៣៩នាក់ស្លាប់ ក្នុងហេតុការណ៍ភេរវកម្មនៅតួកគីចំថ្ងៃឆ្លងឆ្នាំសកល
មនុស្សយ៉ាងតិចណាស់៣៩នាក់ បានស្លាប់បាត់បង់ជីវិត ក្នុងហេតុការណ៍ភេរវកម្មមួយកណ្តាលក្រុង Istanbul នៅយប់ឆ្លងឆ្នាំសកល។ តាមសេចក្តីរាយការណ៍បានឲ្យដឹងថាបរុសខ្មាន់កាំភ្លើងម្នាក់ បានស្លៀកឈុត Santaហើយចូលទៅបាញ់រះលើហ្វូងមនុស្ស ដែលជួបជុំគ្នាចូលរួមឆ្លងឆ្នាំសកល។
ចុះផ្សាយនៅថ្ងៃ៖ កែប្រែថ្ងៃទី៖
ដំបូងឡើយបរុសខ្មាន់កាំភ្លើងបានបាញ់សម្លាប់ប៉ូលីសម្នាក់ និងជនស៊ីវិលម្នាក់ នៅច្រកចូលក្លឹបរាត្រី Reina ដែលជាក្លឹបដ៏ល្បីមួយក្នុងទីក្រុង Istanbul ។ ក្រោយពេលបាញ់ប្រហារប៉ូលីស និងជនស៊ីវិលនៅច្រកចូល ជនរូបនោះបានសម្រុកចូលទៅក្នុងក្លឹប ហើយបាញ់រះលើហ្វូងមនុស្ស ដែលជួបជុំគ្នានៅទីនោះ។ នេះបើតាមការបញ្ជាក់របស់អាជ្ញាធរក្រុង លោក Vasip Sahin។
យោងតាមសេចក្តីរាយការណ៍របស់ទីភ្នាក់ងារព័ត៌មាន Dogan បានបញ្ជាក់ថាមានបរុសខ្មាន់កាំភ្លើងពីរនាក់ ដែលស្លៀកឈុត Santa Claus ធ្វើប្រតិបត្តិការបាញ់ប្រហារក្នុងក្លឹបរាត្រីនោះ។ នៅក្នុងហេតុការណ៍បាញ់ប្រហារនេះ បណ្តាលឲ្យមនុស្សយ៉ាងតិចណាស់៣៩នាក់ស្លាប់ ហើយក៏មានប៉ូលីសម្នាក់ និងជនបរទេសប្រមាណ១៦នាក់។ ក្រៅពីនោះ ក៏មានដែរអ្នករងរបួសធ្ងន់ស្រាលប្រមាណ៤០នាក់ ដែលកំពុងសម្រាកព្យាបាលនៅមន្ទីរពេទ្យក្នុងក្រុង។
លោក Sahin បានប្រាប់អ្នកកាសែតថាជនល្មើសដែលជាប់ដោយកំហឹងពេញខ្លួននោះ បានបាញ់សំដៅលើមនុស្សស្លូតត្រង់ ដែលពួកគេទាំងនោះមកចូលរួមឆ្លងឆ្នាំសកល និងចូលរួមកម្សាន្តសប្បាយក្នុងក្លឹប។ លោកបានបន្ថែមថាការវាយប្រហារនេះបានកើតឡើងនៅម៉ោង១ និង១៥នាទីយប់ ម៉ោងនៅតួកគី ហើយលោកបញ្ជាក់ថានេះគឺជាការវាយប្រហារភេរវកម្ម។
ទីភ្នាក់ងារព័ត៌មាន Dogan វិញបានដកស្រង់ការបញ្ជាក់របស់អ្នកឃើញហេតុការណ៍នោះថា ក្រុមខ្មាន់កាំភ្លើង និយាយភាសាអារ៉ាប់។ ប៉ុន្តែបើតាមសេចក្តីរាយការណ៍របស់ទូរទស្សន៍ NTV តួកគី បានឲ្យដឹងថារហូតមកដល់ពេលនេះប៉ូលីសកំពុងតែធ្វើការស៊ើបអង្កេតរកជនល្មើសនៅឡើយ។ បើតាមទីភ្នាក់ងារព័ត៌មាន Dogan ដដែលបានបញ្ជាក់ថាក្នុងក្លឹបរាត្រីនោះ មានមនុស្សយ៉ាងហោចណាស់៧០០នាក់ ដែលពួកគេចូលរួមកម្សាន្តសប្បាយក្នុងឱកាសឆ្លងឆ្នាំសកល២០១៦ ឈានចូលឆ្នាំ២០១៧។
នៅក្នុងរយៈពេលប៉ុន្មានខែចុងក្រោយនេះ មានការវាយប្រហារជាច្រើនបានកើតឡើងក្នុងប្រទេសតួកគី ហើយរដ្ឋាភិបាលតួកគីបានទម្លាក់កំហុសទៅលើក្រុមឧទ្ទាមឃឺត និងក្រុមអង្គការរដ្ឋឥស្លាម ជីហាត។ កាលពីថ្ងៃទី១០ ខែធ្នូកន្លងទៅមនុស្សប្រមាណ៤៤នាក់ត្រូវបានស្លាប់នៅក្នុងហេតុការណ៍បំផ្ទុះគ្រាប់បែកមួយក្នុងព្រឹត្តិការណ៍ប្រកួតបាល់ទាត់ក្នុងក្រុងIstanbul៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ