ព្រឹទ្ធសភាអាមេរិកនឹងបញ្ជូនរបាយការណ៍ស្តីពីការធ្វើទារុណកម្មអ្នកទោសរបស់ទីភ្នាក់ងារCIA ទៅអោយលោកអូបាម៉ា
នៅថ្ងៃអង្គារនេះ អ្នកស្រី Anne-Marie Capomaccio អាន ម៉ារី កាប៉ូម៉ាស្យូ ជាអ្នកយកព័ត៌មានរបស់វិទ្យុបារាំងអន្តរជាតិយើង បានរាយការណ៍ពីក្រុងវ៉ាស៊ីនតោនមកថា របាយការណ៍របស់ព្រឹទ្ធសភាអាមេរិកស្តីពីការធ្វើទារុណកម្មលើអ្នកទោស នៅក្នុងពន្ធនាគារសំងាត់របស់ទីភ្នាក់ងារសេអ៊ីអាអាមេរិក នឹងត្រូវបញ្ជូនទៅអោយប្រធានាធិបតី បារ៉ាក់ អូបាម៉ា។ យោងតាមកាសែតវ៉ាស៊ីនតោន ប៉ុស្តិ៍ Washington Post ការធ្វើទារុណកម្មនៅតាមគុកសំងាត់របស់ទីភ្នាក់ងារសេអ៊ីអា មានលក្ខណៈជាប្រព័ន្ធបែបផែនមួយ ដូច្នេះហើយ ទើបផ្នែកសន្តិសុខផ្ទៃក្នុងអាមេរិកមិនបានទទួលព័ត៌មានអ្វីទាំងអស់ពីការធ្វើទារុណកម្មទាំងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
អស់ជាច្រើនឆ្នាំមកនេះ ទីភ្នាក់ងារCIA បានការពាររបៀបរបបនៃការសួរចម្លើយរបស់ខ្លួន លើអ្នកទោស ដោយលើកឡើងថា វិធីទាំងនេះជួយអោយទីភ្នាក់ងារទទួលបានព័ត៌មានសំខាន់បំផុតដើម្បីគាស់រំលើងបណ្តាញភេរវជន។
ផ្នែកស៊ើបអង្កេតរបស់ព្រឹទ្ធសភាអាមេរិកបានធ្វើការស៊ើបអង្កេត៣ឆ្នាំ លើការធ្វើទារុណកម្មរបស់សេអ៊ីអាទៅលើអ្នកទោស។ ជាការស៊ើបអង្កេតលើការធ្វើទារុណកម្មអ្នកទោស ចន្លោះឆ្នាំ២០០២ ដល់ឆ្នាំ២០០៦ ក្នុងពេលអាមេរិកស្ថិតក្រោមការគ្រប់គ្រងរបស់អតីតប្រធានាធិបតីហ្ស៊ក ដាប់ប៊េលយូ ប៊ុស្ហ។ ព្រឹទ្ធសភាបានចេញរបាយការណ៍បដិសេធការលើកឡើងរបស់ទីភ្នាក់ងារសេអ៊ីអា។ ព្រឹទ្ធសភាអាមេរិកចោទសេអ៊ីអាថា ភូតកុហក ព្រោះថា កន្លងមក ការដែលអាមេរិកបានសម្រេចជោគជ័យ ក្នុងការគាស់រំលើងបណ្តាញក្រុមភេរវជនអាល់កៃដា រឺក៏កំចាត់មេភេរវជន បិន ឡាដិន មិនមែនបានមកដោយសារការធ្វើទារុណកម្មលើអ្នកទោសនោះទេ។ ទីភ្នាក់ងារសេអ៊ីអាមិនបានបញ្ចេញប្រតិកម្មអ្វីតបតនឹងការចោទប្រកាន់របស់ព្រឹទ្ធសភាអាមេរិកនោះទេ។
នៅចុងសប្តាហ៍នេះ ព្រឹទ្ធសភាអាមេរិកនឹងបោះឆ្នោតសុំអោយមានការរៀបចំចាត់ថ្នាក់ខ្លឹមសារ៦០០ទំព័រ ក្នុងរបាយការណ៍ស៊ើបអង្កេតរបស់ខ្លួសរុប៦៣០០ទំព័រ។ របាយការណ៍នេះនឹងត្រូវបញ្ជូនទៅអោយប្រធានាធិបតីអូបាម៉ា។ យោងតាមរបាយការណ៍នេះ ទីភ្នាក់ងារសេអ៊ីអាបានប្រើទារុណកម្មលើអ្នកទោសបែបយ៉ាង មិនអោយអ្នកទោសបានដេក សម្រាតសម្លៀកបំពាក់ពួកគេ រឺក៏ជ្រមុជពួកគេអោយស្ថិតក្បែរស្ថានភាពលង់ទឹកជាដើម។ ជាក់ស្តែង ទាក់ទងអំពើភេរកម្មក្រុងញូវយក ខែកញ្ញាឆ្នាំ២០០១ សេអ៊ីអាធ្លាប់ធ្វើទារុណកម្មលើ ខាលេត ឆេកម៉ូហាមេត ជាជនសំខាន់របស់ក្រុមអាល់កៃដាមួយរូប អោយស្ទើរតែលង់ទឹកដល់ទៅ១៨៣ដង ដើម្បីអោយជនរូបនោះសារភាពផ្តល់ព័ត៌មានពីបិន ឡាដិន។
តាំងពីលោកអូបាម៉ាចូលកាន់តំណែងជាប្រធានាធិបតីអាមេរិក លោកអូបាម៉ាបានបញ្ឈប់មិនអោយមានវិធីសាស្ត្រសួរចម្លើយបែបនេះទៀត ធ្វើអោយភ្នាក់ងារចារកិច្ចសេអ៊ីអាមួយចំនួនមិនពេញចិត្ត និងលាលែងពីតំណែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ