អាមេរិកជួបការបាញ់ប្រហារមួយទៀតដែលបង្កប់ដោយចម្ងល់រាប់ពាន់
មានស្លាប់យ៉ាងហោចណាស់ ១៣នាក់ និងមានសំណួរដ៏ច្រើនជុំវិញការបាញ់ប្រហារ ម្សិលមិញ នៅទីបញ្ជាការកងទ័ពជើងទឹកអាមេរិក មិនឆ្ងាយប៉ុន្មានពីសេតវិមាន។ ទីបញ្ជាការយោធាដែលជាកន្លែងមានសុវត្ថិភាពនិងការពារយ៉ាងខ្លាំងបំផុតមួយនៅសហរដ្ឋអាមេរិក។ ដូច្នេះសួរថាតើអត្តឃាតជន ដែលត្រូវបានសម្លាប់នៅនឹងកន្លែងកើតហេតុ ជានរណា ? ធ្វើដូចម្តេចទើបអាចចូលបាន មានមនុស្សរួមដៃប៉ុន្មាននាក់? និងក្នុងបំណងអ្វី ?
ចុះផ្សាយនៅថ្ងៃ៖ កែប្រែថ្ងៃទី៖
មានអាយុ ៣៤ឆ្នាំ មុខស្តើង ក្បាលត្រងោល អារ៉ុង អាឡិចស៊ី (Aaron Alexis) បានចូលទៅក្នុងអាគារ កម្ពស់ ១៩៧ជាន់ ដែលជាទីស្នាក់បញ្ជាប្រព័ន្ធទ័ពជើងទឹកអាមេរិក និងមានបុគ្គលិកធ្វើការ ប្រមាណបីពាន់នាក់ នៅវេលាម៉ោង ៨និង២០នាទី ម៉ោងនៅ ទីក្រុងវ៉ាស៊ីនតោន។ ពេលចូលទៅដល់ក្នុង អត្តឃាតជន បានបាញ់រះ ជាច្រើនលើកច្រើនសា មុននឹងត្រូវកងកុម្មង់ដូរបាញ់សម្លាប់បាន។
គេអាចស្គាល់អត្តសញ្ញាណឃាតកររូបនេះ ដោយស្នាមក្រយៅដៃ។ ខ្នាន់កាំភ្លើង អារ៉ុង អាឡិចស៊ី គឺជាបុគ្គលិករបស់សហគ្រាសមួយធ្វើការឱ្យក្រុមហ៊ុនHP Hewlett-Packard ដែលបានសិទ្ធិជួសជុល និងធ្វើទំនើបកម្មប្រព័ន្ធព័ត៌មានវិទ្យា អ៊ីនធ័រនែតប្រើប្រាស់ក្នុងទីបញ្ជាការកងទ័ពជើងទឹកអាមេរិកនេះ។ អារ៉ុង អាឡិចស៊ី ក៏ធ្លាប់ស្ថិតនៅក្នុងជួរទ័ពបំរុង រយៈពេល៤ឆ្នាំ ពីខែ ឧសភា ២០០៧ ដល់ខែមករា២០១១។ ប៉ុន្តែមូលហេតុនៃការចាកចេញពីជួរទ័ព មិនទាន់អាចកំណត់បាននៅឡើយទេ។ បន្ទាប់មក អារ៉ុង អាឡិចស៊ី បានទៅធ្វើការជាអ្នករត់តុ ឬដឹកម្ហូប ឱ្យភោជ្ជនីដ្ឋានថៃ រៀនថៃ និងចុះឡើងញយដងទៅថៃ និងប្រទេសជប៉ុន ព្រោះមានជំនក់ចិត្តនឹងព្រះពុទ្ធសាសនា ចូលចិត្តធ្វើសមាធិ មិនដែលនិយាយឡើយពី កាំភ្លើងឬអំពើហិង្សា។ នេះបើតាមកាសែតក្នុងស្រុក។
ប៉ុន្តែបើតាមប្រភពព័ត៌មានប៉ូលិស ខ្មាន់កាំភ្លើងរូបនេះ មានចរិតសាហាវ កំរោលចូល ធ្លាប់បានបាញ់ទម្លុះដំបូលផ្ទះអ្នកជិតខាង។ ឪពុកជននេះធ្លាប់ទាំងបានប្រាប់ប៉ូលិសអំពីបញ្ហាផ្លូវចិត្តមិនចេះទប់កំហឹង របស់អាឡិចស៊ី ដោយលើកឡើងពីវិបត្តិគ្រាំចិត្តក្រោយមហាភេវកម្ម១១កញ្ញា២០០១។
ម្សិលមិញ អារ៉ុង អាឡិចស៊ីអាចចូលទៅទីស្នាក់ការយោធាអាមេរិកបាន ដោយប្រើកាតរបស់អតីតបុគ្គលិករបស់មូលដ្ឋានទ័ពនេះ ទើបគ្មានការឆែកឆេរ។ គេសង្ស័យថាមនុស្សមានរួមគំនិតក្នុងការវាយប្រហារនេះ ប៉ុន្តែមិនទាន់អាចកំណត់បានអំពីកំរិតនៃការផ្សំគំនិតនេះទេ។ ឯមូលហេតុនិងកម្មវត្ថុដែលរុញច្រានឱ្យមានការបាញ់ប្រហារ ក៏នៅតែពុំទាន់អាចកំណត់បានយ៉ាងច្បាស់លាស់នៅឡើយ រហូតមកទល់នឹងល្ងាចថ្ងៃចន្ទម្សិលមិញនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ