សង្គមស៊ីវិល និងមន្ត្រីរដ្ឋាភិបាល ជួបជុំ និយាយពីសេចក្តីព្រាងច្បាប់ចរាចរណ៍ផ្លូវគោកថ្មី
មន្ត្រីរដ្ឋាភិបាល និងអង្គការសង្គមស៊ីវិល បានជួបប្រជុំគ្នាជាថ្មីទៀត ក្នុងវេទិកាពិគ្រោះយោបល់ ពេញមួយថ្ងៃ នៅថ្ងៃចន្ទ ទី២០តុលានេះ ដើម្បីនិយាយពីសេចក្តីព្រាងច្បាប់ចរាចរណ៍ផ្លូវគោកថ្មី។ តំណាងអង្គការសង្គមស៊ីវិល បានស្នើដល់រដ្ឋសភា អនុម័តសេចក្តីព្រាងច្បាប់ចរាចរណ៍ផ្លូវគោកថ្មី ឲ្យបានឆាប់ ដើម្បីកាត់បន្ថយគ្រោះថ្នាក់ចរាចរណ៍ នៅកម្ពុជា ដែលសព្វថ្ងៃ យ៉ាងហោចណាស់ មានមនុស្សស្លាប់ច្រើនជាង ៥ នាក់ ក្នុងមួយថ្ងៃ។
ចុះផ្សាយនៅថ្ងៃ៖
ស្តាប់ - ០២:៤៣
ជាវេទិកាពិគ្រោះយោបល់ថ្មីមួយទៀត ដែលមណ្ឌលព័ត៌មានស្ត្រីកម្ពុជា បានរៀបចំឡើង នៅថ្ងៃចន្ទ ទី២០តុលានេះ។ វេទិកាជួបជុំពេញមួយថ្ងៃនោះ ផ្តល់ឱកាសដល់សាធារណជន អង្គការសង្គមស៊ីវិល ជាពិសេសដៃគូពាក់ព័ន្ធនឹងសុវត្ថិភាពចរាចរណ៍ ដើម្បីឲ្យពួកគេផ្លាស់ប្តូរព័ត៌មាន ទាក់ទងនឹងសុវត្ថិភាពចរាចរណ៍នៅកម្ពុជា។ សង្គមស៊ីវិល ក៏បានលើកអនុសាសន៍មួយចំនួន បញ្ជូនទៅកាន់រដ្ឋសភា ដើម្បីអនុម័តសេចក្តីព្រាងច្បាប់ចរាចរណ៍ផ្លូវគោកថ្មី។
សេចក្តីព្រាងច្បាប់ចរាចរណ៍ផ្លូវគោកថ្មី មាន ១២ ជំពូក និង ៩២ មាត្រា ត្រូវបានលោក ចាន់តារា អគ្គនាយកនៃអគ្គនាយកដ្ឋានដឹកជញ្ជូន របស់ក្រសួងសាធារណៈការ និងដឹកជញ្ជូន លើកឡើងពីចំណុចសំខាន់។ ក្នុងនោះ រួមមានការកំណត់ឲ្យអ្នកជិះម៉ូតូ បានតែមនុស្សពេញវ័យពីរនាក់ ហើយអាចមានកុមារម្នាក់ តែអ្នកជិះម៉ូតូទាំងអស់ ត្រូវពាក់មួកសុវត្តិភាព រាប់ទាំងកុមារ ចាប់ពីអាយុ ៣ ឆ្នាំ។ ច្បាប់ថ្មី ក៏បានកំណត់ពីការផ្តន្ទាទោសដាក់ពន្ធនាគារ និងពិន័យជាប្រាក់ ធ្ងន់ធ្ងរជាងមុន ពិសេសលើអ្នកស្រវឹង និងគ្រឿងញៀន ជាដើម។
លោក គង់ សុវណ្ណ ប្រធានអង្គការដៃគូសុវត្ថិភាពចរាចរណ៍ផ្លូវគោកសកល ប្រចាំកម្ពុជា និងប្រទេសឡាវ បានកត់សម្គាល់ថា សេចក្តីព្រាងច្បាប់ចរាចរណ៍ផ្លូវគោកថ្មី មានលក្ខណៈប្រសើរជាងច្បាប់ ដែលកំពុងមានជាធរមាន។ ក្នុងនោះ ការកំណត់ឲ្យមានទោសទណ្ឌ និងការពិន័យធ្ងន់ជាងមុន ធ្វើឲ្យមានឥទ្ធិពលផ្លាស់ប្តូរឥរិយាបថអ្នកប្រើប្រាស់ផ្លូវ ឈានមករកសុវត្ថិភាពចរាចរណ៍ឡើងវិញ។
តាមតំណាងសង្គមស៊ីវិល លោក គង់ សុវណ្ណ នៅពេលច្បាប់ចរាចរណ៍ផ្លូវគោកថ្មី ដែលមានលក្ខណៈពេញលេញ ត្រូវបានរដ្ឋសភាអនុម័ត ដាក់ឲ្យប្រើប្រាស់ នោះគេនឹងអាចការពារជីវិតពលរដ្ឋកម្ពុជា ជាង ៧០០០ នាក់ និងការពារអ្នកប្រើប្រាស់ម៉ូតូ កុំឲ្យមានរបួសក្បាលបានជាង ១០.០០០ នាក់។
សេចក្តីព្រាងច្បាប់ចរាចរណ៍ផ្លូវគោកថ្មី កំពុងស្ថិតក្នុងដៃគណៈកម្មការជំនាញរដ្ឋសភា។ នៅថ្ងៃទី២១តុលានេះ រដ្ឋសភា នឹងបើកសិក្ខាសាលាពិគ្រោះយោបល់ លើសេចក្តីព្រាងច្បាប់ថ្មីនោះ មុននឹងដាក់ឆ្លងកិច្ចប្រជុំពេញអង្គរដ្ឋសភា ពិភាក្សា និងអនុម័ត។
របាយការណ៍បង្ហាញថា នៅកម្ពុជា គ្រោះថ្នាក់ចរាចរណ៍ ក្នុងឆ្នាំ២០១៣ មានជនរងគ្រោះ ចំនួន ១៦.២២៧ នាក់ ក្នុងនោះ មានអ្នកស្លាប់ ១៩៥០ នាក់ និងរបួសធ្ងន់ ៥៦៧១ នាក់។ ក្នុងរយៈពេល ៩ ខែ ក្នុងឆ្នាំ២០១៤ មានអ្នកស្លាប់ ១៦៣០ នាក់ និងរបួស ៦០១៨ នាក់។ ជាមធ្យម គ្រោះថ្នាក់ចរាចរណ៍ បណ្តាលឲ្យមានអ្នកស្លាប់ច្រើនជាង ៥ នាក់ ក្នុងមួយថ្ងៃ។ ៦៩% នៃអ្នកស្លាប់សុរប គឺជាអ្នកជិះម៉ូតូ ហើយមិនពាក់មួកសុវត្ថិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ