ស្លាប់១ របួស២ ក្នុងការវាយប្រហារភេរវកម្មនៅស៊ុយអែដ
គ្រាប់បែកច្នៃពីរគ្រាប់បានផ្ទុះឡើងផ្ទួនៗគ្នា នៅចំកណ្តាលក្រុងស្តុកខុម ប្រទេសស៊ុយអែដ កាលពីល្ងាចថ្ងៃសៅរ៍ ទី១១ ធ្នូ ២០១០នេះ។ រដ្ឋមន្រ្តីការបរទេស និងមន្រ្តីផ្នែកចារកិច្ចស៊ុយអែដបានសន្និដ្ឋានថា នេះ គឺជាការវាយប្រហារភេរវកម្ម។ នៅមុនពេលមានការវាយប្រហារនេះ គេទទួលបានសារព្រមានមួយ ពីជនអនាមិក។
ចុះផ្សាយនៅថ្ងៃ៖
បទវិភាគរបស់ សេង ឌីណា
យោងតាមប៉ូលិសស៊ុយអែដ ការផ្ទុះទីមួយ គឺចេញពីឡានមួយគ្រឿង ដែលចតនៅតាមដងផ្លូវ ដែលសម្បូរទៅដោយមណ្ឌលពាណិជ្ជកម្ម។ ប៉ុន្មាននាទីក្រោយមក គ្រាប់បែកទីពីរបានផ្ទុះ នៅប្រមាណ ៣០០ម៉ែត្រពីទីតាំងផ្ទុះទីមួយ។ ក្រោយពីការផ្ទុះ គេរកឃើញសាកសពបុរសម្នាក់ នៅទីតាំងផ្ទុះទី២។ សារព័ត៌មានស៊ុយអែដបានចុះផ្សាយ ដោយបានដកស្រង់សម្តីសាក្សីថា បុរស ដែលស្លាប់នេះ គឺជាភេរវជនអត្តឃាត។ ក៏ប៉ុន្តែ ប៉ូលិសស៊ុយអែដមិនបានបញ្ជាក់អំពីព័ត៌មាននេះនៅឡើយទេ ដោយអះអាងថា រង់ចាំការអង្កេតលម្អិតជាមុនសិន។
ទោះជាយ៉ាងណា រដ្ឋមន្រ្តីក្រសួងការបរទេសស៊ុយអែដបានថ្លែងថា ការវាយប្រហារនេះ គឺជាការវាយប្រហារភេរវកម្ម។ នៅព្រឹកថ្ងៃអាទិត្យនេះ ទីភ្នាក់ងារចារកិច្ចស៊ុយអែដក៏បានធ្វើការអះអាងស្រដៀងគ្នានេះដែរ។
ទីភ្នាក់ងារព័ត៌មានមួយរបស់ស៊ុយអែដបានឲ្យដឹងថា នៅប៉ុន្មាននាទីមុនពេលផ្ទុះ អ៊ីមែលអនាមិកមួយ ត្រូវបានផ្ញើទៅកាន់ទីភ្នាក់ងារព័ត៌មាននេះ និងទៅប៉ូលិសស៊ុយអែដ។ ក្នុងអ៊ីមែលនេះមានភ្ជាប់នូវសារជាសំឡេងមួយ គំរាមថានឹងធ្វើការវាយប្រហារលើស៊ុយអែដ ដើម្បីជាការសងសឹក ចំពោះការដែលស៊ុយអែដបញ្ជូនទាហានទៅអាហ្វហ្កានីស្តង់ និងការដែលវិចិត្រករស៊ុយអែដបានគូររូបត្លុកចំអកមើលងាយព្យាការី អ៊ីស្លាម មហាម៉ាត់ កាលពីឆ្នាំ២០០៧។
រហូតមកទល់ពេលនេះ គេនៅមិនទាន់អាចសន្និដ្ឋានបាននៅឡើយទេថា តើអ៊ីមែលគំរាមនេះ ពិតជាមានជាប់ពាក់ព័ន្ធនឹងការវាយប្រហារពីរលើកផ្ទួនៗគ្នា កាលពីយប់ថ្ងៃសៅរ៍ដែរឬអត់ទេ។
គួរបញ្ជាក់ថា នៅពេលនេះ ស៊ុយអែដមានទាហានសរុបទាំងអស់ ៥០០នាក់ កំពុងឈរជើង នៅអាហ្វហ្កានីស្តង់។ កាលពីឆ្នាំ២០០៧ វិចិត្រករស៊ុយអែដម្នាក់បានគូររូបត្លុកមហាម៉ាត់ ដែលមានខ្លួនជាឆ្កែ ដែលបណ្តាលឲ្យបណ្តាជនអ្នកកាន់សាសនាអ៊ីស្លាមផ្ទុះកំហឹង ទាំងនៅស៊ុយអែដ និងនៅតាមបណ្តាប្រទេសអ៊ីស្លាមផ្សេងទៀត នៅទូទាំងពិភពលោក។ កន្លងមក ក៏មានការប៉ុនប៉ងធ្វើឃាតវិចិត្រករស៊ុយអែដនេះដែរ ក៏ប៉ុន្តែ មិនបានសម្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ