានផ្តល់ដំណឹងនៅថ្ងៃសៅរ៍២៤មិថុនានេះ ថាមេដឺកនាំក្រុមភេរវជនជីហាតរដ្ឋអ៊ីស្លាម នៅហ្វីលីពីន ដែលមានឈ្មោះថា Isnilon Hapilon អ៊ីនីឡុង ហាពីឡុង ទំនងជាបានរត់គេចខ្លួនពីតំបន់ Marawiភាគខាងត្បូងហ្វីលីពីន។ កងទ័ពព្យាយាមដើម្បីទទួលបានការគូសបញ្ជាក់ច្បាស់លាស់ពីព័ត៌មានទាក់ទងការរត់គេចខ្លួននេះ។ ៥សប្តាហ៍មកនេះ នៅតំបន់Marawi កងទ័ពនិងក្រុមជីហាតកំពុងប្រយុទ្ធគ្នា យ៉ាងស្វិតស្វាញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
យោងតាមផ្នែកយោធាហ្វីលីពីន អ៊ីនីឡុង ហាពីឡុង ដែលជាមេក្រុមជីហាតរដ្ឋអ៊ីស្លាម ទំនងជាបានគេចខ្លួន ពីតំបន់Marawi ភាគខាងត្បូង។ ទាហានហ្វីលីពីនដែលកំពុងប្រយុទ្ធជាមួយក្រុមជីហាត នៅតំបន់នេះ ពុំបានឃើញហាពីឡុង ក្នុងសមរភូមិប្រយុទ្ធទេ។ ទាហានហ្វីលីពីនបានតាមរកចាប់មេដឹកនាំក្រុមជីហាតរដ្ឋអ៊ីស្លាម ហាពីឡុងរូបនេះ តាំងពីខែមុនម្ល៉េះ។
ហាពីឡុង ជាមេក្រុមភេរវជនអាប៊ូ សាយ៉ាហ្វ។ ក្រុមអាប៊ូសាយ៉ាហ្វ បោះទីតាំងនៅប្រជុំកោះមីនដាណាវ។ ក្រុមនេះបានចាប់ជំរិតជនជាតិហ្វីលីពីននិងជនបរទេសរាប់រយនាក់ក្នុងឆ្នាំ១៩៩០។ មេក្រុមជីហាតរដ្ឋអ៊ីស្លាម ហាពីឡុង ព្យាយាមបង្រួបបង្រួមក្រុមប្រយុទ្ធផ្សេងៗនៅហ្វីលីពីន ដែលគាំទ្រក្រុមជីហាតរដ្ឋអ៊ីស្លាម។ អាមេរិកចាត់ទុកហាពីឡុង ជាភេរវជនមានគ្រោះថ្នាក់បំផុត។ អាមេរិកបានប្រកាសផ្តល់រង្វាន់៥លានដុល្លារ បើសិនគេរកឃើញអ៊ីនីឡុង ហាពីឡុង។
កងទ័ពហ្វីលីពីននិងក្រុមជីហាតរដ្ឋអ៊ីស្លាមប្រយុទ្ធគ្នា នៅតំបន់Marawi ភាគខាងត្បូង តាំងពីថ្ងៃ២៣ឧសភាមក។ Marawi ជាក្រុងមានអ្នកកាន់សាសនាអ៊ីស្លាមរស់នៅច្រើន។ សកម្មជនប្រយុទ្ធដែលប្រកាសថាមកពីក្រុមជីហាតរដ្ឋអ៊ីស្លាម បានកាន់កាប់សង្កាត់ទាំងមូលនៅ Marawiកាលពីខែមុន។ សកម្មជនជីហាតបរទេសមកពីម៉ាឡេស៊ី និងឥណ្ឌូណេស៊ី ក៏ចូលរួមប្រយុទ្ធនៅតំបន់នេះដែរ។
៥សប្តាហ៍មកនេះ ការប្រយុទ្ធរវាងកងទ័ពនិងក្រុមជីហាត ធ្វើអោយសកម្មជនជីហាតស្លាប់ជាងពាក់កណ្តាល គឺមានស្លាប់សកម្មជនអ៊ីស្លាមជិត៣០០នាក់ ហើយទាហានហ្វីលីពីនដែលបាត់បង់ជីវិតវិញមាន៦៧នាក់។ តំបន់ភាគខាងត្បូង Marawi មានប្រជាជន២សែននាក់។ ប្រជាជនស្ទើរតែគ្រប់គ្នា បាននាំគ្នាភៀសខ្លួន ក្រោយសកម្មជនបះបោររាប់រយនាក់ លើកទង់ជ័យក្រុមជីហាតរដ្ឋអ៊ីស្លាម ថ្ងៃ២៣ឧសភាមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ