សិង្ហបុរីតក់ស្លុតនឹងអំពើហិង្សាក៏កម្រប្រឈមនឹងប៉ូលិស
អំពើហិង្សាដ៏កម្រមួយ ដែលបានផ្ទុះឡើងនៅយប់ថ្ងៃអាទិត្យឆ្លងមកថ្ងៃចន្ទនេះ រវាងក្រុមកម្មករបរទេសរាប់រយនាក់ ជាមួយប៉ូលិស បាននិងកំពុងធ្វើឱ្យសិង្ហបុរី រដ្ឋដ៏តូចមួយ ដែលមានប្រជាជនរស់នៅចម្រុះជាតិសាសន៍ និងដែលល្បីខាងគោរពនិងខ្លបខ្លាចប៉ូលិស ស្លុតចិត្តយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
នេះជាលើកទីមួយហើយដែលសិង្ហបុរី បានស្គាល់អំពើហិង្សាយ៉ាងដូច្នេះ។ មានរបួស១៨នាក់ ក្នុងនោះ១០នាក់ជាប៉ូលិស និងខូចខាតសម្ភារៈ ដូចជាឡានប៉ូលិស ឡានពេទ្យជាច្រើនគ្រឿង ត្រូវដុតបំផ្លាញ ... អំពើហិង្សាផ្ទុះឡើងនៅយប់មិញនេះ ហាក់បានដាស់គ្រប់គ្នានឹងឃើញអំពីប៉ះទង្គិចយ៉ាងហិង្សាកាលពីឆ្នាំ១៩៦៩ ដែលកាលណោះអាជ្ញាធរបានបង្ក្រាបរាបដល់ដី។
ដើមហេតុនៃការប៉ះទង្គិចហិង្សាជាមួយប៉ូលិសនេះ បណ្តាលមកពីកម្មករបរទេសជាតិឥណ្ឌាម្នាក់ត្រូវបានរថយន្តក្រុងកិនស្លាប់ ក្នុងសង្កាត់ Little India – (សង្កាត់ឥណ្ឌាតូច) ដែលប្រមូលផ្តុំដោយកម្មករសំណង់ជនជាតិឥណ្ឌារាប់សិបពាន់នាក់ កំពុងជួបជុំគ្នារីករាយថ្ងៃអាទិត្យ ថ្ងៃឈប់សម្រាក ជួនដោយស៊ីផឹកសុរាច្រើនជ្រុលផង។ មានគ្នាប្រមាណ៤០០នាក់ កម្មករឥណ្ឌាទាំងនោះបានស្ទុះទាំងកំហឹងទៅក្រសោបឡានក្រុង ដុតបំផ្លាញឡានប៉ូលិស និងឡានពេទ្យផង។ នេះបើតាមប្រភពព័ត៌មានអាជ្ញាធរ ដែលបានឃាត់ខ្លួនកម្មករឥណ្ឌា២៧នាក់ផង។
សិង្ហបុរី ក្រោយបដិវត្តឆ្នាំ១៩៦៩ ជាប្រទេសដ៏សុខសាន្តមានស្ថិរភាពនយោបាយ និងសេដ្ឋកិច្ចលូតលាស់ខ្លាំង ប្រជាពលរដ្ឋពហុជាតិសាសសន៍ មានសណ្តាប់ធ្នាប់ល្អ គោរពច្បាប់ គោរពប៉ូលិសនិងអាជ្ញាធរ។ ប៉ុន្តែអំពើហិង្សាយប់មិញ នេះបានឆ្លុះបញ្ចាំងឱ្យឃើញអំពីអ្វីដែលនៅពីក្រោយភាពមានបាន និងជោគជ័យផ្នែកសេដ្ឋកិច្ច ដែលរំពឹងលើកម្លាំងពលករបរទេស នូវការរើសអើង ម៉ាក់ងាយកម្មករក្រីក្រទាំងនោះ។
វត្តមានកម្មករបរទេសដែលជាកម្លាំងចលកររុញច្រានសេដ្ឋកិច្ចឱ្យថ្កុំថ្កើនឡើង ត្រូវបានបណ្តាជនមានឬសគល់ជាអ្នកសិង្ហបុរីពិតៗ (ពូជចិន) រិះគន់ជាញឹកញយ គឺផ្ទុយស្រឡះ ពីរូបភាពផ្លូវការដែលល្បីថាសិង្ហបុរីជាក្រុងចម្រុះជាតិសាសន៍យ៉ាងសុខដុមនោះទេ។ ថ្វីដ្បិតតែជាករណីទោលមែន ប៉ុន្តែអ្នកវិភាគបានព្រមានពីហានិភ័យនៃអំពើហិង្សា ដែលអាចនាំសិង្ហបុរីឱ្យត្រឡប់ទៅជួយភាពខ្មៅងងឹត ដូចក្នុងទសវត្សឆ្នាំ៦០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ