អេបូឡា៖ អាមេរិកបញ្ជូនថ្នាំក្នុងដំណាក់កាលសាកល្បងទៅព្យាបាលនៅលីបេរីយ៉ា
រោគអេបូឡា បានស្លាប់ជីវិតមនុស្ស ១០១៣នាក់ហើយ ! នេះបើតាមតួលេខចុងក្រោយរបស់អង្គការសុខភាពពិភពលោក ចេញថ្ងៃទី ១១សីហា ២០១៤។ ប្រទេសដែលរងគ្រោះខ្លាំងគេ គឺ ហ្គីណេ សេរ៉ាឡេអូន និងលីបេរីយ៉ា។ ប្រឈមមុននឹងការរាតត្បាតឥតស្រាកដូច្នេះ ប្រទេសជប៉ុនបានសម្រេចចិត្ត ជម្លៀសសហការីរបស់ខ្លួន២៤នាក់ចេញពីប្រទេសទាំងបីនេះ។ ចំណែកអាមេរិកវិញ បានប្រកាសយល់ព្រមបញ្ជូនសេរ៉ូម សម្រាប់ព្យាបាលជំងឺអេបូឡាទៅឲ្យលីបេរីយ៉ា។ ប៉ុន្តែសេរ៉ូមនេះ ស្ថិតក្នុងដំណាក់កាលសាកល្បងតែប៉ុណ្ណោះ មិនទាន់ទទួលបានការអនុញ្ញាតឲ្យប្រើប្រាស់ជាទូទៅនៅឡើយទេ។ អង្គការសុខភាពពិភពលោកដែលជួបប្រជុំគ្នាតាំងពីថ្ងៃចន្ទ ក៏ទើបព្រមព្រៀងឱ្យប្រើថ្នាំនេះដែរ ដើម្បីការពារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
សេរ៉ូមប្រឆាំងនឹងវីរ៉ុសអេបូឡា ZMapp ផលិតចេញពីស្លឹកថ្នាំជក់ និងពិបាកផលិតក្នុងបិរមាណច្រើនថ្នាក់ពិភលោកណាស់។ មានសមត្ថភាពជាថ្នាំអង្គបដិបក្ខ anticorps សេរ៉ូម ZMapp ដែលផ្តល់លទ្ធផលជាទីគាប់ចិត្ត ពេលសាកល្បងលើសត្វស្វា មិនដែលធ្លាប់បានធ្វើការសាកល្បងលើមនុស្សទេពីមុនមក ហើយក៏ពុំទាន់បានទទួលការអនុញ្ញាតឱ្យធ្វើចរាចរណ៍ជាផ្លូវការដែរ។
បន្ទាប់ពីបានឃើញអាមេរិកប្រើថ្នាំនេះជាលើកដំបូង ក្នុងក្របខ័ណ្ឌសាកល្បងលើជនជាតិអាមេរិកពីរនាក់ឆ្លងជំងឺអេបូឡាពីអាហ្វ្រិក ផ្តល់សញ្ញាវិជ្ជមានមក ប្រទេសអាហ្វ្រិករងការរាតត្បាតពីជំងឺអេបូឡា បានបង្ហាញឆន្ទៈចង់ប្រើសេរ៉ូមនេះដែរ ! ប្រធានាធិបតីលីបេយ៉ាបានស្នើសុំទៅលោកបារ៉ាក់អូបាម៉ាផ្ទាល់តែម្តង កាលពីថ្ងៃទី៨សីហា។ ហើយការព្យាបាលដកពិសោធន៍ នឹងត្រូវចាប់ផ្តើម នៅលីបេរីយ៉ា នៅសប្តាហ៍នេះ ក្រោមការដឹកនាំរបស់អន្តរការីអាមេរិក។ នេះបើតាមប្រសាសន៍លោកប្រធានាធិបតីលីបេរីយ៉ា ដែលបានបញ្ជាក់ថាបានទទួលភ្លើងខៀវពីលោកស្រី Margaret Chan អគ្គនាយកអង្គការសុខភាពពិភពលោក។
អង្គការសុខភាពពិភពលោក ដែលបានជួបប្រជុំគ្នាតាំងពីថ្ងៃចន្ទម្សិលមិញ ដោយបន្ទាន់ និងដោយបិទទ្វារនៅទីក្រុងហ្សឺណែវ ទើបបានចេញសេចក្តីសម្រេចនៅថ្ងៃអង្គារនេះ អនុញ្ញាតឱ្យប្រើប្រាស់សេរ៉ូម ZMapp បើទោះបីជាថ្នាំនេះទើបស្ថិតក្នុងដំណាក់កាលសាកល្បងក៏ដោយ។ គណៈកម្មាធិការអង្គការសុខភាពពិភពលោកបានផ្តល់ការអនុញ្ញាតជាផ្លូវការ ដោយឈរលើគោលការណ៍ការពារ និងស្ថានភាពនៃការរាតត្បាតរបស់មេរោគ ប៉ុន្តែរក្សាសិទ្ធិទាមទារឱ្យគោរពលក្ខខណ្ឌចាំបាច់។ បើតាមOMS សេរ៉ូមនេះជាថ្នាំព្យាបាលមានសក្តានុពលតែមួយគត់ក្នុងការប្រយុទ្ធប្រឆាំងនឹងជំងឺអេបូឡា បើទោះបីជាគេនៅមិនទាន់ដឹងអំពីប្រសិទ្ធិភាព និងផលរំខាននៃថ្នាំនេះយ៉ាងណាក៏ដោយ។
សូមបញ្ជាក់ថារហូតមកទល់នឹងពេលនេះ គ្មានថ្នាំព្យាបាល ឬថ្នាំវ៉ាក់សាំង ណាអាចទប់ស្កាត់ និងព្យាបាល ជំងឺគ្រុនក្តៅចេញឈាមអេបូឡា ដែលអាចចម្លងពីសត្វមកមនុស្ស និងពីមនុស្សទៅមនុស្ស តាមរយៈការប៉ះពាល់ដោយផ្ទាល់អង្គធាតុរាវមានជីវិតរបស់អ្នកជំងឺទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ