សិង្ហបូរី រងគ្រោះដោយផ្សែងដែលមានជាតិពុលលើសកម្រិតធម្មតា
ប្រជាជនសិង្ហបូរី កំពុងតែទទួលរងនូវផ្សែងពុលយ៉ាងខ្លាំងក្លា ធ្វើឱ្យប្រជាជនទាំងអស់មានការព្រួយបារម្ភ ពីបញ្ហាសុខភាព។ ផ្សែងដែល កកកុញពាសពេញអាកាស បណ្តាលមកពីការដុតព្រៃ ដោយចេតនា នៅតំបន់កោះស៊ូម៉ាត្រា ប្រទេសឥណ្ឌូណេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
អស់រយៈពេលជិតមួយសប្តាហ៍មកហើយ ប្រជាជនសិង្ហបូរី បានរស់នៅ ក្រោមឥទ្ធិពល នៃផ្សែងពុល ដែលសាយភាយពាសពេញទីក្រុងទាំងមូល បណ្តាលមកពីការ ដុតព្រៃនៅប្រទេសឥណ្ឌូណេស៊ី។ រដ្ឋមន្ត្រីក្រសួងបរិស្ថានសិង្ហបូរី បានធ្វើការប្រកាសអាសន្ន អំពីគ្រោះថ្នាក់នេះដោយប្រតិកម្មខ្លាំងៗកាលពីថ្ងៃសុក្រម្សិលមិញ ចំពោះអាជ្ញាធរឥណ្ឌូណេស៊ី ដែលហាក់ដូចជាមិនសូវចង់ទទួលខុសត្រូវលើបញ្ហាខាងលើ។
ជារៀងរាល់ឆ្នាំ នៅរដូវនេះ ទីក្រុងសិង្ហបូរីតែងតែទទួលរងនូវផ្សែងពុលដូចគ្នា ព្រោះថាប្រជាជនដែលរស់នៅកោះ ស៊ូម៉ាត្រា មិនចោលប្រពៃណី នៃ ការដុតព្រៃរបស់ខ្លួនដើម្បីសម្អាតដីចំការ។ តែឆ្នាំនេះ គេបានរកឃើញថា ក្នុងផ្សែងមានកម្រិតជាតិពុល លើសពីកម្រិតធម្មតា ដែលវាអាចបណ្តាលឱ្យមានគ្រោះថ្នាក់ធ្ងន់ធ្ងរ ដល់សុខភាពប្រជាជនសិង្ហបូរី ដែលមានប្រមាណជាង ៥លាន ៣សែននាក់។
ឆ្លើយតបនឹងប្រតិកម្មរបស់សិង្ហបូរី រដ្ឋមន្ត្រីព្រៃឈើរបស់ឥណ្ឌូណេស៊ី បានឆ្លើយដោយ សោះកក្រោះថា សូមសិង្ហបូរី បញ្ឈប់នូវប្រតិកម្ម ដែលហាក់ដូចជាកូនក្មេងនេះទៀតទៅ។ ដោយរដ្ឋមន្ត្រីរូបនោះបានអះអាងថា កំហុសទាំងអស់មិនមែនបណ្តាលមកពីភាគី ឥណ្ឌូណេស៊ីទាំងអស់នោះទេ។ គឺវាបណ្តាលមកពី អ្នកដាំដូងប្រេងរបស់សិង្ហបូរីផ្ទាល់ និងម៉ាឡេស៊ី ដែលមានដីចំការនៅកោះស៊ូម៉ាត្រា បាននាំគ្នាដុតចំការរបស់ខ្លួនផងដែរ។
ទីក្រុងសិង្ហបូរីទាំងមូល មានសុទ្ធសឹងតែអគារ ដែលមានកម្ពស់ជាង៥០ជាន់។ តែពេលនេះ គេឃើញមានតែអព្ទផ្សែងពាសពេញមេឃ។ នៅសឹងគ្រប់ឧសថស្ថាន គេស្ទើតែដើររកទិញមិនបាននូវម៉ាស់ការពារ ដោយ សារតែគេលក់អស់រលីងពីស្តុក។ ចំណែកភោជនីយដ្ឋានមួយភាគធំវិញ បានបិទទ្វារបស់ខ្លួន។
បើសិនជាផ្សែងពុលនៅតែបន្តមាន រហូតដល់ប៉ុន្មានថ្ងៃខាងមុខទៀត រដ្ឋាភិបាល របស់ប្រទេសដ៏តូចមួយនេះ មានការបារម្ភថា នឹងមានការប៉ះពាល់ដល់សេដ្ឋកិច្ចជាតិ និងជាពិសេសដល់វិស័យទេសចរណ៍។
ដើម្បីដោះស្រាយបញ្ហាខាងលើ អជ្ញាធរ ឥណ្ឌូណេស៊ី គ្រោងនឹងបង្តើតឱ្យមានជាភ្លៀង សប្បនិម្មិត។ ដោយគេប្រើយន្តហោះ និងឧទ្ថម្ភាគចក្រ ដើម្បីបាចទឹកនៅលើអាកាស។
សូមរម្លឹកថា នៅក្នុងឆ្នាំ១៩៩០ ប្រទេសជាច្រើននៅក្នុងបណ្តាប្រទេស អាស៊ីអាគ្នេយ៍ បានរងផលប៉ះពាល់ដោយផ្សែងពុលម្តងរួចទៅហើយ។ កាលនោះ បានធ្វើឱ្យខូចខាត ដល់វិស័យជាច្រើន ជាពិសេសវិស័យអាកាសចរ ដែលគិតជាទឹកប្រាក់ប្រមាណជាង ២០លានដុល្លាសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ