ទឹកទន្លេសែនប៉ារីសចាប់ផ្តើមស្រកចុះ ស្លាប់៤នាក់ របួស២៤នាក់
តាំងពីមានជំនន់ច្រើនថ្ងៃនៅបារាំងមក ជនរងគ្រោះស្លាប់ក្នុងហេតុការណ៍ជំនន់ មាន៤នាក់ ហើយ២៤នាក់ទៀតរងរបួស។ នេះបើតាមការថ្លែងរបស់នាយករដ្ឋមន្ត្រីបារាំង នៅថ្ងៃសៅរ៍៤មិថុនានេះ។ នៅថ្ងៃសៅរ៍នេះ ទឹកទន្លេសែនប៉ារីសបានស្រកចុះមកវិញ បន្ទាប់ពីបានឡើងដល់កម្រិតខ្ពស់ខ្លាំង ៦,១០ម៉ែត្រ កាលពីយប់ថ្ងៃសុក្រ ចូលព្រឹកថ្ងៃសៅរ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៥
យោងតាមអាជ្ញាធរបារាំង ក្នុងចំណោមជនរងគ្រោះដែលស្លាប់ក្នុងហេតុការណ៍ទឹកជំនន់ទន្លេសែន នៅបារាំង មានមនុស្សចាស់ៗ៣នាក់អាយុពី៦០ឆ្នាំ ដល់៨៦ឆ្នាំ និងក្មេងប្រុសម្នាក់ អាយុ៣ឆ្នាំ។ ក្មេងតួចបានស្លាប់ នៅផ្ទះជាន់ក្រោមដី កាលពីចុងសប្តាហ៍មុន នៅឃុំតូចមួយ ក្នុងតំបន់ Bourgogne Franche Comté ភាគខាងកើតប្រទេស។
កាលពីយប់ថ្ងៃសុក្រចូលព្រឹកថ្ងៃសៅរ៍ កម្ពស់ទឹកបានឡើងដល់កម្រិតខ្ពស់៦,១០ម៉ែត្រ ជាកម្រិតខ្ពស់ខ្លាំង។ ប៉ុន្តែថ្ងៃសៅរ៍នេះ កម្ពស់ទឹកបានស្ថិតក្នុងកម្រិតមួយថេរ ហើយបានចាប់ស្រកទៅវិញ។ យោងតាមចៅហ្វាយក្រុងប៉ារីស លោកស្រី អាន ហ៊ីដាល់ហ្កូ ពេលនេះ ទឹកទន្លេមិនប្រឈមនឹងកម្ពស់ខ្ពស់ជាងនេះទៀតទេ។ ទឹកមានតែត្រូវស្រកទៅវិញប៉ុណ្ណោះ។
តាំងពីមានហេតុការណ៍ជំនន់មក មនុស្ស២០០០០នាក់ ត្រូវបានជម្លៀស ក្នុងនោះមាន ១៧៥០០នាក់ ជាប្រជាជនតំបន់ក្រុងប៉ារីស។ ការធ្វើដំណើរតាមផ្លូវរថភ្លើងក្រោមដីជួបការរអួលខ្លាំង។ យោងតាមនាយករដ្ឋមន្ត្រីបារាំង លោកម៉ានុយអែល វ៉ាល់ បារាំងត្រូវការពេលច្រើនថ្ងៃទៀត ទំរាំស្ថានការណ៍វិលមករកភាពប្រក្រតីវិញ។
គួរបញ្ជាក់ថា ទឹកជំនន់ក៏បានជន់លិចដីកសិកម្មផងដែរ។ សប្តាហ៍ក្រោយ រដ្ឋាភិបាលបារាំងនឹងរៀបចំកិច្ចប្រជុំជាច្រើន ក្នុងនោះមានកិច្ចប្រជុំអន្តរក្រសួង ដើម្បីពិភាក្សាពីបញ្ហាគ្រោះមហន្តរាយធម្មជាតិ និងកសិកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ