ក្រុមប្រឆាំងតួកគីប្រារព្ធខួបមួយឆ្នាំនៃចលនាបះបោរប្រឆាំងរដ្ឋាភិបាល
នៅថ្ងៃសៅរ៍នេះ ក្រុមប្រឆាំងតួកគី បានណាត់គ្នា នៅតាមកន្លែងមួយចំនួន នៅក្រុងអ៊ីស្តង់ប៊ូល និងក្រុងធំៗផ្សេងទៀត ដើម្បីប្រារព្ធខួបមួយឆ្នាំនៃសកម្មភាពបះបោរប្រឆាំងរដ្ឋាភិបាល។ តួកគីបានដាក់ពង្រាយប៉ូលិសសន្ធឹកសន្ធាប់ ដើម្បីទប់ស្កាត់ហេតុការណ៍ជាយថាហេតុណាមួយ។
ចុះផ្សាយនៅថ្ងៃ៖
ស្តាប់ - ០១:៤៧
តាំងតែពីព្រឹកព្រលឹមថ្ងៃសៅរ៍នេះ ប៉ូលិសតួកគីរាប់ពាន់នាក់ ក្នុងតឺនុយស៊ីវិល និងតឺនុយប្រឆាំងកុប្បកម្ម បានចូលទៅទីលានតាក់ស៊ីម ក្រុងអ៊ីស្តង់ប៊ូល ជាទីលានចលនាបះបោរកាលពី១ឆ្នាំមុននេះ ដើម្បីចៀសវាងមិនអោយមានការជួបជុំគ្នា។ រដ្ឋាភិបាលតួកគីហាមជាផ្លូវការ មិនអោយមានការជួបជុំគ្នា នៅជុំវិញទីលានតាក់ស៊ីមនេះទេ។ តួកគីពង្រាយកងកម្លាំងជាង២ម៉ឺន៥ពាន់នាក់ និងកាណុងបាញ់ទឹកជាង៥០ សម្រាប់ត្រៀមការពារ ក្នុងថ្ងៃខួបបះបោរនេះ។
នៅថ្ងៃសៅរ៍៣១ឧសភានេះ ក្រុមប្រឆាំងរដ្ឋាភិបាលបានណាត់គ្នា នៅតាមក្រុងធំៗ រំលឹកខួប១ឆ្នាំ នៃចលនាបះបោរប្រឆាំងរដ្ឋាភិបាលអភិរក្សនិយមអ៊ីស្លាម។ កាលពីថ្ងៃ៣១ឧសភា ឆ្នាំមុន ប៉ូលិសបានបណ្តេញសកម្មជនបរិស្ថាន រាប់រយនាក់ ចេញពីទីលានតាក់ស៊ីម។ សកម្មជនបរិស្ថានបានតវ៉ា ប្រឆាំងនឹងការកំទេចបំបាត់សួនច្បារហ្សិកស៊ី Gezi នៅទីលានតាក់ស៊ីម ក្រុងអ៊ីស្តង់ប៊ូលនេះ។ ចលនាតវ៉ាបានក្លាយជាបាតុកម្មប្រឆាំងរដ្ឋាភិបាលរបស់លោកអ៊ែរដូហ្កានតែម្តង។ ចលនាបង្ក្រាបរបស់ប៉ូលិសបានធ្វើអោយមនុស្សស្លាប់៨នាក់ របួសជាង៨រយនាក់ ហើយមនុស្សរាប់ពាន់នាក់ត្រូវបានចាប់ខ្លួន។
ក្រោយមកទៀត រដ្ឋាភិបាល រួមទាំងនាយករដ្ឋមន្ត្រីអ៊ែរដូហ្កានផ្ទាល់ បានរងការវាយប្រហារដោយរឿងអាស្រូវពុករលួយ ធ្វើអោយមានការរុះរើគណៈរដ្ឋមន្ត្រី ធ្វើអោយប្រជាជនចុះបាតុកម្មប្រឆាំងបន្តទៀត។ ទោះយ៉ាងនេះក្តី លោកអ៊េរដូហ្កាន បានទទួលជោគជ័យក្នុងការបោះឆ្នោតឃុំ-សង្កាត់ ហើយកំពុងត្រៀមប្រកាសបេក្ខភាពសម្រាប់ការបោះឆ្នោតប្រធានាធិបតីខែសីហាខាងមុខទៀតផង។ ក្រោយមានការបះបោរប្រឆាំងរដ្ឋាភិបាលមក លោកអ៊ែរដូហ្កាន បានចេញច្បាប់មួយចំនួន មានទិសដៅពង្រឹងអំណាចលោកក្នុងតុលាការ ក្នុងបណ្តាញសង្គមផ្សេងៗ រួមទាំងបង្កើនអំណចដល់អ្នកបំរើការផ្នែកចារកិច្ចដែលស្មោះត្រង់នឹងរូបលោកផងដែរ។
ប្រឈមនឹងអំណាចរបស់រដ្ឋាភិបាល អង្គការក្រៅរដ្ឋាភិបាល សហជីព និងសង្គមស៊ីវិល សង្ឃឹមថា ថ្ងៃសៅរ៍ ថ្ងៃរំលឹកខួបមួយឆ្នាំនៃចលនាបះបោរប្រឆាំងរដ្ឋាភិបាល គឺជាឱកាសអោយព្រលឹងចលនាតវ៉ានៅសួនហ្សិកស៊ី បានរស់រវើកឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ