កូរ៉េខាងជើងអនុញ្ញាតអោយម្តាយអ្នកទោសអាមេរិកបានទៅជួបកូនប្រុសខ្លួន
សារព័ត៌មានបារាំងAFP បានចុះផ្សាយនៅថ្ងៃសុក្រនេះថា កូរ៉េខាងជើងបានអនុញ្ញាតអោយម្តាយអ្នកទោសអាមេរិកមួយរូបដែលមានដើមកំណើតជាជនជាតិកូរ៉េនោះ បានចូលទៅកាន់ទឹកដីខ្លួន ដើម្បីជួបនឹងកូនប្រុសគាត់ដែលកំពុងមានជំងឺនោះ។ ការអនុញ្ញាតរបស់រដ្ឋាភិបាលក្រុងព្យុងយ៉ាងបែបនេះ ជាការអនុញ្ញាតក្នុងករណីពិសេស ខណៈ ថ្មីៗនេះ កូរ៉េខាងជើងបានលុបចោលមិនអោយមានជំនួបគ្រួសារកូរ៉េ ដែលបានបែកបាក់គ្នាក្នុងសម័យសង្គ្រាមកូរ៉េ។
ចុះផ្សាយនៅថ្ងៃ៖
ស្តាប់ - ០១:៤៨
យោងតាមសារព័ត៌មានបារាំង AFP នៅថ្ងៃសុក្រនេះ អ្នកស្រី សុង ម្យុនហេ ដែលជាម្តាយអ្នកទោសអាមេរិក បានមកដល់ក្រុងព្យុងយ៉ាង កាលពីថ្ងៃព្រហស្បតិ៍ម្សិលមិញ ដើម្បីជួបជាមួយកូនប្រុសគាត់ គឺលោក Kenneth Bae ដែលកំពុងព្យាបាលជំងឺនោះ។ អ្នកស្រី សុង នឹងស្ថិតនៅក្នុងទឹកដីកូរ៉េខាងជើង រយៈពេល៥ថ្ងៃ ហើយអ្នកស្រីនឹងបានជួបកូនប្រុសនៅប៉ុន្មានថ្ងៃខាងមុខនេះ។
គួររំលឹកថា អ្នកទោសអាមេរិក Kenneth Bae អាយុ៤៥ឆ្នាំ មានដើមកំណើតជាជនជាតិកូរ៉េ ឈ្មោះដើមគាត់ គឺ Pae Jun-ho ប៉ា ជុនហូ។ អាជ្ញាធរក្រុងព្យុងយ៉ាង បានឃាត់ខ្លួនគាត់ កាលពីខែវិច្ឆិកា ឆ្នាំ២០១២ ដោយបានចោទគាត់ថា ជាអ្នកផ្សាយលទ្ធិព្រះយេស៊ូ ដែលចង់បង្កអស្ថិរភាពក្នុងទឹកដីកូរ៉េខាងជើង។ លោក ខេណេត បេ ត្រូវកូរ៉េខាងជើងសំរេចដាក់ទោសអោយធ្វើការក្នុងជំរំលត់ដំ រយៈពេល ១៥ឆ្នាំ។ កាលពីថ្ងៃ១៥ ខែសីហា ខេណេត បេ ត្រូវបានគេបញ្ជូនទៅមន្ទីរពេទ្យ ដោយសារតែគាត់មានបញ្ហាថ្លើម និងតំរងនោម។
អ្នកស្រី សុង ម្យុនហេ ជាម្តាយ ធ្លាប់សំដែងការព្រួយបារម្ភ ដោយសារតែតាមរយៈរូបភាពវីដេអូមួយ អ្នកស្រីស្ទើរតែមើលមិនស្គាល់ លោក ខេណេត បេ។ សមាជិកគ្រួសារអ្នកទោសអាមេរិករូបនេះ ធ្លាប់បានប្រាប់ថា លោក ខេណេត បានស្រកទំងន់ជាង២៣គីឡូក្រាមឯណោះ។
កន្លងទៅ ក្រុងព្យុងយ៉ាងបានសំរេចដាក់ទោសលោក ខេណេត បេ ចំពេលដែលស្ថានភាពរវាងអាមេរិក និងកូរ៉េខាងជើង មានភាពតានតឹងខ្លាំង គឺបន្ទាប់ពីក្រុងព្យុងយ៉ាង បានសាកល្បងនុយក្លេអ៊ែរខ្លួន ជាលើកទី៣រួចមក។ ការដែលកូរ៉េខាងជើងអនុញ្ញាតអោយម្តាយអ្នកទោសអាមេរិក បានចូលទៅជួបកូនបែបនេះ គឺជាទង្វើមួយដ៏ពិសេសណាស់ ព្រោះថា កន្លងមកថ្មីៗនេះ ក្រុងព្យុងយ៉ាងទើបតែបានលុបចោលមិនអោយមានជំនួបគ្រួសារកូរ៉េ ដែលបានបែកបាក់គ្នាក្នុងសម័យសង្គ្រាមកូរ៉េ។
កូរ៉េខាងជើងធ្លាប់បានដោះលែងអ្នកទោសអាមេរិក ជាច្រើនរូបរួចហើយ បន្ទាប់ពីមានទស្សនកិច្ចរបស់អ្នកដឹកនាំសំខាន់ៗដូចជាអតីតប្រធានាធិបតីអាមេរិក គ្លីនតុន រឺក៏ខារថឺ នៅក្នុងទឹកដីខ្លួន។ ប៉ុន្តែ ក្រុងព្យុងយ៉ាងមិនបានដោះលែងអ្នកទោស ខេណេត បេ នេះទេ ទោះជាកន្លងមក តារាបាល់បោះអាមេរិក ដឺនិស រ៉ុតម៉ាន់ ធ្លាប់បានទៅលេងកូរ៉េខាងជើង ជាច្រើនលើកមកហើយក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ