អ.ស.ប.៖ អត្រាអ្នកស្លាប់និងឆ្លងមេរោគ HIV ថយចុះ អំណោយអន្តរជាតិក៏ធ្លាក់ចុះ
នៅថ្ងៃសុក្រ ៣ មិថុនា ២០១១នេះ អ.ស.ប. (UNAIDS) បានចេញផ្សាយរបាយការណ៍ប្រចាំឆ្នាំ ស្តីពីស្ថានភាពទូទៅ នៃជំងឺអេដស៍នៅទូទាំងពិភពលោក នៅឆ្នាំ២០១០។ យោងតាមរបាយការណ៍នេះ អត្រាអ្នកឆ្លងមេរោគ HIV និងអ្នកស្លាប់ដោយជំងឺអេដស៍មានការធ្លាក់ចុះ។ ចំនួនអ្នកជំងឺអេដស៍ ដែលទទួលបានថ្នាំពន្យារជីវិតមានការកើនឡើង។ ក៏ប៉ុន្តែ អ្វីដែលគួរឲ្យបារម្ភ គឺប្រភពធនធានអន្តរជាតិ ក្នុងការប្រយុទ្ធប្រឆាំងនឹងជំងឺអេដស៍មានការធ្លាក់ចុះ នៅឆ្នាំ២០១០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥២
យោងតាមរបាយការណ៍របស់ UNAIDS គិតត្រឹមចុងឆ្នាំ២០១០ មានអ្នកជំងឺអេដស៍ចំនួន ៦លាន ៦សែននាក់ នៅតាមបណ្តាប្រទេសមានចំណូលទាប និងចំណូលមធ្យម បានទទួលថ្នាំពន្យារជីវិត។ បើធៀបនឹងកាលពី១០ឆ្នាំមុន គឺមានការកើនឡើងដល់ទៅ ២២ដង។ បើធៀបនឹងឆ្នាំ២០០៩ គឺមានការកើនឡើង ១លាន ៤សែននាក់។ ចំនួនកុមារ ដែលទទួលបានថ្នាំពន្យារជីវិត នៅឆ្នាំ២០១០ មាន ៤២ម៉ឺននាក់ កើនឡើង ៥០% ធៀបនឹងឆ្នាំ២០០៨។
អគ្គនាយក UNAIDS បានប្រសាសន៍ថា ថ្នាំពន្យារជីវិត គឺចំណុចរបត់ដ៏សំខាន់បំផុត នៅក្នុងការប្រយុទ្ធប្រឆាំងនឹងជំងឺអេដស៍។ ថ្នាំពន្យារជីវិតមិនត្រឹមតែជួយរក្សាជីវិតអ្នកផ្ទុកមេរោគ HIV ប៉ុណ្ណោះទេ តែថែមទាំងជួយបង្ការការឆ្លងរាលដាលមេរោគនេះផងដែរ។ លទ្ធផលនៃការសិក្សាស្រាវជ្រាវថ្មីៗនេះបង្ហាញថា អ្នកជំងឺអេដស៍ដែលបានទទួលថ្នាំពន្យារជីវិត អាចកាត់បន្ថយការចម្លងទៅអ្នកដទៃបាន ៩៦%។
របាយការណ៍របស់អ.ស.ប.បង្ហាញថា នៅឆ្នាំ២០១០នេះ អត្រាអ្នកឆ្លងមេរោគ HIV នៅតែបន្តធ្លាក់ចុះ ក្នុងនោះ តំបន់អាហ្វ្រិកប៉ែកខាងត្បូង និងតំបន់អាស៊ីអាគ្នេយ៍ មានអត្រាថយចុះខ្លាំងជាងគេ។ ក៏ប៉ុន្តែ នៅតំបន់អឺរ៉ុបខាងកើត មជ្ឈិមបូព៌ា និងអាហ្វ្រិកខាងជើង អត្រាអ្នកឆ្លងមេរោគ HIV នៅតែបន្តកើនឡើង។
គួរបញ្ជាក់ថា មេរោគ HIV ត្រូវបានគេរកឃើញជាលើកដំបូងបង្អស់ នៅថ្ងៃទី៥ មិថុនា ១៩៨១។ ក្នុងរយៈពេល ៣០ឆ្នាំកន្លងទៅនេះ គេប៉ាន់ប្រមាណថា មេរោគ HIV បានសម្លាប់មនុស្សប្រមាណជិត ៣០លាននាក់ (ចន្លោះពី២៥លាន ទៅ ៣៣លាន)។ បច្ចុប្បន្ននេះ មានមនុស្សប្រមាណ ៣៤លាននាក់ (ចន្លោះពី ៣០.៩លាន ទៅ ៣៦.៩លាន) កំពុងរស់នៅដោយផ្ទុកមេរោគ HIV ។
របាយការណ៍របស់អ.ស.ប.ក៏បានឲ្យដឹងផងដែរថា នៅឆ្នាំ២០១០នេះ ជំនួយអន្តរជាតិ និងការវិនិយោគក្នុងការប្រយុទ្ធប្រឆាំងនឹងជំងឺអេដស៍មានការធ្លាក់ចុះជាលើកទីមួយ បន្ទាប់ពីបានកើនឡើងជាបន្តបន្ទាប់ ចាប់តាំងពីឆ្នាំ២០០១មក។ វិបត្តិសេដ្ឋកិច្ចពិភពលោក ឆ្នាំ២០០៨ គឺជាមូលហេតុចម្បងបំផុត នៃការធ្លាក់ចុះនេះ។ ប្រទេសអ្នកមានមួយចំនួន ដែលទទួលរងការប៉ះពាល់ដោយវិបត្តិសេដ្ឋកិច្ច បានសម្រេចកាត់បន្ថយជំនួយក្នុងវិស័យអេដស៍។ ប្រទេសខ្លះទៀតបានសម្រេចបញ្ឈប់ការផ្តល់វិភាគទានទៅឲ្យមូលនិធិអ.ស.ប.ទាំងស្រុងតែម្តង។
យោងតាមអ.ស.ប. បច្ចុប្បន្ននេះមានប្រទេសចំនួន៥៦ ដែលពឹងផ្អែកខ្លាំងលើជំនួយបរទេស (លើសពី ៧០%) ដើម្បីចំណាយក្នុងវិស័យអេដស៍។
មន្រ្តីអ.ស.ប.បានបង្ហាញនូវក្តីរំពឹងថា នៅក្នុងរយៈពេលប៉ុន្មានឆ្នាំខាងមុខទៀតនេះ ប្រទេសមានចំណូលមធ្យមមួយចំនួននឹងអាចមានប្រភពធនធានគ្រប់គ្រាន់ ក្នុងការប្រយុទ្ធប្រឆាំងនឹងជំងឺអេដស៍ដោយខ្លួនឯង ហើយឈប់ពឹងផ្អែកលើជំនួយបរទេស។ ប្រទេសមួយចំនួនផ្សេងទៀត ដែលកំពុងតែមានសេដ្ឋកិច្ចរីកលូតលាស់ខ្លាំង ដូចជា ប្រទេសចិន ជាដើម អាចនឹងចាប់ផ្តើមផ្តល់ជំនួយជួយដល់ប្រទេសដទៃវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ